ភ្នំពេញៈ តំណាងអង្គការសុខភាពពិភពលោកបានជំរុញឱ្យបុគ្គលម្នាក់ៗត្រូវតែចូលរួមអនុវត្តឱ្យបានម៉ឺងម៉ាត់នូវវិធានការរួមគ្នាឱ្យបានត្រឹមត្រូវ បើមិនដូច្នេះទេនឹងផ្តល់នូវផលវិបាកនៃការស្លាប់កាន់តែច្រើននៅក្នុងស្ថានភាពជំងឺកូវីដ ១៩ ដែលមានសភាពកាន់តែអាក្រក់ទៅនៅក្នុងប្រទេសកម្ពុជា។
លោកស្រី លី អៃឡេន តំណាងអង្គការសុខភាពពិភពលោកបានសរសេរលើបណ្តាញ Twitter នៅថ្ងៃម្សិលមិញថា ស្ថានភាពនៃជំងឺកូវីដ ១៩ នៅក្នុងប្រទេសកម្ពុជា គឺមិនទាន់មានការវិវត្តទៅជាល្អប្រសើរនៅឡើយ តែស្ថានភាពវាកាន់តែអាក្រក់ទៅៗ។
លោកស្រីថ្លែងថា៖ «ខ្ញុំសុំជំរុញឱ្យបុគ្គលទាំងអស់អនុវត្តឱ្យបានម៉ឺងម៉ាត់នូវរាល់វិធានការរួមគ្នា។ សូមធ្វើអ្វីដែលត្រឹមត្រូវ ការមិនគោរពអនុលោមតាមច្បាប់ត្រឹមត្រូវគឺជាផលវិបាកដែលនាំមកនូវសោកនាដកម្មនៃការស្លាប់កាន់តែច្រើន»។
លោកស្រីបានបន្តទៀតថា ការអនុវត្តនូវវិធានការចត្តាឡីស័កឱ្យបានត្រឹមត្រូវពេញលេញអាចជួយការពារការរីករាលដាលនៃវីរុសនេះ ជួយសង្គ្រោះអាយុជីវិតមនុស្ស និងធ្វើឱ្យប្រទេសមានសុវត្ថិភាព។
លទ្ធផលនៃការធ្វើតេស្តអវិជ្ជមានជំងឺកូវីដ ១៩ មិនមែនមានន័យថាបញ្ឈប់ការធ្វើចត្តាឡីស័ក ១៤ ថ្ងៃនោះទេ តែ [យើង] កំពុងប្រឈមមុខនឹងបញ្ហាប្រឈមទាំងនេះក្នុងជីវិតជាមួយគ្នា»។
លោកស្រីបានបន្ថែមថា៖ «សូមរក្សាភាពអស្ចារ្យនៃកម្ពុជាអច្ឆរិយនេះឱ្យមានសុវត្ថិភាព! សូមកោតសរសើរអស់ពីចិត្តចំពោះការប្តេជ្ញាចិត្ត និងភាពជាអ្នកដឹកនាំកម្រិតខ្ពស់បំផុត រួមបញ្ចូលមានដូចជា វិធានការសុខភាពសាធារណៈ សកម្មភាពបុគ្គល និងសាមគ្គីភាពដើម្បីការពារការនាំចូល និងបញ្ឈប់ការរីករាលដាលនៃជំងឺវីរុសកូវីដ ១៩ ឆ្លងចូលសហគមន៍ទៀត»។
ព្រឹត្តិការណ៍សហគមន៍ ២០ កុម្ភៈ ជាព្រឹត្តិការណ៍ឆ្លងក្នុងសហគមន៍លើកទី៣ ដែលមានរយៈពេលយូរជាងគេ និងបានបង្កឱ្យមានអ្នកឆ្លងរហូតដល់ជាង ១ ៧០០ នាក់ ក្នុងនោះវាបានបង្កឱ្យមានអ្នកស្លាប់ដោយសារជំងឺកូវីដ ១៩ ក្នុងប្រទេសកម្ពុជាចំនួន ១០ នាក់ហើយគិតត្រឹមថ្ងៃទី ២៧ ខែ មីនា ឆ្នាំ ២០២១។
ក្រសួងសុខាភិបាលនៅថ្ងៃម្សិលមិញនេះបានប្រកាសពីចំនួនអ្នកឆ្លងវីរុសកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ មានចំនួន ៨៦ នាក់ ដែលធ្វើឱ្យចំនួនអ្នកឆ្លងសរុបក្នុងព្រឹត្តិការណ៍នេះមានរហូតទៅដល់ ១ ៧០៨ នាក់។
យោងតាមសេចក្ដីប្រកាសព័ត៌មានរបស់ក្រសួងសុខាភិបាលបានឱ្យដឹងថា អ្នកដែលភាគច្រើនកើតឡើងនៅក្នុងខេត្តព្រះសីហនុចំនួន ៤៣ នាក់ រាជធានីភ្នំពេញ ២៥ នាក់ ខេត្តត្បូងឃ្មុំ ៣ នាក់ ខេត្តស្វាយរៀង ៣ នាក់ ខេត្តក្រចេះ ៣ នាក់ ខេត្តព្រៃវែង ២ នាក់ ខេត្តកំពង់ចាម ២ នាក់ ខេត្តកណ្ដាល ២ នាក់ ខេត្តសៀមរាប ២ នាក់ និងខេត្តកែបម្នាក់។ គិតត្រឹមព្រឹកថ្ងៃទី ២៨ ខែ មីនា ឆ្នាំ ២០២១ នេះ កម្ពុជាមានអ្នកឆ្លងវីរុសកូវីដសរុបចំនួន ២ ២៣៣ នាក់ក្នុងនោះអ្នកដែលបានព្យាបាលជាសះស្បើយចំនួន ១ ១៦៦ នាក់ អ្នកកំពុងសម្រាកព្យាបាលចំនួន ១ ០៥៤ នាក់ និងមានអ្នកស្លាប់ចំនួន ១០ នាក់។
នៅថ្ងៃម្សិលមិញនេះដែរ លោក ហ៊ុន សែន នាយករដ្ឋមន្ត្រីនៃកម្ពុជាបានផ្តល់ថវិកាបន្ថែមចំនួន ១ ០៧០ លានរៀល ទៅដល់ខេត្តចំនួន ១៥ និងផ្តល់នូវសម្ភារ (ឃីត) មួយចំនួនផងដែរទៅដល់ខេត្តចំនួន ១២ ទៀតសម្រាប់រៀបចំ និងជួយឧបត្ថមដល់អ្នកដែលកំពុងធ្វើចត្តាឡីស័កចាប់ពីថ្ងៃទី ២៨ ខែមីនា ដល់ថ្ងៃទី ០៥ ខែ មេសា ឆ្នាំ ២០២១។
យោងតាមលិខិតរបស់ក្រសួងសុខាភិបាលដែលបានផ្សព្វផ្សាយឱ្យដឹងថា លោកនាយករដ្ឋមន្ត្រីបានផ្តល់ថវិកាសរុបចំនួន ១ ០៧០ លានរៀល សម្រាប់ជួយផ្គត់ផ្គង់ទៅដល់ប្រជាពលរដ្ឋដែលកំពុងធ្វើចត្តាឡីស័កក្នុងខេត្តចំនួន ១៥ ខេត្ត ដែលមានអ្នកកំពុងធ្វើចត្តាឡីស័កសរុបចំនួន ១២ ៨២៣ នាក់។
ខេត្តទាំងនោះមានខេត្តបាត់ដំបង បន្ទាយមានជ័យ ប៉ៃលិន ពោធិ៍សាត់ ព្រះវិហារ ត្បូងឃ្មុំ ក្រចេះ តាកែវ កំពង់ចាម កំពង់ឆ្នាំង កំពង់ស្ពឺ កំពង់ធំ ស្ទឹងត្រែង ព្រះសីហនុ និងខេត្តសៀមរាប។
ថវិកាដែលត្រូវបានផ្តល់បន្ថែមទៅដល់ខេត្តទាំងនេះមានចាប់ពី ១០ លានរៀល ទៅដល់ ៣០០ លានរៀល។
ជាមួយគ្នានេះលោក ហ៊ុន សែន ក៏បានផ្តល់នូវសម្ភារសម្រាប់ប្រើប្រាស់មួយចំនួនទៅដល់ខេត្តចំនួន ១២ ខេត្តទៀត ក្នុងនោះមានខេត្តបាត់ដំបង បន្ទាយមានជ័យ ឧត្តរមានជ័យ កោះកុង ពោធិ៍សាត់ ព្រះវិហារ ព្រៃវែង ត្បូងឃ្មុំ កំពង់ឆ្នាំង កំពង់ស្ពឺ កំពង់ធំ និង ខេត្តសៀមរាបសម្រាប់ជួយដល់អ្នកកំពុងធ្វើចត្តាឡីស័កសរុបចំនួន ៩ ៥៨៦ នាក់ ដែលសម្ភារទាំងនោះមានកន្ទេលជ័រ មុង ភួយ ខ្នើយ ស្រោមខ្នើយ សារុង និងក្រមា។
ទន្ទឹមនឹងនេះដែរ រដ្ឋមន្ត្រីក្រសួងមហាផ្ទៃ លោក ស ខេង បានចេញសេចក្តីណែនាំទៅដល់គ្រប់អភិបាលរាជធានី-ខេត្តទាំងអស់ត្រូវចូលរួមសហការឲ្យបានជិតស្និទ្ធជាមួយមន្ត្រីសុខាភិបាលក្នុងការអនុវត្តការផាកពិន័យអន្តរការណ៍លើបុគ្គល ឬនីតិបុគ្គលដែលមិនអនុវត្តនូវកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាពបុគ្គលស្របតាមច្បាប់ និងលិខិតបទដ្ឋានគតិយុត្តជាធរមាន។
លោក ស ខេង បានបញ្ជាក់ថា៖ «នៅក្នុងការចាត់ចែងអនុវត្តការងារជាក់ស្តែង ប្រសិនបើមានជួបការលំបាក ឬបញ្ហាប្រឈមណាមួយ គណៈបញ្ជាការឯកភាពរដ្ឋបាលរាជធានី-ខេត្តត្រូវរាយការណ៍ជូនក្រសួងសុខាភិបាល និងចម្លងជូនក្រសួងមហាផ្ទៃជាបន្ទាន់»។
អ្នកនាំពាក្យក្រសួងយុត្តិធម៌ លោក គឹម សន្តិភាពបានឱ្យដឹងនៅថ្ងៃម្សិលមិញផងដែរថា បុគ្គលដែលកំពុងស្ថិតនៅតាមទីសាធារណៈដែលមានមនុស្សច្រើន ឬទីកន្លែងដែលមានការជួបជុំមនុស្សចាប់ពី ២ នាក់ឡើង ទៅត្រូវមានកាតព្វកិច្ចពាក់ម៉ាស់។ លោកបានបញ្ជាក់ថា កាតព្វកិច្ចពាក់ម៉ាស់ត្រូវបានលើកលែងសម្រាប់បុគ្គលដែលរស់នៅក្នុងលំនៅឋានឯកជនជាមួយគ្នាក្នុងអំឡុងពេលនៃការជួបជុំគ្នានៅក្នុងលំនៅឋាននោះ៕