ក្រុងប៉ារីស: ក្រុមហ៊ុនផលិតរថយន្ដបារាំង Citroën ទើបបង្ហាញវ៉ែនតាថ្មី ផ្ទុកទឹកអាចព្យាបាលជំងឺពុលឡាន។
ដោយមានឈ្មោះថា Seetroën វ៉ែនតានេះប្រើបច្ចេកវិទ្យា Boarding Ring ដែលត្រូវបានបង្កើតឡើងដើម្បីព្យាបាលជំងឺពុលឡានដោយប្រើពេលតែប៉ុន្មាននាទីប៉ុណ្ណោះ។
យោងតាមរបាយការណ៍ព័ត៌មានផ្លូវការក្រោយពាក់ពី ១០ ទៅ ១២ នាទី វ៉ែនតានេះអនុញ្ញាតចិត្ដអារម្មណ៍ធ្វើការជាមួយចលនាដែលទទួលដឹងដោយត្រចៀកផ្នែកខាងក្នុង ខណៈកែវភ្នែកផ្ដោតលើវត្ថុមិនកម្រើកដូចជា ទូរស័ព្ទដៃ ឬសៀវភៅ ហើយអ្នកពាក់វ៉ែនតាអាចដោះវាចេញ និងលែងខ្វល់ចំពោះបញ្ហាពុលឡានទៀតហើយ។
អាការពុលឡានកើតឡើងពេលខួរក្បាលទទួលរលកសញ្ញាច្របូកច្របល់អំពីចលនាឃ្លីងឃ្លោងពីការសម្លឹងរបស់កែវភ្នែក និងត្រចៀកផ្នែកខាងក្នុង។ ជាធម្មតា វាមិនមែនជាបញ្ហាចោទពេលមនុស្សម្នាក់មើលតាមបង្អួចរថយន្ដទេ ពីព្រោះសរីរៈទាំង ២ ទទួលបានរលកចលនាដូចគ្នា តែពេលអ្នកឱនចុះមើលទូរស័ព្ទ ឬសៀវភៅ ភ្នែកមិនទទួលនូវសញ្ញាឃ្លីងឃ្លោងដូចគ្នាដែលនាំឲ្យកើតអាការពុលឡាន។
ទឹកក្នុងកងវ៉ែនតា Seetroën សម្របតាមមុំ និងចលនាផែនដី ដូច្នេះវាត្រូវបានស្គាល់ដោយការផ្គូផ្គងកែវភ្នែកដែលស្គាល់ដោយត្រចៀកផ្នែកខាងក្នុងដោយលែងមានសញ្ញារអាក់រអួល និងលែងពុលឡានទៀតហើយ។
ក្រុមហ៊ុនអះអាងថាបច្ចេកវិទ្យាកងលំនឹង (Boarding Ring) មានប្រសិទ្ធភាព ៩៥ ភាគរយហើយវាមានតម្លៃ ១១៥ ដុល្លារដែលត្រូវបានដាក់លក់តាមអនឡាញរបស់ក្រុមហ៊ុន៕ HR