ក្រុងកែប៖ ជាមួយនឹងចំណូលចិត្ដគ្រឿងសមុទ្រគ្រប់ប្រភេទ ចាប់ពីក្ដាមសេះ ក្ដាមព្រលឹត ក្ដាមថ្ម មឹកពីងពាង មឹក 3D និងបង្កង បង្គា និងបំណងចម្អិនអាហារស្រស់ៗដោយខ្លួនឯងផ្ទាល់អ្នកស្រី ញ៉ឹប បូទុំ ជាអ្នករស់នៅខេត្តកែបសម្រេចចិត្តបើកភោជនីយដ្ឋានលក់ប្រភេទអាហារសមុទ្រគ្រប់មុខ ដែលមិនថា ភ្ញៀវជាតិ និងអន្ដរជាតិមិនភ្លេចឆៀងចូលតំបន់ផ្សារក្ដាមដ៏ល្បីល្បាញរបស់កែបនេះឡើយ។
ក្ដាមសេះរស់រវើកក្នុងទូកញ្ចក់ស្ទួយដោយខ្យល់អុកស៊ីហ្ស៊ែនបំភាយពពុះទឹក ខណៈដែលក្ដាមថ្មត្រូវបានចងដង្កៀបដ៏រឹងធំរបស់វា បង្គា និងមឹកត្រូវបានដាក់ក្លាស្សេក្នុងធុងស្នោ បានអន្ទងចិត្ដភ្ញៀវទេសចរចូលភ្លក្សរសជាតិអាហារសមុទ្រ ដែលមានទីតាំងនៅក្នុងប្លុកហាងជាច្រើនតាមដងវិថីផ្សារក្ដាម។
អ្នកស្រី ញ៉ឹប បូទុំ វ័យ ៤០ ឆ្នាំ ម្ចាស់ភោជនីយដ្ឋាន ស្រីពៅ បានប្រាប់មកភ្នំពេញប៉ុស្តិ៍ពីអាហារសមុទ្រយ៉ាងស្រស់ញញឹមរបស់ខ្លួនថា៖ «ហាងយើងមានលក់គ្រឿងសមុទ្រគ្រប់ប្រភេទ ដែលធានាថាស្រស់ ដោយភ្ញៀវអាចកុម្ម៉ង់ជាមុខម្ហូបតាមតារាង ឬក៏អាចរើស ដូចជា បង្គា ក្តាម ដែលយើងមានដាក់នៅក្នុងធុងស្នោដោយខ្លួនឯងបាន។ ខាងយើងនឹងចម្អិនជូនភ្លាមៗ ដោយភ្ញៀវអាចរង់ចាំរយៈពេលចាប់ពី ៥ នាទី ដល់ ២០ នាទី យ៉ាងយូរបំផុត»។
ទីធ្លាធំទូលាយល្មមសម្រាប់រៀបតុបាន ១០ អាចទទួលភ្ញៀវបានជាង ៦០ នាក់ ក្នុងពេលតែមួយ ភោជនីយដ្ឋាន ស្រីពៅ ដែលភ្ញៀវអាចអង្គុយគន់ផ្ទៃសមុទ្រ នៅតែបន្តមានភ្ញៀវមិនដាច់ ដោយចាប់ពីថ្ងៃចន្ទ ដល់ថ្ងៃសុក្រ អាចទទួលបានភ្ញៀវពី ២០ ទៅ ៣០ នាក់ ក្នុង ១ ថ្ងៃ។ ចំណែកឯថ្ងៃបុណ្យជាតិធំៗ ឬថ្ងៃចុងសប្ដាហ៍ អាចទទួលបានភ្ញៀវរហូតដល់ជាង ១០០ នាក់។
ភោជនីយដ្ឋានមានលក់ជាប្រភេទគ្រឿងសមុទ្រដែលមាននៅក្នុងបញ្ជីរាយនាម ដូចជា ក្តាមថ្មពង ក្តាមថ្មអត់ពង ក្តាមសេះ មឹក ត្រី និងបង្គា ព្រមទាំងមានជាច្រើនមុខទៀត ដែលចម្អិនសម្រាប់ចានតូច និងចានធំ មានតម្លៃចាប់ពី ៥ ដុល្លារ ដល់ ១៥ ដុល្លារ ក្នុង ១ ចានផងដែរ ដែលជាជម្រើសឆា អាំង ស្ងោរជ្រក់ ការី ឆាអំពិលទុំ និងមានជាច្រើនមុខទៀត។
ក្រៅពីជម្រើសក្នុងការកុម្ម៉ង់មុខម្ហូបដែលមានរាយនាមនៅក្នុងបញ្ជីរាយមុខម្ហូបក្នុង ១ ចាន អតិថិជនអាចជ្រើសរើសគ្រឿងសមុទ្រដែលនៅមិនទាន់ចម្អិនក្នុងសភាពស្រស់ៗ និងរស់រវើក ដោយគិតជាគីឡូ ដូចជា មឹក ក្តាមសេះ ក្តាមថ្ម និងមឹក ព្រមទាំងមានជាច្រើនមុខទៀត។
ក្រោយពីចាប់ក្ដាមសេះថ្លឹងភ្លាមៗ អ្នកស្រី ញ៉ឹប បូទុំ រៀបចំចង្ក្រាន ២ ដោយរំលែកមួយផ្នែកដាក់ស្ងោរក្នុងទឹកកំពុងពុះ ខណៈដែលក្ដាមមួយផ្នែកទៀតដាក់ឆាជាមួយផ្លែម្រេចខ្ចី មុនពេលលើកជូនភ្ញៀវដល់តុ ដែលកំពុងរង់ចាំ។
គ្រឿងសមុទ្រស្រស់ៗ សម្រាប់ភ្ញៀវចង់ទិញជាគីឡូក្រាម និងរើសដោយខ្លួនឯងផ្ទាល់ ដែលដាក់លក់នៅក្នុងភោជនីយដ្ឋាន ស្រីពៅ ដូចជា ក្តាមសេះ (៦៥ ០០០ រៀល ១ គីឡូក្រាម) ក្តាមថ្មអត់ពង (៨៥ ០០០ រៀល ១ គីឡូក្រាម) ក្តាមថ្មពង (១២ ម៉ឺនរៀល ១ គីឡូក្រាម) និងមឹក (៦ ម៉ឺនរៀល ១ គីឡូក្រាម)។
យុវជន ធន វាសនា ជាភ្ញៀវទេសចរបានប្រាប់មកភ្នំពេញប៉ុស្តិ៍ថា៖ «ខ្ញុំតែងតែទៅលម្ហែនៅពេលទំនេរពីរៀន ហើយក៏រមែងចូលទិញគ្រឿងសមុទ្រនៅក្នុងផ្សារក្តាមដែរ ពីព្រោះយើងអាចជ្រើសរើសបានតាមចិត្ត និងស្រស់ៗ។
ចំណែកឯតម្លៃក៏សមរម្យដែរ ដូចជាថ្ងៃនេះខ្ញុំបានទិញបង្គា ១ គីឡូ ៣ ម៉ឺនរៀល និងក្តាមសេះ ១ គីឡូ ២៥ ០០០ រៀល និងឲ្យគេស្ងោរចំណាយ ២ គីឡូ ៥ ០០០ រៀលទៀតប៉ុណ្ណោះ»។
ម្ចាស់ភោជនីយដ្ឋានលក់គ្រឿងសមុទ្ររូបនេះ បញ្ជាក់ពីមូលហេតុដែលតម្លៃថ្លៃជាងនៅក្នុងផ្សារក្តាម បន្ថែមទៀតថា៖ «ចំពោះគ្រឿងសមុទ្រដែលមាននៅក្នុងហាងខ្ញុំមានតម្លៃថ្លៃជាងក្នុងផ្សារក្តាមពិតមែន។ ប៉ុន្តែខ្ញុំសុំធានាថា ជារបស់ធម្មជាតិហើយក៏សុទ្ធតែជារបស់ល្អ ព្រោះខ្ញុំមានម៉ូយដែលជាអ្នកចុះទូក»។
អ្នកស្រី ញ៉ឹប បូទុំ បានអះអាងថា៖ «តាមធម្មតា គេចុះទូកម្តងបានគ្រឿងសមុទ្រប្រហែលជាង ១០០ គីឡូក្រាម។ ប៉ុន្តែខ្ញុំបានជ្រើសរើសយកតែជាង ១០ គីឡូក្រាមប៉ុណ្ណោះសម្រាប់មកលក់នៅក្នុងហាង ដោយយករបស់ណាដែលល្អបំផុតមកលក់នៅក្នុងហាង គឺមិនត្រូវការឲ្យភ្ញៀវបាត់បង់ជំនឿចិត្តមកលើហាងយើងនោះទេ ជាពិសេសនោះគឺធំៗល្អ»៕