ភ្នំពេញ: ហាងតូចល្មមទើបបើកជិតមួយសប្ដាហ៍ដែលអាចទទួលភ្ញៀវត្រឹមប្រមាណតែ ១០ នាក់ស្ត្រីវ័យ ៣៩ ឆ្នាំរូតរះស្រុសនំបញ្ចុករហ័សរហួន ដើម្បីឆ្លើយតបទៅនឹងការអង្គុយរង់ចាំរបស់ភ្ញៀវទាំងក្នុង និងក្រៅតាមលេខរៀង។
ពោតបារាំង ស្លឹកជីរនាងវង និងត្រកួនស្រុសទឹកក្ដៅ រួចស្រោចទឹកស៊ុបក្នុងចាននំបញ្ចុក សាច់ត្រី ប្រហិត ឈាមជ្រូក ២ ដុំ និងសាច់ជ្រូក ២ ចំណិត ជើងមាន់មួយយ៉ាងមានសោភណភាព បន្ថែមទឹកកាពិពេញ រំលេចពណ៌ឆោមជាមួយម្ទេសក្រហមឆ្អៅ ក្រូចឆ្មារមួយចំណិតបង្កើនរសជាតិកាន់តែជាប់ចិត្ត។
លោក កឹម សុគន្ធារឹទ្ធ វ័យ ២៤ ឆ្នាំជាម្ចាស់ហាងចូលហ៊ុនជាមួយបងស្រីជីដូនមួយកញ្ញា រ័ត្ន សុគន្ធា វ័យ ៣៩ ឆ្នាំដែលកំពុងមមាញឹកក្នុងការស្រុសនំ ថា៖ «ដោយសារតែបងស្រីជីដូនមួយចូលចិត្តញ៉ាំនំបញ្ចុកស្រុស ហើយគាត់ឧស្សាហ៍ឡើងចុះវៀតណាម ឆ្លងតាមការញ៉ាំនៅស្រុកគេទើបគាត់យកមកបំបែកជារូបមន្តខ្លួនឯង»។
41 នំបញ្ចុកស្រុសមានលក់នំបញ្ចុកស្រុស ២ រសជាតិមានសម្លខួក្តាមរសជាតិប្លែកពីគេ និងមានរសជាតិសាច់ត្រីដែលម្ចាស់ហាងលោក កឹម សុគន្ធារឹទ្ធ បានអះអាងថាវាពិតជាឆ្ងាញ់ប្លែកពីកន្លែងដទៃដោយសារតែជារូបមន្តម្ចាស់ដើម និងកែច្នៃឲ្យរសជាតិកាន់តែឆ្ងាញ់ជាប់មាត់។ ឯតម្លៃក្នុង ១ ចាន ៥ ០០០ រៀលប៉ុណ្ណោះ។
ក្រៅពីមានលក់នំបញ្ចុក ហាង 41 នំបញ្ចុកស្រុសក៏មានលក់ភេសជ្ជៈជាច្រើនមុខដែរ ជាពិសេសស្លឹកតើយប្តូរនិស្ស័យដែលភ្ញៀវចូលចិត្តកុម្ម៉ង់មកពិសាជាមួយនំបញ្ចុកដោយទឹកស្លឹកតើយមានពណ៌ខៀវ ប៉ុន្តែពេលចាក់ទឹកក្រូចឆ្មារចូលទៅរួចកូរទឹកស្លឹកតើយក៏ប្រែជាពណ៌ស្វាយចាស់។
ក្នុង ១ ថ្ងៃហាងតូចចង្អៀតមានទីធ្លាសម្រាប់ដាក់ត្រឹមតែ ៤ ទៅ ៥ តុ តែទទួលភ្ញៀវរហូត ៣០០ នាក់ដោយម្ចាស់ហាងលោក កឹម សុគន្ធារឹទ្ធ បានសន្និដ្ឋានថា អាចមកពីការបញ្ចុះតម្លៃរហូតដល់ ៥០ ភាគរយក្នុងឱកាសបើកសម្ពោធ ៤ ថ្ងៃដំបូង។
សម្រាប់ហាង 41 នំបញ្ចុកស្រុសមានទីតាំងស្ថិតនៅផ្លូវលេខ ៣៣០ ខាងលិចគុកទួលស្លែង និងទូរស័ព្ទលេខ ០៩៨ ២២២ ១១០៕
វីដេអូ៖