.jpg)
រូបភាពដែលបង្ហាញលើក្របរបាយការណ៍ទាក់ទងនឹងការរើសអើងអ្នកស្រឡាញ់ភេទដូចគ្នា។ រូបថត CCHR
ភ្នំពេញៈ របាយការណ៍របស់មជ្ឈមណ្ឌលសិទ្ធិមនុស្សកម្ពុជា (CCHR) ដែលបានចេញផ្សាយនៅខែនេះ បានរកឃើញថា អ្នកស្រឡាញ់ភេទដូចគ្នា ប្រឈមនឹងការរើសអើសក្នុងវិស័យការងារទូទៅដោយសារតែនិន្នាការភេទ អត្តសញ្ញាណយេនឌ័រ ការបង្ហាញទំនោរយេនឌ័រ និងលក្ខណៈភេទ។
បន្ទាប់ពីចេញផ្សាយរបាយការណ៍នេះ CCHR ក៏បានចេញសេចក្តីថ្លែងការណ៍មួយផងដែរកាលពីថ្ងៃអាទិត្យដោយបញ្ជាក់ថា៖ «អ្នកស្រឡាញ់ភេទដូចគ្នាប្រឈមនឹងការរើសអើងក្នុងការទទួលបានការងារ។ អ្នកចូលរួមផ្តល់ចម្លើយម្នាក់ក្នុងចំណោម ៥ នាក់បានលើកឡើងថា ពួកគាត់ធ្លាប់ត្រូវបានបដិសេធការងារដោយសារតែនិន្នាការភេទ និងអត្តសញ្ញាណយេនឌ័ររបស់ពួកគាត់»។
សេចក្តីថ្លែងការណ៍នេះបញ្ជាក់ថា លទ្ធផលនៃរបាយការណ៍នេះធ្វើឡើងតាមរយៈការស្រាវជ្រាវឯកសារ និងចុះស្រាវជ្រាវផ្ទាល់ដោយសម្ភាសស្ត្រីស្រឡាញ់ស្ត្រី បុរសស្រឡាញ់បុរស អ្នកស្រឡាញ់ទាំង ២ ភេទ អ្នកប្តូរយេនឌ័រ និងអ្នកដែលមិនកំណត់អត្តសញ្ញាណ (អ្នកស្រឡាញ់ភេទដូចគ្នា) ចំនួន ១១៨ នាក់ ក្នុងខេត្តចំនួន ៧ និងតំណាងរដ្ឋាភិបាល ១ រូបផងដែរ។
ក្នុងចំណោមអ្នកដែលត្រូវបានសម្ភាស ៦៥ ភាគរយ បានរាយការណ៍ថា ពួកគេត្រូវបានបដិសេធការងារដោយសារនិន្នាការភេទ និងអត្តសញ្ញាណយេនឌ័រហើយករណីនេះកើតឡើងជាច្រើនដង។ ពួកគាត់មិនបានប្តឹង ឬរាយការណ៍អំពីការរើសអើងនេះទេ ព្រោះពុំដឹងត្រូវរាយការណ៍ទៅនរណា ឬមិនរំពឹងថានឹងទទួលបានការគាំទ្រ។
សេចក្តីថ្លែងការណ៍បន្ថែមថា អ្នកត្រូវបានសម្ភាស ២៥ ភាគរយ បានរាយការណ៍ថា ពួកគាត់បានលាក់បាំងនិន្នាការភេទ និងអត្តសញ្ញាណយេឌ័រនៅពេលសម្ភាសការងារ ហើយចំនួនជាងពាក់កណ្តាលបានធ្វើដូច្នេះ ព្រោះមិនរំពឹងថា ពួកគេនឹងត្រូវបានជ្រើសរើសយកឱ្យធ្វើការងារ។
ដោយឡែកក្នុងអំឡុងពេលបំពេញការងារ ៣៦ ភាគរយ នៃអ្នកត្រូវបានសម្ភាសបាននិយាយថា ពួកគេធ្លាប់រងការរើសអើង និងការសម្លុត ដូចជា ការបៀតបៀនតាមរយៈពាក្យសម្ដី និងការហៅឈ្មោះនៅកន្លែងធ្វើការងារដោយសារនិន្នាការភេទ និងអត្តសញ្ញាណយេនឌ័រពីមនុស្សទូទៅ ៦១ ភាគរយ ពីសហការីមាន ៤៥ ភាគរយ និងយូរៗម្តងពីនយោជក ៦ ភាគរយ។
សេចក្តីថ្លែងការណ៍បញ្ជាក់ថា CCHR ស្នើឱ្យមានការកែប្រែច្បាប់ និងគោលនយោបាយនានាដើម្បីហាមប្រាមឱ្យបានជាក់លាក់ទៅលើការរើសអើងនៅកន្លែងធ្វើការដោយសារមូលហេតុទាំងអស់នេះ ដើម្បីធានាឱកាសស្មើគ្នាសម្រាប់អ្នកស្រឡាញ់ភេទដូចគ្នា។ CCHR ក៏បានអំពាវនាវដល់សាធារណជន និងនយោជកក្នុងវិស័យឯកជនឱ្យ «អនុវត្តស្តង់ដាប្រតិបត្តិសម្រាប់ធុរកិច្ច»ដើម្បីដោះស្រាយការរើសអើងនេះ និងបង្កើតគោលនយោបាយដែលគ្មានការរើសអើងដើម្បីធានាឱកាសការងារស្មើភាពគ្នានៅកន្លែងធ្វើការងារ។
លោកស្រី ចក់ សុភាព នាយិកាប្រតិបត្តិនៃ CCHR សុំមិនធ្វើអត្ថាធិប្បាយជុំវិញរបាយការណ៍នេះដោយបង្វែរសំណួរទៅឱ្យលោក នួន ស៊ីដារ៉ា អ្នកសម្របសម្រួលគម្រោងនិន្នាការភេទ និងអត្តសញ្ញាណយេនឌ័រនៃ CCHR។
លោក នួន ស៊ីដារ៉ា បានប្រាប់ភ្នំពេញប៉ុស្តិ៍កាលពីម្សិលមិញថា CCHR កំពុងធ្វើការជាមួយអង្គការដៃគូ និងក្រសួងពាក់ព័ន្ធជុំវិញអនុសាសន៍ក្នុងការបង្កើតឱ្យមានគោលនយោបាយ និងច្បាប់ប្រឆាំងនឹងការរើសអើងការស្រឡាញ់ភេទដូចគ្នា។ ប្រសិនបើច្បាប់ ឬគោលនយោបាយនេះអាចកើតឡើងគឺអាចចូលរួមការពារអ្នកដែលស្រឡាញ់ភេទដូចគ្នាហើយសង្គមនឹងទទួលបានសមភាព។
លោក ស៊ីដារ៉ា បានបញ្ជាក់ថា៖ «ឥឡូវនេះ ទី១ ខាងអង្គការដៃគូយើងកំពុងធ្វើម៉េចផ្សព្វផ្សាយឱ្យបានទូលំទូលាយហើយ ទី២ យើងធ្វើពីលើមកវិញ គឺធ្វើការជាមួយក្រសួងជាមួយអ្នកដែលពាក់ព័ន្ធ អ្នកដែលធ្វើសេចក្តីសម្រេចចិត្តហ្នឹងធ្វើម៉េចជំរុញឱ្យច្បាប់ស្តីពីការរើសអើសបង្កើតឡើងដោយរាជរដ្ឋាភិបាលគឺអនុសាសន៍ហ្នឹងទទួលយកហើយ»។
លោកបន្តថា អង្គការរបស់លោកកំពុងធ្វើការជាមួយអង្គការដៃគូដើម្បីចូលរួមត្រួតពិនិត្យមើលថា ក្រសួងសាមីពាក់ព័ន្ធរបស់រដ្ឋាភិបាលធ្វើការដល់ណាហើយចង់ដឹងថា តើចំណុចណាធ្វើបាន និងចំណុចណាធ្វើមិនបាន ហើយនឹងយករបកគំហើញនៃការស្រាវជ្រាវនេះដើម្បីធ្វើការជាមួយក្រសួងការងារ ក្រសួងពាក់ព័ន្ធនានា និងសហគ្រាស និងអ្នកពាក់ព័ន្ធផ្សេងទៀត។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈមិនអាចទាក់ទងដើម្បីសុំការបញ្ជាក់បានទេកាលពីថ្ងៃចន្ទម្សិលមិញ៕
