ក្រុងតូក្យូ: ការស្រាវជ្រាវបានបង្ហាញថា ការទំពាអាហារប្រញិបប្រញាប់ពេកបង្កើនហាន័យឡើងគីឡូក្រឺត។
ការសិក្សាមួយលើមនុស្ស ៦ ម៉ឺននាក់ បានរកឃើញថា អ្នកដែលញ៉ាំអាហារយឺតៗបន្ទាបហានិភ័យ ៤២ ភាគរយនៃការធាត់ឡើងគីឡូជាងអ្នកទទួលទានបែបលឿន។
ការស្រាវជ្រាវដែលចុះផ្សាយក្នុងព្រឹត្តិបត្រ BMJ Open ក៏បានរកឃើញថា ការទទួលទានអាហារពេលល្ងាចយ៉ាងតិច ២ ម៉ោងមុនចូលគេងកាត់បន្ថយហានិភ័យនៃការធាត់ឡើងទម្ងន់ ប្រមាណជា ១០ ភាគរយ។
ក្រុមអ្នកជំនាញជឿថា ការញ៉ាំអាហារយឺតៗ ដោយការស្រង់ក្លិន និងរសជាតិគ្រប់ម៉ាត់ ហើយការចំណាយពេលទំពាអាហារអាចជាយុទ្ធសាស្ដ្រសម្រកទម្ងន់ជោគជ័យ។
នេះដោយសារតែវាត្រូវការពេលវេលា ប្រមាណជា ២០ នាទី សម្រាប់ឲ្យខួរក្បាលទទួលយកសារដែលក្រពះប្រាប់ថាឆ្អែតហើយ។ ដូច្នេះ អ្នកញ៉ាំលឿនៗនៅតែបន្ដទំពាអាហារទាំងមិនដឹងខ្លួន ទោះជាក្រពះបានទទួលបរិមាណគ្រប់គ្រាន់ទៅហើយក្ដី។
ក្រុមអ្នកស្រាវជ្រាវ មកពីសាកលវិទ្យាល័យ ឃ្យូស៊ូ ប្រទេសជប៉ុន បានសរសេរថា៖ «អ្នកទទួលទានលឿនអាចបន្ដទំពាអាហារទៀតរហូតដល់មានអារម្មណ៍ឆ្អែត បើទោះជាក់ស្ដែងរាងកាយបានស្រូបកាឡូរីគ្រប់គ្រាន់ក្តី។ ដូច្នេះការទទួលទានលឿនស្មើនឹងការញ៉ាំច្រើនលើសតម្រូវការ និងជាកត្តារួមចំណែកធ្វើឲ្យឡើងទម្ងន់។
ពួកគេបានឲ្យដឹងថា៖ «ផ្ទុយទៅវិញ ការញ៉ាំយឺតអាចជួយបង្កើនអារម្មណ៍ស្កប់ស្កល់ មុនពេលក្រពះប្រតិបត្ដិការកិនអាហារ»៕