ក្រុងមីឡាន: ជារាងរៅម៉ូតូធំ តួទាបល្មម ប្រវែងបណ្ដោយវែង El Doraro 1400 ABS ត្រូវបានអ្នកជំនាញវិភាគយានជំនិះ កោតសរសើរពីការរចនាតួខាងក្រៅ សមត្ថភាពបើកបរលើផ្លូវ និងម៉ូដរបស់វាជារួមតែម្ដង។
វាជាប្រភេទម៉ូតូធំ ដែលពេញនិយមនៅបណ្ដាប្រទេសអឺរ៉ុប និងអាមេរិក ដោយកន្លងមក វាបានបង្ហាញខ្លួនក្នុងពិព័រណ៍យានយន្ត នៅក្រុងមីឡាន ប្រទេសអេស្ប៉ាញ រួចមកហើយ។
បំពាក់ដោយម៉ាស៊ីន V-twin និងរក្សាកម្រិតកម្លាំង 1380cc និងថាមពល 96 សេះ ម៉ូតូ El Doraro 1400 ABS ពីក្រុមហ៊ុន Moto Guzzi បានរក្សានូវការបើកបរលើផ្លូវយ៉ាងរលូន។
សូម្បីតែឈ្មោះរបស់វា Eldorado 1400 ក៏ត្រូវបានអ្នកគាំទ្រវានឹកដល់ម៉ូដែលខ្លាំងក្លាបំផុតកាលពីជាង ៤០ ឆ្នាំមុនផងដែរ។
ដោយរក្សានូវរាងរៅបែបបុរាណ និងស្រគត់ស្រគំបន្តិច ម៉ូតូ Eldorado 1400 ABS មានជម្រើសពណ៌ក្រហម និងប្រផេះ។ បំពង់ផ្សែងវែង និងរលោង អមដោយកែបរាងអែនបន្តិច មើលទៅ គួរឲ្យទាក់ទាញ។ អ្នកដែលបានបើកបរសាកល្បងជាច្រើននាំគ្នាលាន់មាត់សរសើរថា កែបម៉ូតូ El Doraro 1400 ABS ផ្ដល់ផាសុកភាពក្នុងការអង្គុយ ទោះជាស្ថិតលើចម្ងាយផ្លូវឆ្ងាយ។
ទម្ងន់ម៉ូតូសុទ្ធដោយមិនគិតប្រេងសាំង គឺប្រមាណ ៣១៤ គីឡូក្រាម។ នេះមានន័យថា វាមិនស្រាលប៉ុន្មានទេក្នុងការបណ្ដើរ។ ប៉ុន្តែទម្ងន់នេះរួមចំណែកធ្វើឲ្យការបើកបរមានលំនឹង ទោះបង្កើនល្បឿនដល់ជាង ១៦០ គីឡូម៉ែត្រក្នុងមួយម៉ោងក៏ដោយ។
តម្លៃម៉ូតូ El Dorado 1400 លើទីផ្សារ គឺជាង ១៩ ០០០ ដុល្លារ៕