ភ្នំពេញៈ រដ្ឋាភិបាលកម្ពុជានឹងស្នើសុំរដ្ឋាភិបាលចិនបង្កើនកូតានាំចូលអង្ករពីកម្ពុជាចំនួន ១០ ម៉ឺនតោនបន្ថែម ដែលធ្វើឱ្យបរិមាណកូតាឡើងដល់ចំនួន ៥០ ម៉ឺនតោនក្នុងមួយឆ្នាំ។ យោងតាមអ្នកនាំពាក្យក្រសួងពាណិជ្ជកម្ម ខណៈអ្នកប្រកបធុរកិច្ចក្នុងវិស័យស្រូវអង្ករក៏បានស្វាគមន៍ចំពោះបំណងស្នើសុំបង្កើនកូតានាំចេញនេះដែលនឹងរួមចំណែកជួយជំរុញការនាំចេញអង្កររបស់កម្ពុជា។
លោក ស៊ាង ថៃ អ្នកនាំពាក្យក្រសួងពាណិជ្ជកម្មកម្ពុជាបានប្រាប់ ភ្នំពេញ ប៉ុស្តិ៍ កាលពីថ្ងៃម្សិលមិញថា ក្រសួងកំពុងពន្លឿនការចរចាដែលគេរំពឹងថានឹងសម្រេចបាននៅចុងឆ្នាំនេះ ដោយបង្ហាញថា សមត្ថភាពកិនកែច្នៃរបស់កម្ពុជាសម្រាប់ផ្គត់ផ្គង់ទីផ្សារចិននឹងមានលើសពី ៥០ ម៉ឺនតោនក្នុង ១ ឆ្នាំ។
លោកបន្ថែមថា បច្ចុប្បន្នមានរោងម៉ាស៊ីនចំនួន ៤៤ របស់កម្ពុជាដែលទទួលស្គាល់ដោយអគ្គរដ្ឋបាលគយចិនលើសមត្ថភាព បទដ្ឋានស្តង់ដាសុវត្ថិភាពចំណី អាហាររបស់ប្រទេសចិន។
លោកថ្លែងថា៖ «កេរ្តិ៍ឈ្មោះអង្ករកម្ពុជាបាននិងកំពុងមានកិត្តិនាមល្អនៅក្នុងប្រទេសចិន ដែលជាក់ស្តែងក្រសួងពាណិជ្ជកម្មបានយកចិត្តទុកដាក់ផ្តល់អាទិភាពលើការផ្សព្វផ្សាយអង្ករកម្ពុជានៅក្នុងទីផ្សារប្រទេសចិន»។
លោក សុង សារ៉ន ប្រធានសហព័ន្ធស្រូវអង្ករកម្ពុជា (CRF) ប្រាប់ ភ្នំពេញ ប៉ុស្តិ៍ថា ប្រសិនបើ រដ្ឋាភិបាលចិនយល់ព្រមផ្តល់កូតា ១០ ម៉ឺនបន្ថែមទៀតនោះ បរិមាណនាំចេញនឹងរួមចំណែកជំរុញការនាំចេញអង្កររបស់កម្ពុជាឱ្យបាន ១ លានតោនទៅកាន់ទីផ្សារអន្តរជាតិ។
លោកថ្លែងថា៖ «យើងអាចសម្រេចបានការនាំចេញ ១ លានតោន យើងគិតជាស្រេចថាចិននឹងរួមចំណែកទីផ្សារក្នុងរង្វង់ប្រហែល ៣៥ ទៅ ៥០ ម៉ឺនតោន ក្នុង ១ ឆ្នាំ ដូច្នេះការបង្កើនការបញ្ជាទិញអង្កររបស់ចិន គឺជាការរំពឹងរបស់សហព័ន្ធស្រូវអង្ករកម្ពុជា ដែលថាការនាំចេញបាន ១ លានតោននឹងដើរទៅមុខ»។
លោក សារ៉ន បានព្យាករថា វិបត្តិដឹកជញ្ជូនដែលបង្កជាឧបសគ្គដល់ការនាំចេញដែលធ្វើឱ្យបរិមាណនាំចេញអង្ករធ្លាក់ចុះជាង ៣៣ ភាគរយក្នុងត្រីមាសទី១ នឹងធូរស្រាលមកវិញនៅក្នុងត្រីមាសទី២ ឆ្នាំនេះ។
លោកនិយាយថា៖ «យើងគិតថា វិបត្តិដឹកជញ្ជូននឹងមិនអូសបន្លាយរហូតដល់ចុងឆ្នាំ ២០២១ ទេ ដូច្នេះក្នុងខែកក្កដា និងសីហានៃត្រីមាសទី២ ការដឹកជញ្ជូននឹងមានភាពធូរស្រាល។ យើងរំពឹងថា ការនាំចេញអង្ករទៅកាន់ទីផ្សារអឺរ៉ុបនឹងងើបឡើងវិញក្នុងឆមាសទី២»។
ប្រទេសចិនបានយល់ព្រមផ្តល់កូតានាំចូលអង្ករពីកម្ពុជាកើនឡើងជាបន្តបន្ទាប់ចាប់ពី ២០ ម៉ឺនតោនក្នុងឆ្នាំ ២០១៧ ដល់ ៤០ ម៉ឺនតោននៅឆ្នាំ ២០១៩។
ក្នុងឆ្នាំ ២០១៩ សហព័ន្ធស្រូវអង្ករកម្ពុជាបានរៀបចំសិក្ខាសាលាពិគ្រោះយោបល់លើផែនការ យុទ្ធសាស្ត្រសម្រាប់ឆ្នាំ ២០២០-២០២៣ ដោយដាក់ទិសដៅនាំចេញអង្ករ ១ លានតោនត្រឹមឆ្នាំ ២០២២។
ទិន្នន័យនាំចេញអង្ករបានបង្ហាញថា ឆ្នាំ ២០២០ កម្ពុជានាំចេញអង្ករ ៦៩០ ៨២៩ តោន កើនឡើង ១១,៤០ ភាគរយធៀបឆ្នាំ ២០១៩ ដោយទីផ្សារចិនស្រូបយក ២៨៩ ៤៣៩ តោន ស្មើនឹង ៤១,៩០ ភាគរយនៃការនាំចេញអង្ករពីកម្ពុជា៕LA