.jpg)
លោក លឹម ហេង អនុប្រធានសភាពាណិជ្ជកម្មកម្ពុជា នាពេលកន្លងមក។ រូបថត CCC
ភ្នំពេញ: កម្ពុជា និងឥណ្ឌូនេស៊ីសម្រេចបានកិច្ចព្រមព្រៀងស្តីពីការចៀសវាងការយកពន្ធត្រួតគ្នារវាងប្រទេសទាំង ២ ដែលជាការការពារពាណិជ្ជកររបស់ប្រទេសនីមួយៗពីការដកពន្ធត្រួតគ្នា និងចាប់អនុវត្តចាប់ពីថ្ងៃទី ១ ខែ មករា ឆ្នាំ ២០២១ តទៅដោយសង្ឃឹមថា វានឹងជំរុញការវិនិយោគទ្វេភាគីបន្ថែមទៀត។
សេចក្តីប្រកាសព័ត៌មានរបស់អគ្គនាយកដ្ឋានពន្ធដារកម្ពុជាស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូលរវាងកម្ពុជា និងឥណ្ឌូនេស៊ីដែលចេញផ្សាយកាលពីថ្ងៃអង្គារ បានឱ្យដឹងថា កាលពីថ្មីៗនេះរដ្ឋាភិបាលនៃសាធារណរដ្ឋឥណ្ឌូនេស៊ីបានជូនដំណឹងជាផ្លូវការមករដ្ឋាភិបាលកម្ពុជាពីការបញ្ចប់សព្វគ្រប់នៃនីតិវិធីផ្ទៃក្នុងរបស់ខ្លួនដែលនាំឱ្យកិច្ចព្រមព្រៀងនេះចូលជាធរមាន។
សេចក្តីប្រកាសព័ត៌មានបន្តថា ដោយអនុលោមតាមមាត្រា ២៩ ស្តីពីការចូលជាធរមាននៃកិច្ចព្រមព្រៀងភាគីទាំង ២ នឹងជូនដំណឹងជាផ្លូវការទៅវិញទៅមកស្តីពីការបញ្ចប់សព្វគ្រប់នូវនីតិវិធីផ្ទៃក្នុងរបស់ប្រទេសរៀងៗខ្លួន ដែលនាំឱ្យកិច្ចព្រមព្រៀងនេះចូលធរមាន និងមានប្រសិទ្ធភាពអនុវត្តចាប់ពីថ្ងៃទី ១ ខែ មករា ឆ្នាំ ២០២១ តទៅ។
មន្ត្រីនៃនាយកដ្ឋាននីតិកម្មគោលនយោបាយសារពើពន្ធ និងសហប្រតិបត្តិការពន្ធដារអន្តរជាតិនៃអគ្គនាយកដ្ឋានពន្ធដារដែលស្នើសុំមិនបញ្ចេញឈ្មោះបានប្រាប់ភ្នំពេញប៉ុស្តិ៍ថា តាមរយៈកិច្ចព្រមព្រៀងនេះនឹងជួយជំរុញការធ្វើពាណិជ្ជកម្មរវាងប្រទេសទាំង ២ ឱ្យកាន់តែមានភាពល្អប្រសើរឡើងថែមទៀត។
លោកថ្លែងថា៖ «កិច្ចព្រមព្រៀងនេះនឹងជួយសម្រួលដល់កិច្ចការវិនិយោគរវាងប្រទេសទាំង ២ ហើយវាក៏នឹងជួយជំរុញការវិនិយោគរបស់ប្រទេសនេះមកកម្ពុជាផងដែរ»។
លោក លឹម ហេង អនុប្រធានសភាពាណិជ្ជកម្មកម្ពុជា (CCC) បាននិយាយថា កិច្ចព្រមព្រៀងនេះធ្វើឡើងដើម្បីការពារក្រុមវិនិយោគិនមិនឱ្យដកពន្ធទ្វេដង ហើយកិច្ចព្រមព្រៀងនេះនឹងអនុញ្ញាតឱ្យមានការបង់ពន្ធលើប្រាក់ចំណូលនៅទីកន្លែងណាដែលបុគ្គល ឬក្រុមហ៊ុនបង្កើតប្រាក់ចំណេញ។
លោកបន្តថា ការបង់ពន្ធច្រើនហួសនៅប្រទេសកំណើតរបស់អ្នកជាប់ពន្ធនឹងត្រូវបានកាត់បន្ថយក្នុងរូបភាពជាការលើកលែង ឬឥណទានពន្ធ។
លោកថ្លែងថា៖ «កិច្ចព្រមព្រៀងនេះនឹងផ្តល់ផលប្រយោជន៍ឱ្យប្រតិបត្តិករឥណ្ឌូនេស៊ីមិនបាច់បង់ពន្ធលើប្រាក់ចំណេញត្រួតគ្នា ហើយវាក៏នឹងជួយជំរុញការធ្វើពាណិជ្ជកម្មទ្វេភាគីផងដែរ»។
ទិន្នន័យពីក្រសួងពាណិជ្ជកម្មបង្ហាញថា ទំហំពាណិជ្ជកម្មទ្វេភាគីរវាងកម្ពុជា និងឥណ្ឌូនេស៊ីបានកើនឡើងដល់កម្រិតខ្ពស់បំផុតដល់ជាង ៧៩២ លានដុល្លារ កាលពីឆ្នាំមុនកើនឡើង ៤៥,៧៥ ភាគរយ ធៀបនឹងឆ្នាំ ២០១៨ មានតម្លៃ ៥៤៣ លានដុល្លារ។ តម្លៃនាំចេញពីកម្ពុជាប្រហែល ២២,៣២ លានដុល្លារ កាលពីឆ្នាំមុន កើនឡើង ៣,៩៦ ភាគរយ ធៀបនឹង ២០១៨ ខណៈការនាំចូលមានតម្លៃ ៧៧០ លានដុល្លារ កើនឡើង ៤៧,៤៦ ភាគរយ៕ LA
