ភ្នំពេញ: រដ្ឋាភិបាលបានរកចំណូលពីការប្រមូលពន្ធគយ និងពន្ធដារបានប្រមាណ ៤ ៥៦៧ លានដុល្លារ ក្នុងរយៈពេល ៩ ខែឆ្នាំ ២០១៩ នេះ។
យោងតាមរបាយការណ៍របស់អគ្គនាយកដ្ឋានពន្ធដារដែលបានចេញផ្សាយកាលពីថ្ងៃពុធបង្ហាញថា អគ្គនាយកដ្ឋានពន្ធដារប្រមូលពន្ធអាករគ្រប់ប្រភេទបាន ២ ១៨៣ លានដុល្លារ ខណៈលោកនាយករដ្ឋមន្ត្រីបានប្រកាសថា ការប្រមូលពន្ធគយក្នុងរយៈពេលនេះមានចំនួន ២ ៣៨៤ លានដុល្លារអាមេរិក។
យោងតាមសេចក្តីប្រកាសព័ត៌មានអគ្គនាយកដ្ឋានពន្ធដារការប្រមូលពន្ធអាករគ្រប់ប្រភេទរបស់អគ្គនាយកដ្ឋានក្នុងរយៈពេល ៩ ខែ ឆ្នាំ ២០១៩ នេះបានកើនឡើងជិត៣០ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨ ដែលមានជាង ១ ៦៩០ លានដុល្លារ។
លោកនាយករដ្ឋមន្ត្រី ហ៊ុន សែន កាលពីថ្ងៃពុធបានឲ្យដឹងថា គិតត្រឹមខែកញ្ញា ឆ្នាំនេះរដ្ឋាភិបាលប្រមូលចំណូលពីពន្ធគយសរុប ២ ៣៨៤ លានដុល្លារ។ លោកនាយករដ្ឋមន្ត្រីរំពឹងថា ចំណូលពន្ធគយនឹងទទួលបានលើសផែនការកំណត់ប្រមាណ ៨០០ លានដុល្លារ នៅឆ្នាំនេះ។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា វិស័យសំណង់ និងកំណើនអ្នកវិនិយោគនៅប្រទេសកម្ពុជាបានរួមចំណែកជួយឲ្យមានកំណើនប្រាក់ចំណូលនៅក្នុងវិស័យពន្ធដារ។ លោកថ្លែងថា៖ «ផ្នែកសំណង់ប្រមូលបានច្រើន ព្រោះសំណង់រីកដុះដាលច្រើន ហើយការប្រមូលពន្ធពីផ្នែកអាជីវកម្ម និងការវិនិយោគក៏ច្រើន ធ្វើឲ្យមានកំណើន ដូច្នេះវាឆ្លុះបញ្ចាំងពីសេដ្ឋកិច្ចយើងវាដើរជាងមុន»។
លោកបានបន្ថែមថា ការកែទម្រង់ក្នុងវិស័យពន្ធដារក៏ជាផ្នែកមួយជួយឲ្យមានកំណើនផងដែរ។ លោកបន្តថា៖ «កន្លងមកការនាំចេញនាំចូលទំនិញមានការលំបាក តែពេលនេះមានការកាត់បន្ថយច្រើនដូចជាការស្នើសុំនាំចេញ-ចូល យើងអាចសុំតាមប្រព័ន្ធអនឡាញបាន»។
លោកបានបន្តថា ទោះបីបែបនេះក្តីអាជ្ញាធរត្រូវរឹតបន្តឹងបន្ថែមទៀតក្នុងការបង្ក្រាបលើការគេចពន្ធ ខុសច្បាប់ដែលធ្វើឲ្យបាត់បង់ចំណូលពន្ធមួយផ្នែកពីវិស័យនេះ។
ទោះយ៉ាងនេះក្តីយោងតាមឯកសារសិក្សាស្រាវជ្រាវរបស់មូលនិធិរូបិយវត្ថុអន្តរជាតិ (IMF) ដែលបានចេញផ្សាយកាលពីខែមុន ការប្រមូលចំណូលពន្ធនៅក្នុងវិស័យអចលនទ្រព្យនៅកម្ពុជានៅមានអត្រាទាបបើធៀបនឹងបណ្តាប្រទេសក្នុងតំបន់ដែលមានត្រឹមតែ ០,១ ភាគរយប៉ុណ្ណោះ នៃផលិតផលក្នុងស្រុកសរុប។
រដ្ឋាភិបាលកាលពីឆ្នាំ ២០១៨ ទទួលបានប្រាក់ចំណូលពន្ធចុះបញ្ជី ៩៧ លានដុល្លារ ពីការផ្ទេរសិទ្ធិកាន់កាប់ និងសិទ្ធិអចលនទ្រព្យនៅក្នុងទីក្រុងភ្នំពេញ។ នេះបើតាមទិន្នន័យពីអគ្គនាយកដ្ឋានពន្ធដារបង្ហាញនាពេលកន្លងមក។
លោក គង់ វិបុល អគ្គនាយកនៃអគ្គនាយកដ្ឋានពន្ធដារបានឲ្យដឹងនៅក្នុងសេចក្តីប្រកាសព័ត៌មានថា កត្តាសំខាន់ដែលនាំឲ្យចំណូលមានការកើនឡើងក្នុងរយៈពេលកន្លងមកនេះគឺការខិតខំប្រឹងប្រែងអនុវត្តតាមយុទ្ធសាស្ត្រចតុកោណ និងយុទ្ធសាស្ត្រកៀរគរចំណូលរបស់រដ្ឋាភិបាលដែលផ្តោតសំខាន់លើការពង្រឹងការធ្វើកំណែទម្រង់រដ្ឋបាលសារពើពន្ធ។
លោកថ្លែងថា៖ «ការធ្វើទំនើបកម្មរដ្ឋបាលសារពើពន្ធលើមុខងារស្នូល និងគាំទ្ររបស់អគ្គនាយកដ្ឋានពន្ធដារដូចជាការដាក់ប្រព័ន្ធ E-VAT ការពង្រឹងការចុះបញ្ជីពន្ធដារ ការពង្រឹងការធ្វើសវនកម្ម ការរៀបចំកម្មវិធីសវនកម្មតាមប្រព័ន្ធបច្ចេកវិទ្យាព័ត៌មាន ការផ្សព្វផ្សាយវប្បធម៌បង់ពន្ធដល់អ្នកជាប់ពន្ធ ការពង្រឹងធនធានមនុស្ស ហើយនិងកំពុងអនុវត្តយ៉ាងម៉ឺងម៉ាត់វិធានការក្នុងការគ្រប់គ្រងប្រមូលបំណុលពន្ធដារផងដែរ»។
ឯកសារសិក្សាស្រាវជ្រាវរបស់ IMF បង្ហាញថាការកៀរគរប្រាក់ចំណូលរបស់កម្ពុជាបានកើនឡើងគួរឲ្យកត់សម្គាល់ក្នុងរយៈពេលប៉ុន្មានឆ្នាំថ្មីៗនេះ។ ការសិក្សាបង្ហាញថាកាលពីឆ្នាំ ២០១៧ ប្រាក់ចំណូលពន្ធមានចំនួនតិចជាង ១០ ភាគរយ នៃ GDP ខណៈកាលពីឆ្នាំ ២០១៧ បានកើនឡើងដល់ប្រហែល ១៧ ភាគរយ ដែលស្ថិតក្នុងកម្រិតខ្ពស់បំផុតនៅក្នុងអាស៊ាន៕ LA