.jpg)
លោក ប្រាក់ សុខុន ប្រជុំជាមួយរដ្ឋមន្ត្រីក្រសួងការបរទេសទីម័រខាងកើតតាមអនឡាញ។ ក្រសួងការបរទេស
ភ្នំពេញៈ កម្ពុជា និងទីម័រខាងកើតបានបេ្តជ្ញាជំរុញសកម្មភាពពាណិជ្ជកម្ម និងវិនិយោគរួមគ្នាឱ្យបានកាន់តែច្រើនបន្ថែមទៀត ដើម្បីបង្កើនទំហំពាណិជ្ជកម្មទ្វេភាគីឱ្យបានកាន់តែច្រើន។
ការប្តេជ្ញានេះត្រូវបានធ្វើឡើងក្នុងកិច្ចប្រជុំរវាងលោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជាជាមួយលោកស្រី Adaljiza Albertina Xavier Reis Magno រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិទីម័រខាងកើតតាមរយៈវីដេអូអនឡាញកាលពីថ្ងៃទី ២៥ ខែកុម្ភៈ។ នេះបើតាមសេចក្តីប្រកាសព័ត៌មានរបស់ក្រសួងការបរទេសកាលពីថ្ងៃសុក្រសប្តាហ៍មុន។
លោក សុខុន បានថ្លែងក្នុងសេចក្តីប្រកាសព័ត៌មាននេះថា ភាគីទាំង ២ បានពិភាក្សាគ្នាពីបញ្ហាទ្វេភាគីទាំងក្នុងតំបន់ និងអន្តរជាតិដែលជាប្រយោជន៍រួមដោយឯកភាពគ្នាថា នឹងពង្រឹង និងពង្រីកកិច្ចសហប្រតិបត្តិការទ្វេភាគីលើវិស័យពាណិជ្ជកម្ម វិនិយោគ ទេសចរណ៍ ការអប់រំ និងអភិវឌ្ឍធនធានមនុស្ស។
លោក សុខុន បានឱ្យដឹងថា៖ «រដ្ឋមន្ត្រីការបរទេសទាំង ២ កត់សម្គាល់ថា ទំហំពាណិជ្ជកម្មទ្វេភាគីរវាងប្រទេសទាំង ២ នៅមានកម្រិតទាបនៅឡើយ និងបានឯកភាពជំរុញឱ្យភាគីពាក់ព័ន្ធទាំង ២ ពិនិត្យលទ្ធភាពនៃការបង្កើនសកម្មភាពសេដ្ឋកិច្ច និងពាណិជ្ជកម្មទ្វេភាគីតាមរយៈការអនុវត្តកិច្ចព្រមព្រៀងស្តីពីកិច្ចសហប្រតិបត្តិការរវាងសភាពាណិជ្ជកម្មនៃប្រទេសទាំង ២ ដែលមានស្រាប់»។
ទំហំពាណិជ្ជកម្មកម្ពុជា និងប្រទេសទីម័រខាងកើត មានប្រមាណ ៣០ ម៉ឺនដុល្លារក្នុង ១ ឆ្នាំៗ។ នេះបើតាមលោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិប្រាប់បណ្តាញព័ត៌មាន FreshNews។
ប្រទេសកម្ពុជាបាននាំចេញទំនិញមានតម្លៃ ២១២ ៨៨០ ដុល្លារទៅកាន់ទីផ្សារទីម័រខាងកើតកាលពីឆ្នាំ ២០១៨ ហើយកម្ពុជាបាននាំចូលទំនិញវិញក្នុងតម្លៃ ៥ ៣០០ ដុល្លារ។ នេះបើតាមសេចក្តីរាយការណ៍របស់ Trading Economics ដកស្រង់ទិន្នន័យពីអង្គការសហប្រជាជាតិនៃពាណិជ្ជកម្មអន្តរជាតិ។
សេចក្តីប្រកាសព័ត៌មាននេះបានឱ្យដឹងទៀតថា រដ្ឋមន្ត្រីការបរទេសទាំង ២ បានលើកទឹកចិត្តដល់អាជ្ញាធរពាក់ព័ន្ធនៃភាគីទាំង ២ ឱ្យពន្លឿនការចរចាលើអនុស្សរណៈយោគយល់គ្នាចំនួន ៣ ដូចជា កិច្ចសហប្រតិបត្តិការវិស័យទេសចរណ៍ កិច្ចសហប្រតិបត្តិការទូទៅ វិស័យពាណិជ្ជកម្ម និងកិច្ចសហប្រតិបត្តិការបច្ចេកទេសនៃមជ្ឈមណ្ឌលដឹកជញ្ជូនជាតិ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជាបានឱ្យដឹងក្នុងជំនួបជាមួយលោក Ermenegildo Kupa Lopes កាលពីខែមិថុនា ឆ្នាំ ២០២០ ថា កម្ពុជាបានត្រៀមអង្កររួចរាល់ហើយចំនួន ៣០ ០០០ តោន សម្រាប់នាំចេញទៅប្រទេសទីម័រខាងកើត។
កាលពីឆ្នាំមុន ទីម័រខាងកើតបានស្នើទិញអង្ករពីកម្ពុជាដើម្បីទប់ស្កាត់ការខ្វះខាតស្បៀងដោយសារជំងឺកូវីដ១៩ ប៉ុន្តែមិនបានបញ្ជាក់ពីបរិមាណទេ។
ក្នុងឆ្នាំ ២០២០ កម្ពុជាបាននាំចេញអង្ករ ៦៩០ ៨២៩ តោន ទៅទីផ្សារអន្តរជាតិដោយមានតម្លៃជិត ៥៣៩ លានដុល្លារ កើន ១១,៤០ ភាគរយធៀបនឹងឆ្នាំ ២០១៩ ។ នេះតាមទិន្នន័យក្រសួងកសិកម្ម។ ប្រទេសចំនួន ៦ នៅក្នុងតំបន់អាស៊ានបាននាំអង្ករពីកម្ពុជា ៨៦ ៨៩៩ តោន ដែលស្មើនឹង ១២,៥៨ ភាគរយនៃការនាំចេញសរុប៕ LA
