ក្រុងញូវយ៉ក: ការស្រាវជ្រាវថ្មីមួយ បានបង្ហាញថា ប្ដីប្រពន្ធ ឬគូស្នេហ៍ដែលធ្វើកិច្ចការផ្ទះរួមគ្នា ទទួលបាននូវសុភមង្គលជាការតបស្នង ពីព្រោះពួកគេមិនសូវឈ្លោះគ្នា និងជីវិតផ្លូវភេទល្អប្រសើរ។
ពលរដ្ឋអាមេរិកចំណាយពេលមធ្យម ៦៦៤ ម៉ោងធ្វើកិច្ចការផ្ទះក្នុងមួយឆ្នាំ ហើយស្ដ្រីចំណាយពេលប្រមាណ ១ ម៉ោងលើសបុរសចំពោះកិច្ចការផ្ទះ។ យ៉ាងណាមិញ ការចែករំលែកកិច្ចការផ្ទះស្មើគ្នាកាន់តែក្លាយជាទំនោរពេញនិយម ហើយការស្រាវជ្រាវបានបង្ហាញថា ការចែករំលែកភាពនឿយហត់ក្នុងផ្ទះធ្វើឲ្យស្ដ្រីកាត់បន្ថយអារម្មណ៍ស្ដ្រេស និងបង្កើនភាពស្រស់ថ្លាក្នុងជីវិត។
លើសពីនេះ អ្នកជំនាញផ្លូវភេទ វេជ្ជបណ្ឌិត អ៊ីយ៉ាន ខេន័រ បានណែនាំថា ការធ្វើកិច្ចការផ្ទះរួមគ្នាអាចសម្រេចលទ្ធផលឆាប់រហ័ស បង្កើនទំនាក់ទំនងល្អជាមួយដៃគូ និងបង្កើតភាពស្អិតល្មួតរឿងលើគ្រែថែមទៀត។
ក្រុមអ្នកស្រាវជ្រាវមកពី ៣ សាកលវិទ្យាល័យបានតាមដានលើគូស្នេហ៍ចែករំលែកការងារផ្ទះជាង ៦០០ គូ និងការពេញចិត្ដពេញថ្លើមរបស់ពួកគេចំពោះទំនាក់ទំនងស្នេហា និងជីវិតសិច។
ពេលដៃគូជាបុរសមូរដៃ អាវលាងចាន ភាគីនារីមានអារម្មណ៍ថាបានដៃគូយកចិត្ដទុកដាក់កាន់តែខ្លាំង ដែលប្រគល់មកវិញនូវភាពស្និទ្ធស្នាលផ្អែមល្អែម និងពោរពេញដោយចំណង់។
គូស្នេហ៍អាចធ្វើកិច្ចការផ្ទះ រួមគ្នាកាន់តែល្អូនល្អិន ជាមួយសកម្មភាពបែបរ៉ូមេនទិក។ គ្រាន់តែកិច្ចការផ្ទះជាមួយគ្នាអាចបង្កើនឱកាសកាន់តែប្រសើរនៅលើគ្រែ។ នេះបើយោងតាមវេជ្ជបណ្ឌិត ខេន័រ។
លោកបាននិយាយថា៖ «អ្វីដែលបានកើតឡើងខាងក្រៅបន្ទប់គេងក៏ជះឥទ្ធិពលដល់ក្នុងបន្ទប់គេងផងដែរ។ ដូច្នេះ បើមានអារម្មណ៍អន់ចិត្ដ ឬចែករំលែកកិច្ចការផ្ទះធ្ងន់ស្រាលខ្លាំងពេក វាក៏មិនធ្វើឲ្យអ្នកមានចំណង់ផ្លូវភេទណាស់ណាដែរ»។
វេជ្ជបណ្ឌិត បានពន្យល់ថា វាបានឆ្លុះបញ្ចាំងយ៉ាងច្បាស់ចំពោះស្ដ្រី។ ខណៈនារីម្នាក់ឈានដល់ចំណុចកំពូលនៃកាមតម្រេក ផ្នែកខ្លះនៃខួរក្បាលស្ដ្រីមានទំនាក់ទំនងជាមួយស្ដ្រេស និងជំងឺធ្លាក់ទឹកចិត្ដ ដែលចាំបាច់ត្រូវតែបំភ្លេចចោល ឬធ្វើឲ្យថយចុះនៅភាពស្មុគស្មាញ ទើបនាងអាចទទួលភាពស្រណុកស្រួល។
លោកបន្ដថា៖ «ប៉ុន្ដែបើពេលនៅលើគ្រែ នាងស្រាប់តែនឹកឃើញកិច្ចការត្រូវលាងចានប្រឡាក់មួយគំនរ វាពិតជាពិបាកក្នុងការជំរុញឲ្យខួរក្បាលរំសាយស្ដ្រេស និងបង្កើនថាមពលចំណង់ណាស់»។
ជាក់ស្ដែង ការលាងចានអាចជាឱកាសពង្រឹកទំនាក់ទំនងស្នេហា។ វាថែមទាំងអាចជាទីកន្លែងចាប់ផ្ដើមផ្ដោះផ្ដងគ្នាផងដែរ៕HR