.jpg)
កម្មករជាង ៣ ០០០ នាក់ ធ្វើបាតុកម្មដើម្បីទាមទារប្រាក់ឈ្នួល អត្ថប្រយោជន៍ និងការការពារការងារដោយស្មើភាពសម្រាប់សមាជិកសហជីព។
ក្រុងដេត្រូយៈ កម្មករជាង ៣ ៦០០ នាក់ដែលជាសមាជិករបស់សហជីពកម្មករ United Auto Workers (UAW) បានធ្វើបាតុកម្មកាលពីថ្ងៃអាទិត្យប្រឆាំងនឹងក្រុមហ៊ុន Mack Truck ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនផលិតរថយន្ត AB Volvo របស់ប្រទេសស៊ុយអែត ខណៈដែលបាតុកម្មរបស់សហជីពនេះប្រឆាំងនឹងក្រុមហ៊ុនផលិតរថយន្តអាមេរិក General Motors បន្តធ្វើឡើង។
ការធ្វើបាតុកម្មថ្មីនេះបានប៉ះពាល់ដល់រោងចក្ររបស់ក្រុមហ៊ុន Mack Truck នៅរដ្ឋ Pennsylvania រដ្ឋ Maryland និងរដ្ឋ Florida។ សហជីពកម្មករនេះឲ្យដឹងថា វាជាការក្រោកឈរឡើងដើម្បីទាមទារប្រាក់ឈ្នួល អត្ថប្រយោជន៍ និងការការពារការងារដោយស្មើភាពសម្រាប់សមាជិកសហជីព។
លោក Ray Curry លេខាធិការ និងហេរញ្ញិកនៃសហជីព UAW បានថ្លែងថា៖ «សមាជិក UAW ងើបពីដំណេករៀងរាល់ថ្ងៃប្រឹងប្រែងធ្វើការជាច្រើនម៉ោងរាប់ចាប់ពីការរចនារហូតដល់ផលិតរថយន្តដឹក Mack»។
លោកបានមានប្រសាសន៍ថា៖ «សមាជិកសហជីព UAW រែកប្រាក់ចំណេញរបស់ក្រុមហ៊ុន Mack ហើយពួកគេគ្រាន់តែស្នើសុំសេចក្តីថ្លៃថ្នូរ ប្រាក់ឈ្នួលស្មើភាព និងការការពារការងារ»។
មន្ត្រីប្រតិបត្តិរបស់ក្រុមហ៊ុន Mack Truck ឲ្យដឹងថា ពួកគេមានការខកចិត្ត ដោយសារសេចក្តីសម្រេចរបស់សហជីពក្នុងការដើរចេញពីការងារ។
សហជីព UAW បានចាប់ផ្តើមធ្វើបាតុកម្មប្រឆាំងក្រុមហ៊ុន General Motors កាលពីថ្ងៃទី ១៦ ខែកញ្ញា ដោយបង្កឲ្យសមាជិកសហជីពនេះចំនួន ៤៨ ០០០ នាក់ផ្អាកការងារ។
បាតុកម្មនេះបន្តធ្វើឡើង ខណៈដែលភាគីទាំង ២ ដោះដូរសំណើកិច្ចសន្យាក្នុងគោលបំណងដោះស្រាយជម្លោះនេះ៕ KC
