ក្រុងឡុងដ៍: មនុស្សសម័យនេះតែងតែយល់ឃើញថា ចង់ដឹងចរិតបុរសខូចខិល មើលតែកាបូប ឬហោប៉ៅ មានស្រោមអនាម័យឬអត់? ប៉ុន្ដែតាមពិត អ្នកមិនគួរទុកស្រោមអនាម័យក្នុងកាបូប ឬហោប៉ៅឡើយ ដោយសារតែសម្ពាធកម្លាំង និងសីតុណ្ហភាព អាចប៉ះពាល់ដល់គុណភាពស្រោម។
អ្នកឯកទេសផ្នែកវេជ្ជសាស្ដ្រ ការីន អូស៊ូលលីវ៉ាន់ មកពីអង្គការសុខភាពផ្លូវភេទ FPA បានប្រាប់ Metro.co.uk ថា៖ «កម្ដៅ សំណើម ការប៉ះទង្គិច និងពន្លឺអាចប៉ះពាល់គុណភាពស្រោមអនាម័យ និងកាត់បន្ថយប្រសិទ្ធភាពរបស់វា»។
ទាំងកាបូប និងហោប៉ៅ ជាទីតាំងផ្ទុកកម្ដៅខ្លាំងសម្រាប់ស្រោម ខណៈវាតោងភ្ជាប់នឹងរាងកាយរបស់អ្នក រួមទាំងកម្ដៅផ្សេង។ ពេលស្រោមអនាម័យទទួលកម្ដៅខ្លាំងពេក ជាតិជ័រកាន់តែថយគុណភាព និងធ្វើឲ្យងាយដាច់រហែក។
ពេលប្រើប្រាស់ អ្នកប្រាកដជាបន្ថែមកម្លាំងប៉ះពាល់កាន់តែខ្លាំង ដែលធ្វើឲ្យស្រោមកាន់តែខ្សោយគុណភាព។
ហោប៉ៅក្រោយជាប្រភពកម្លាំងកកិតយ៉ាងខ្លាំង ពេលអ្នកដើរ អង្គុយ ឬរត់ជាដើម។
កាបូបលុយ ដែលរមែងបើកបិទហូតលុយញឹកញយ នឹងបង្កការប៉ះទង្គិចច្រើន ពិសេស ពេលស្រោមប៉ះពារនឹងកាក់ ឬក្រដាសប្រាក់ជាដើម។
បើត្រៀមខ្លួនឡើងគ្រែជាមួយដៃគូណាម្នាក់ គួរស៊កសៀតស្រោមក្នុងហោប៉ៅមួយភ្លែត រួចប្រើប្រាស់វាភ្លាម។ កុំត្រៀមបម្រុងទុកយូរពេក ខ្លាចជាតិជ័រថមថយគុណភាពងាយដាច់រហែក នាំឲ្យឆ្លងជំងឺ ឬ
ក៏មានផ្ទៃពោះជាយថាហេតុ។
គួររក្សាទុកស្រោមនៅទីត្រជាក់ក្នុងបន្ទប់ ចៀសវាងពន្លឺថ្ងៃ និងឧស្សាហ៍ឆែកថ្ងៃខែកំណត់ប្រើប្រាស់ផង៕HR