.jpg)
តម្លៃទំនិញទំនិញទាំងអស់ត្រូវបិតស្លាកជាប្រាក់រៀលនៅគ្រប់សាខាផ្សារទំនើបឡាក់គី។ photo supplied
នៅពេលផ្សារទំនើបឡាក់គីបានបិទស្លាកតម្លៃទំនិញរបស់ខ្លួនជាប្រាក់រៀលកាលពីជិត ២ ឆ្នាំកន្លងទៅ ថ្នាក់ដឹកនាំហាក់មិនរំពឹងខ្ពស់ថា ប្រតិបត្តិការលក់ទំនិញរបស់ខ្លួនជាប្រាក់រៀលកើនឡើងនោះទេ ប៉ុន្តែលទ្ធផលពិតជាបានធ្វើឲ្យពួកគេភ្ញាក់ផ្អើល។
ផ្សារទំនើបឡាក់គីទទួលបានកំណើនចំនួន ១៥ ភាគរយកាលពីឆ្នាំមុន នៅពេលផលិតផលត្រូវបានបិទស្លាកតម្លៃជាប្រាក់រៀល ទោះបីជាអតិថិជននៅមានជម្រើសអាចប្រើបានទាំងប្រាក់ដុល្លារ និងប្រាក់រៀលក្តី។
លោកស្រី ផេតធី ហេង ប្រធានប្រតិបត្តិគ្រប់គ្រងផ្សារទំនើបឡាក់គីបានឲ្យកាសែតភ្នំពេញប៉ុស្តិ៍ដឹងថា៖ «នៅឆ្នាំ ២០១៧ យើងបានចាប់ផ្តើមបិទស្លាកតម្លៃទំនិញជារូបិយវត្ថុជាតិដែលតម្រូវដោយធនាគារជាតិនៃកម្ពុជា យើងក៏បានមើលឃើញការចាយប្រាក់រៀលកើនឡើង ពីព្រោះអតិថិជនយល់ឃើញថា ផលិតផលដែលបិទស្លាកជាប្រាក់រៀលមានតម្លៃថោកបើប្រៀបធៀបទៅនឹងប្រាក់ដុល្លារ»។
នៅក្នុងឆ្នាំ ២០១៧ ក្រសួងពាណិជ្ជកម្មបានចេញប្រកាសមួយតម្រូវឲ្យអាជីវកម្មត្រូវបិទស្លាកតម្លៃលើមុខទំនិញ និងសេវាកម្មគ្រប់ប្រភេទជាប្រាក់រៀលដែលជាផ្នែកមួយនៃកិច្ចខិតខំប្រឹងប្រែងរបស់រាជរដ្ឋាភិបាលក្នុងការលើកកម្ពស់ការប្រើប្រាស់រូបិយវត្ថុជាតិឲ្យបានកាន់តែទូលំទូលាយ។
លោកស្រី ផេតធី ហេង ប្រធានប្រតិបត្តិគ្រប់គ្រងផ្សារទំនើបឡាក់គី។ photo supplied
តើអ្វីដែលបានរួមចំណែកធ្វើឲ្យការលក់កើនឡើង?
លោកស្រី ហេង បានពន្យល់ថា៖ «កំណើនគឺដោយសារតែប្រាក់រៀលកំពុងត្រូវបានលើកកម្ពស់ ហើយអត្រាប្តូរប្រាក់រៀលមានស្ថិរភាព ដែលវាជាចំណាត់ការដ៏ល្អមួយរបស់ធនាគារជាតិក្នុងការលើកកម្ពស់ប្រាក់រៀល។ ដូច្នេះនៅពេលទំនិញត្រូវបានបិទស្លាកជាប្រាក់រៀល អតិថិជនយល់ឃើញថាវាមានតម្លៃថោកជាងទិញជាប្រាក់ដុល្លារ»។
លោកស្រី ហេង បន្តថា៖ «នេះគឺជាមតិយោបល់ដែលយើងបានទទួលពីអតិថិជន បន្ទាប់ពីបានធ្វើការស្ទង់មតិនៅតាមសាខារបស់យើងផ្ទាល់។ ទំនិញរបស់យើងមានគុណភាពខ្ពស់ ហើយតម្លៃរបស់យើងខ្ពស់ជាងតាមទីផ្សារធម្មតាដែលមិនមែនជាផ្សារទំនើបចន្លោះពី ៥ ទៅ ១០ ភាគរយ។ នៅពេលយើងបិទស្លាកតម្លៃជាប្រាក់រៀល អតិថិជនគាត់គិតថាវាមានតម្លៃថោកដែលវាជាសញ្ញាវិជ្ជមាន និងជាអត្ថប្រយោជន៍សម្រាប់យើង។ ដូច្នេះបច្ចុប្បន្នការបិទស្លាកតម្លៃទំនិញរបស់យើងជាប្រាក់រៀលមានទំហំកាន់តែធំ»។
នៅពេលទំនិញបិតតម្លៃជាប្រាក់រៀលអតិថិជនគិតថាមានតម្លៃថោក។ photo supplied
ទោះបីផ្សារទំនើបទើបចាប់ផ្តើមបិទស្លាកទំនិញរបស់ពួកគេជាប្រាក់រៀលតាមការណែនាំរបស់ធនាគារជាតិនៃកម្ពុជាក្តី ក៏ប្រតិបត្តិការលក់រាយភាគច្រើននៅតែត្រូវបានអនុវត្តដោយប្រើលុយដុល្លារ ដែលវាបានក្លាយទៅជាបទដ្ឋានមួយនៅក្នុងការធ្វើអាជីវកម្មក្នុងស្រុករួចទៅហើយ។
ប៉ុន្តែផ្សារទំនើបឡាក់គីមានផែនការធំៗក្នុងការលើកកម្ពស់ប្រាក់រៀលនៅតាមសាខារបស់ខ្លួនមិនត្រឹមតែគោរពតាមការណែនាំរបស់ធនាគារជាតិនៃកម្ពុជាប៉ុណ្ណោះទេ ប៉ុន្តែវាថែមទាំងទាក់ទាញអ្នកដើរផ្សារទំនើបជាជនជាតិខ្មែរដែលកំពុងកើនឡើងផងដែរដែលមានប្រមាណ ៨៥ ភាគរយនៃអ្នកដើរទិញអីវ៉ាន់សរុបនៅផ្សារទំនើបឡាក់គី។
លោកស្រី ហេង លើកឡើងថា គណៈគ្រប់គ្រងកំពុងពិចារណាបិទស្លាកតម្លៃទាំងអស់ជាប្រាក់រៀល បន្ទាប់ពីបានកត់សម្គាល់ឃើញពីនិន្នាការវិជ្ជមាន ប៉ុន្តែមិនអាចធ្វើបានដោយសារតែប្រព័ន្ធកុំព្យូទ័រមិនទទួលទិន្នន័យដែលមានលេខសូន្យច្រើនខ្ទង់ពេក។
ការបិតស្លាកតម្លៃជាប្រាក់រៀលមាននៅលើទំនិញគ្រប់ប្រភេទ។ photo supplied
លោកស្រីបន្ថែមថា៖ «យើងកំពុងស្វែងរកវិធីដើម្បីធ្វើការកែសម្រួល [ប្រព័ន្ធ] ដូច្នេះ នៅពេលយើងផ្លាស់ប្តូរបាន នោះយើងនឹងអាចអនុវត្តបាន។ ត្រូវការពេលវេលាប្រមាណ ២ ឆ្នាំ ដើម្បីអាចដាក់ស្លាកតម្លៃទំនិញគ្រប់ប្រភេទជាប្រាក់រៀលដោយសារយើងជាក្រុមហ៊ុនមួយដែលចង់ផ្សារភ្ជាប់ជាមួយវប្បធម៌ និងរូបិយវត្ថុជាតិ ហើយវត្តមានរបស់យើងនៅទីនេះគឺដើម្បីបម្រើសហគមន៍ក្នុងមូលដ្ឋាន។ នោះជាគោលដៅរបស់យើង»។
ផ្សារទំនើបឡាក់គីជាផ្នែកមួយនៃក្រុមហ៊ុន Dairy Farm International Group ដែលមានមូលដ្ឋាននៅទីក្រុងហុងកុង ហើយនៅកម្ពុជាឡាក់គីមានហាងចំនួន១៨ ហើយ ៤ សាខាទៀតគ្រោងនឹងបើកនៅក្នុងរយៈពេល ៨ សប្ដាហ៍ខាងមុខក្នុងនោះមានបុគ្គលិកសរុបមានចំនួន ១៣០០ នាក់។
យោងតាមលោកស្រីហេងបានឱ្យដឹងថា ក្រុមហ៊ុនកំពុងប្រតិបត្តិការនៅក្នុងប្រទេសចំនួន ៩ ហើយរូបិយវត្ថុជាតិត្រូវបានប្រើប្រាស់ទៅតាមប្រទេសនីមួយៗ។
លោកស្រីបន្ថែមថា៖ «យើងក៏ប្រតិបត្តិការនៅក្នុងប្រទេសវៀតណាមផងដែរ ហើយយើងប្រើប្រាស់ប្រាក់ដុងវៀតណាម»។
ផ្សារទំនើបឡាក់គីបានចាប់ផ្តើមប្រតិបត្តិការនៅក្នុងឆ្នាំ ១៩៩៣ ដែលរហូតមកដល់ពេលនេះការប្រើប្រាស់ប្រាក់រៀលកាន់តែទូលំទូលាយ។ ប្រភពផលិតផលស្រស់ដូចជាផ្លែឪឡឹក ត្រសក់ និងម្នាស់ គឺទិញពីកសិករក្នុងស្រុក តាមរយៈកិច្ចសន្យាជាមួយកសិករ ហើយប្រើប្រាស់ប្រាក់រៀលដើម្បីទិញកសិផលទាំងនោះ។
លោកស្រី ហេង ថ្លែងថា៖ «ប្រមាណ ៣០ ភាគរយនៃផលិតផលស្រស់របស់យើងគឺទិញជាប្រាក់រៀល។ យើងមានកិច្ចសន្យាជាមួយកសិករ ហើយពួកគាត់ចូលចិត្តលក់ដូរជាប្រាក់រៀល»៕
កសិករលក់កសិផលឲ្យផ្សារទំនើបឡាក់គីជាប្រាក់រៀល។ photo supplied
