ស្ថិត​ក្នុង​វ័យ​ជាង ៧០​ឆ្នាំ លោក ស្រី ពុង ឈីវកេក មើល​ទៅ​មាន​សុខភាព​ក្មេង​វ័យ​ជាង​អាយុ បន្ថែម​លើសពី​សុខភាព​រាងកាយ​យ៉ាង​រឹងមាំ គាត់​គឺ​ជា​បុគ្គល​ដ៏ មាន​សុខភាព​ផ្លូវ​ចិត្ត​ប្រកប​ដោយ​ថាមពល សន្តិ​និយម និង​សុទិដ្ឋិ​និយម​ចំពោះ​ខ្លួន​ឯង និង​ជា​អ្នក​អភិវឌ្ឍ​សង្គម។ ជា​បុគ្គល​ដែល​បាន​ត្រួស​ត្រាយ​ផ្លូវ​សម្រាប់​ស្ត្រី និង​ជន​កម្ពុជា​ទូទៅ​រាប់​លាន​នាក់​ឲ្យ​ចាក​ផុត​អំពី​អពមង្គល​អតីត​កាល និង​កំពុង​ព្យាយាម​រុញ​ច្រាន​អ្នក​ទាំង​នោះ​ឲ្យ​ចាក​ផុត​ពី​ភាព​ស្រអាប់​នៃ​បច្ចុប្បន្ន​កាល ដើម្បី​ឲ្យ​ពួកគេ​ទាំង​ឡាយ ធ្វើ​ដំណើរ​លើ​មាគ៌ា​ថ្មី​មួយ​ប្រកប​ដោយ​សមភេទ​រវាង​ស្ត្រី និង​បុរស និង ពលរដ្ឋ​កម្ពុជា​ទូទៅ​ទទួល​បាន​សិទ្ធិ​សេរីភាព​ពេញ​លេញ​ជា​មនុស្ស​ជាតិ​នា​សម័យ​សកល​ភាវូនីយកម្ម​ដ៏​ទូលំ​ទូលាយ​នេះ។