.jpg)
ការអាំងសាច់ និងបន្លែបែបបាប៊ីឃ្យូដែលប្រើធ្យូងដ៏ពេញនិយម។
ក្រុងឡុងដ៍: ការចម្អិនដោយប្រើធ្យូងថ្ម អុស ឬធ្យូងឈើអាចធ្វើឲ្យអ្នកប្រឈមហានិភ័យស្លាប់ដោយសារជំងឺបេះដូង។
ការសិក្សាមួយបានបង្ហាញថា មនុស្សដែលប្រើប្រាស់អុស ឬធ្យូងចម្អិនអាហារអាចមានហានិភ័យនៃការស្លាប់ដោយជំងឺបេះដូង ឬជំងឺដាច់សរសៃឈាមក្នុងខួរក្បាលរហូតដល់ ១២ ភាគរយ។
ការសិក្សាស្រាវជ្រាវនេះបានបន្ថែមទៅលើការអះអាងកាលពីពេលថ្មីៗដែលថា សាច់ដែលចម្អិនដោយបាប៊ីយ្យូបញ្ចេញសារជាតិគីមីពុល ដែលពាក់ព័ន្ធទៅនឹងមហារីកស្បែក សួត និងតម្រងនោមផងដែរ។
ទោះបីជាអុស និងធ្យូងមិនសូវប្រើនៅប្រទេសលោកខាងលិចក៏ដោយ ក៏ការចម្អិនបែបនេះតែម្តងក្នុងមួយសប្តាហ៍គឺអាចមានហានិភ័យគ្រប់គ្រាន់ក្នុងការបំផ្លាញសុខភាព។ នេះបើយោងតាមការសិក្សា។
តែផលប៉ះពាល់អាចស្រាល ទៅវិញ ប្រសិនបើមនុស្សប្រើចង្ក្រានហ្គាស ឬអេឡិចត្រូនិក ក្នុងការអាំងសាច់។ អ្នកវិទ្យាសាស្ត្រពីសាកលវិទ្យាល័យ Oxford បានធ្វើការសិក្សាស្រាវជ្រាវអំពីប្រជាជននៅក្នុងប្រទេសចិន ដែលជាងពាក់កណ្តាលនៃប្រជាជនទាំងនោះបានប្រើប្រាស់អុស ឬធ្យូង ក្នុងចម្អិនអាហារប្រចាំថ្ងៃ។
អ្នកជំនាញបានរកឃើញថា ហានិភ័យនេះកើនឡើងចំនួន ៣% ជារៀងរាល់ ១០ ឆ្នាំ ហើយអ្នកដែលចម្អិនដោយដុតអុស ឬធ្យូងរយៈពេល ៣០ ឆ្នាំ ឬច្រើនជាងនេះមានហានិភ័យនៃការស្លាប់មុនអាយុចំនួន ១២ ភាគរយ។
វេជ្ជបណ្ឌិត ដេរីក ប៊េនណិត បានទទូចឲ្យអ្នកប្រើអុសធ្យូងជាប្រចាំគួរប្តូរទៅប្រើអគ្គិសនីឬហ្គាសជាបន្ទាន់៕ PS
