.jpg)
អតិថិជនដើរទិញអីវ៉ាន់នៅផ្សារទំនើប អ៊ីអន ម៉ល សែនសុខ កន្លងមក។ ហុង មិនា
ភ្នំពេញៈ ជាមួយនឹងក្តីបារម្ភថា ប្រជាជនកម្ពុជាកំពុងធ្លាក់ចូលក្នុងបំណុលកាន់តែជ្រៅ ដោយសារតែកម្រិតបំណុលធៀបនឹងផលិតផលក្នុងស្រុកសរុប (GDP) កាន់តែខ្ពស់ អ្នកនៅក្នុងឧស្សាហកម្មនេះ និងអ្នកជំនាញហិរញ្ញវត្ថុបានឲ្យដឹងថា កម្រិតបំណុលបច្ចុប្បន្នរបស់ប្រជាជនកម្ពុជា ស្របគ្នាទៅនឹងកំណើនសេដ្ឋកិច្ច។
លោក អ៊ិន ចាន់នី ប្រធានអគ្គនាយកប្រតិបត្តិធនាគារអេស៊ីលីដា ប្រាប់ភ្នំពេញប៉ុស្តិ៍កាលពីថ្ងៃម្សិលមិញថា នៅពេលដែលឥណទានវិនិយោគកាន់តែធំវាជាសញ្ញាល្អសម្រាប់ដំណើរការសេដ្ឋកិច្ច។
លោកបន្តថា ទំហំឥណទានក្នុងស្រុករបស់កម្ពុជានៅមានអត្រាទាបនៅឡើយបើធៀបនឹងបណ្តាប្រទេសផ្សេងទៀតក្នុងតំបន់។ លោកថ្លែងថា៖ «ប្រទេស ជប៉ុន មានទំហំឥណទានប្រមាណ ២០០ ភាគរយ បើធៀបទៅនឹងទំហំ GDP»។
តាមលោក អ៊ិន ចាន់នី គិតត្រឹមចុងឆ្នាំ ២០១៨ អត្រាបំណុល របស់ប្រជាជនខ្មែរមានប្រមាណ ៩០ ភាគរយ នៃ GDP ប៉ុណ្ណោះ។ លោកបន្តថា ជាធម្មតាបំណុលមាន ២ ប្រភេទ គឺឥណទានយកទៅប្រើប្រាស់ធម្មតា (Consumer Loans) និងឥណទានសម្រាប់ជាការវិនិយោគ (Productive Loans)។
លោកថ្លែងថា៖ «ឥណទាននៅកម្ពុជាភាគច្រើនបំផុតជាឥណទានសម្រាប់ការវិនិយោគ ដើម្បីបង្កើតមុខរបរថ្មី និងពង្រីកមុខរបរ។ នេះជាឥណទានល្អ ដែលនាំមកនូវផលប្រយោជន៍ច្រើនសម្រាប់កំណើនសេដ្ឋកិច្ច»។
របាយការណ៍ចុងក្រោយបំផុតបានពីការិយាល័យឥណទានកម្ពុជា (CBC) បានឲ្យដឹងថា តុល្យភាពបំណុលសរុប នៃឥណទានប្រើប្រាស់នៅក្នុងប្រទេស កម្ពុជា បានកើនឡើងដល់ ៦,៧ ពាន់លានដុល្លារ នៅត្រឹមចុងខែមីនា កើនឡើង ៧,៤ ភាគរយ ធៀបនឹងចុងខែធ្នូ។
CBC បានឲ្យដឹងថា ប្រជាជនកម្ពុជាប្រហែល ១,១៤ លាននាក់ បានដាក់ពាក្យសុំឥណទានប្រើប្រាស់កាលគិតត្រឹមចុងខែមីនា កើនឡើង ៥,៣ ភាគរយ ធៀបនឹងចុងខែធ្នូ។
លោក ង៉ែត ជូ ទីប្រឹក្សាជាន់ខ្ពស់នៅក្រុមហ៊ុន Emerging Markets Consulting និងជាអ្នកជំនាញខាងហិរញ្ញវត្ថុ បានយល់ស្របនឹងការលើកឡើងរបស់លោក ចាន់នី ខណៈតម្រូវឲ្យមានការប្រុងប្រយ័ត្នផងដែរ។
លោកបានថ្លែងថា៖ «កំណើនឥណទានក្នុងស្រុកគឺជារឿងល្អ តែក៏ទាមទារឲ្យមានការប្រុងប្រយ័ត្នបន្ថែមទៅលើគុណភាពផងដែរ»។ លោកបន្តថា៖ «ប្រសិនបើយើងរក្សាគុណភាពបានល្អទៅមុខនោះ វានឹងមិនមានបញ្ហាអ្វីទេ»។
ឥណទានដែលកំពុងមានកំណើនខ្ពស់នៅកម្ពុជា គឺក្នុងផ្នែកវិស័យអចលនទ្រព្យ និងសំណង់។ នេះបើតាមលោក ង៉ែត ជូ។
របាយការណ៍ធនាគារជាតិនៃកម្ពុជា (NBC) ឆ្នាំ ២០១៨ បានបញ្ជាក់ថា ការផ្តល់កម្ចីក្នុងឧស្សាហកម្មហិរញ្ញវត្ថុកម្ពុជារួមបញ្ចូលគ្នាទាំងធនាគារ និងគ្រឹះស្ថានមីក្រូហិរញ្ញវត្ថុ បានកើនឡើង ១៩ ភាគរយ ដល់ ២៤,៥ ពាន់លានដុល្លារ ត្រឹមចុងឆ្នាំ ២០១៨ ក្នុងនោះកម្ចីពីគ្រឹះស្ថានធនាគារ មានចំនួន ១៩,៤ ពាន់លានដុល្លារ កើនឡើង ២០ ភាគរយ ធៀបនឹងចុងឆ្នាំ ២០១៧ ខណៈកម្ចីពីគ្រឹះស្ថានមីក្រូហិរញ្ញវត្ថុ មានចំនួនសរុប ៥,៤ ពាន់លានដុល្លារ។
សេដ្ឋកិច្ចរបស់កម្ពុជានៅតែស្ថិតក្នុងស្ថានភាព «រឹងមាំ» ទោះបីជាកំណើនសេដ្ឋកិច្ចត្រូវបានព្យាករថា នឹងទាបបន្តិចនៅឆ្នាំនេះ បើធៀបនឹងឆ្នាំ ២០១៨ ក៏ដោយ។ នេះបើតាមរបាយការណ៍ធនាគារពិភពលោកដែលចេញផ្សាយកាលពី ខែមេសា។
ការព្យាករបង្ហាញថា សេដ្ឋកិច្ចកម្ពុជានឹងកើនឡើង ៧ ភាគរយ ក្នុងឆ្នាំ ២០១៩ ទាបជាងអត្រា ៧,៥ ភាគរយ ដែលទទួលបានកាលពីឆ្នាំ ២០១៨។
ទោះបីយ៉ាងនេះក្តី លោក ជូ លើកឡើងថា រដ្ឋាភិបាលក៏គួរតែធ្វើនិយតកម្មច្បាប់ទាំងឡាយណាទាក់ទងនឹងវិស័យធនាគារឲ្យបានកាន់តែមានភាពតឹងរ៊ឹងចៀសវាងហានិភ័យនៃបន្ទុកបំណុល ជាពិសេសជួយលើកកម្ពស់ក្នុងការអប់រំ និងផ្តល់ចំណេះដឹងពីហិរញ្ញវត្ថុឲ្យបានកាន់តែទូលំទូលាយសម្រាប់ប្រជាជនខ្មែរ។
លោកថ្លែងថា៖ «ដោយសារកម្ពុជាមិនមែនជាប្រទេសផលិត ដូច្នេះប្រសិនបើឥណទានសម្រាប់ទំនិញប្រើប្រាស់កើនច្រើននោះ វានឹងជះឥទ្ធិពលអវិជ្ជមានសម្រាប់សេដ្ឋកិច្ចជាតិជាមិនខាន»៕LA
