សេចក្តីសុខ​ជា​បំណង​ប្រាថ្នា​រួម​នៃ​សព្វ​មនុស្ស​សត្វ​ដែល​ខំប្រឹង​រស់រាល់​ជីវិត​ក្នុង​លោក​ទោះបី​ជា​របៀប​រស់​របស់​មនុស្ស​ខុសៗ​គ្នា​ក៏ដោយ​។ ខ្លះ​យល់​ថា​មាន​តែ​ប្រាក់​ទេ​ទើប​ធ្វើឲ្យ​ជីវិត​គេ​រស់​បាន​សុខ។ ខ្លះ​សប្បាយ​ភ្លើតភ្លើន​តាម​ភាព​ហ៊ឺហា​ស៊ីវិល័យ​ដូចជា​លុយ​ឡាន​ស្រី​ស្រា​ល្បែង​ជាដើម​ដ្បិត​គេ​យល់​ថា​មាន​តែ​កាមគុណ​ទាំង​នោះ​ទេ​ទើប​ជា​ប្រភព​នៃ​ក្តីសុខ។ ចំណែកឯ​មនុស្ស​ខ្លះ​ទៀត​ឧទិ្ទស​ជីវិត​ដើម្បី​បុព្វហេតុ​ជីវិត​គឺ​ធ្វើ​ការងារ​បម្រើ​មនោសញ្ចេតនា និង​ឧត្តមគតិ​របស់​គេ​ដើម្បី​ប្រយោជន៍​មនុស្ស​ជាតិ។