.jpg)
យន្តហោះដែលប្រតិបត្តិការដោយក្រុមហ៊ុនអាកាសចរណ៍ ANA របស់ជប៉ុននៅព្រលាន Haneda ក្នុងទីក្រុងតូក្យូ។ រូបថត AFP
ភ្នំពេញៈ កម្ពុជាស្នើជប៉ុនឲ្យបង្កើនការតភ្ជាប់ជើងហោះហើរត្រង់បន្ថែមទៀតពីតាមបណ្តាទីក្រុង និងខេត្តរបស់ប្រទេស ជប៉ុន មកកាន់រាជធានីភ្នំពេញ និងខេត្តសៀមរាប ដើម្បីរួមចំណែកក្នុងការបង្កើនកិច្ចសហប្រតិបត្តិការ និងចំនួនភ្ញៀវទេសចររវាងប្រទេសទាំង ២។
ក្នុងឱកាសចូលរួមបើកពិព័រណ៍ទេសចរណ៍ជប៉ុន (Japan Travel Fair) លើកទី ៣ នៅផ្សារ Aeon សែនសុខកាលពីថ្ងៃសៅរ៍ចុងសប្តាហ៍មុនលោក ថោង ខុន រដ្ឋមន្ត្រីក្រសួងទេសចរណ៍បានលើកពីក្តីបំណងរបស់លោកក្នុងការចង់ឲ្យមានការតភ្ជាប់ជើងហោះហើរត្រង់ពីទីក្រុងផ្សេងៗទៀតរបស់ប្រទេស ជប៉ុន មកកាន់រាជធានីភ្នំពេញ ពិសេសមកកាន់ខេត្តសៀមរាបដែលជាតំបន់ទេសចរណ៍ប្រវត្តិសាស្ត្រដែលទទួលបានការចាប់អារម្មណ៍ច្រើនពីសំណាក់ភ្ញៀវទេសចរជប៉ុន។
លោកបន្តថា ភ្ញៀវទេសចរជប៉ុននៅតែជាប្រភពទីផ្សារមួយដ៏សំខាន់សម្រាប់វិស័យទេសចរណ៍កម្ពុជា ដោយចំនួនភ្ញៀវទេសចរជប៉ុនមកកម្ពុជាឈរនៅលំដាប់លេខ ៧ ក្នុងចំណោមទីផ្សារធំទាំង ១០ របស់កម្ពុជាដែលក្នុងនោះភ្ញៀវទេសចរជនជាតិចិនមានចំនួនច្រើនជាងគេ។
លោកថ្លែងថា៖ «ការតភ្ជាប់ជើងហោះហើរត្រង់ប្រចាំថ្ងៃរវាងទីក្រុងតូក្យូភ្នំពេញ-តូក្យូ ដោយក្រុមហ៊ុន ANA បានដំណើរការដោយជោគជ័យអស់រយៈពេលប្រមាណ ៣ ឆ្នាំមកនេះមិនត្រឹមតែផ្តល់នូវជម្រើសដ៏ល្អ និងកាន់តែងាយស្រួលសម្រាប់ភ្ញៀវទេសចរជប៉ុន និងប្រជាជនកម្ពុជាប៉ុណ្ណោះទេ ប៉ុន្តែថែមទាំងចូលរួមពង្រឹងដល់ទំនាក់ទំនងរវាងប្រជាជនទាំង ២ ឱ្យកាន់តែជិតស្និទ្ធថែមទៀតផង»។
លោកបន្តថា តាមរយៈការបង្កើនការហោះហើរត្រង់នេះវាក៏នឹងជួយបង្កើនភាពទាក់ទាញភ្ញៀវទេសចរពីប្រទេសទី ៣ បានច្រើនផងដែរ។
បើតាមលោក ថោង ខុន ការសម្រេចបានកំណើនជាបន្តបន្ទាប់ ពិសេសភ្ញៀវទេសចរជប៉ុនគឺដោយសារកម្ពុជាមានការអនុវត្តគោលនយោបាយបើកចំហជើងមេឃ និងការសម្រួលការធ្វើដំណើរជាច្រើន ពិសេសសម្រាប់ជប៉ុនមានដូចជាការផ្តល់ទិដ្ឋាការនៅពេលមកដល់ (On Arrival) ទិដ្ឋាការអេឡិចត្រូនិក (E-Visa) ទិដ្ឋាការ Multiple Visa ជាដើម។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាបានប្រាប់ភ្នំពេញប៉ុស្តិ៍កាលពីម្សិលមិញថា ការតភ្ជាប់ជើងហោះហើរត្រង់នឹងផ្តល់ភាពវិជ្ជមានកាន់តែច្រើនដល់វិស័យទេសចរណ៍ ព្រោះការហោះហើរត្រង់នេះមិនត្រឹមតែអាចទាក់ទាញភ្ញៀវទេសចររវាងប្រទេសទាំង ២ នោះទេ តែវាថែមទាំងអាចនាំយកភ្ញៀវទេសចរពីប្រទេសទី ៣ មកបន្ថែមទៀតផង។
លោកមានប្រសាសន៍ថា៖ «ក្នុងនាមវិស័យទេសចរណ៍ យើងពិតជាស្វាគមន៍ខ្លាំង ព្រោះតាមរយៈនេះវាមិនត្រឹមតែអាចជួយបង្កើនចំនួនភ្ញៀវទេសចរជប៉ុនមកកម្ពុជាប៉ុណ្ណោះទេ តែនឹងបង្កភាពងាយស្រួលដល់ប្រជាជនខ្មែរ ដែលចង់ធ្វើដំណើរទៅជប៉ុនឲ្យមានកំណើនផងដែរ»។
លោកប្រាប់ទៀតថា បច្ចុប្បន្នកម្ពុជាមានសក្តានុពលគ្រប់គ្រាន់ក្នុងការទទួលភ្ញៀវទេសចរពីប្រទេសជប៉ុន។
ទោះយ៉ាងណាលោក ស៊ីណាន ក៏ជំរុញឲ្យកម្ពុជាបង្កើនកន្លែងទេសចរណ៍ថ្មីៗឲ្យបានកាន់តែច្រើនបន្ថែមទៀត ខណៈកន្លងមកភ្ញៀវជប៉ុន ភាគច្រើនចូលចិត្តមកទស្សនាតែតំបន់ប្រវត្តិសាស្ត្រកម្ពុជាក្នុងខេត្តសៀមរាបតែប៉ុណ្ណោះ។
បើតាមលោក ស៊ីណាន ភ្ញៀវទេសចរជប៉ុនគឺជាភ្ញៀវដែលកម្ពុជាប្រាថ្នាចង់បាន ខណៈការស្នាក់នៅជាមធ្យមរបស់ពួកគេមានរយៈពេលលើសពី ៣ ថ្ងៃ។
ចាប់តាំងពីខែកញ្ញា ឆ្នាំ ២០១៦ មក កម្ពុជា និងជប៉ុនបានភ្ជាប់ជើងហោះហើរត្រង់ប្រចាំថ្ងៃជាមួយគ្នាដែលចេញពីរវាងទីក្រុងតូក្យូ-ភ្នំពេញ ដោយក្រុមហ៊ុន ANA។
របាយការណ៍ក្រសួងទេសចរណ៍បានបង្ហាញថា ក្នុងរយៈពេល ៩ ខែ ឆ្នាំ ២០១៩ ភ្ញៀវទេសចរជប៉ុនដែលធ្វើដំណើរមកកម្ពុជាមានចំនួន ១៤៩ ៤៧០ នាក់កើនឡើង ២,៨ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨។ នៅឆ្នាំ ២០១៨ កម្ពុជាទទួលបានភ្ញៀវទេសចរជប៉ុនជាង ២១ ម៉ឺននាក់ កើនឡើង ៣,៥ ភាគរយ បើធៀបនឹងឆ្នាំ ២០១៧ ខណៈភ្ញៀវទេសចរកម្ពុជាទៅប្រទេសជប៉ុនមានប្រហែល ២ ម៉ឺននាក់។
ទិន្នន័យពីក្រសួងទេសចរណ៍បានឲ្យដឹងថា បច្ចុប្បន្នកម្ពុជាទទួលបានជើងហោះហើរអន្តជាតិពីគោលដៅចំនួន ៨៦ ក្នុងប្រទេសចំនួន ១២។ ជាមធ្យមក្នុង ១ សប្តាហ៍ អាកាសយានដ្ឋានអន្តរជាតិភ្នំពេញទទួលបានជើងហោះហើរអន្តរជាតិចំនួន ៤១៤ ជើង អាកាសយានដ្ឋានអន្តរជាតិសៀមរាបមានចំនួន ៣៤៩ ជើង និងខេត្តព្រះសីហនុមាន ៦៧ ជើង៕ LA
