សានហ្វ្រានស៊ីស្កូៈ ក្រុមហ៊ុន Uber កាលពីចុងសប្តាហ៍មុនបានចេញផ្សាយតួលេខប្រាក់ចំណេញដែលបង្ហាញថា ការខាតបង់បានថយចុះនៅត្រីមាសចុងក្រោយកាលពីឆ្នាំមុន ខណៈដែលកំណើនប្រាក់ចំណូលបានថមថយ ស្របពេលដែលក្រុមហ៊ុនផ្តល់សេវាហៅតាក់ស៊ីជិះឈានមុខគេមួយនេះរៀបចំខ្លួនសម្រាប់ការបោះផ្សាយលក់មូលបត្រជាសាធារណៈលើកដំបូង (IPO)។
ការខាតបង់ក្នុងរយៈពេល ៣ ខែចុងក្រោយនៅឆ្នាំមុន មានប្រហែល ៨៦៥ លានដុល្លារ ធៀបនឹងការខាតបង់ ១,១ ពាន់លានដុល្លារក្នុងពេលដូចគ្នាកាលពីឆ្នាំ ២០១៧។
ក្រុមហ៊ុន Uber បានរាយការណ៍ប្រាក់ចំណូល ៣ ពាន់លានដុល្លារ កើនឡើង ២៥ ភាគរយធៀបនឹងឆ្នាំ ២០១៧។
ក្រុមហ៊ុន Uber នៅតែជាក្រុមហ៊ុនឯកជននៅឡើយ ប៉ុន្តែក្រុមហ៊ុននេះបង្ហាញព័ត៌មានប្រាក់ចំណេញមួយចំនួនរបស់ខ្លួនជាទៀងទាត់។
លោក Dara Khosrowshahi ប្រធានប្រតិបត្តិដែលកំពុងគ្រប់គ្រងក្រុមហ៊ុនបង្កើតថ្មីតម្លៃខ្ពស់មួយនេះឆ្ពោះទៅរកការដាក់លក់ភាគហ៊ុនលើកដំបូងនៅឆ្នាំនេះ បានសន្យាថានឹងធ្វើឲ្យកាន់តែមានតម្លាភាព ខណៈដែលលោកស្វែងរកការស្ដារឡើងវិញនូវទំនុកចិត្តលើថ្នាក់ដឹកនាំរបស់ក្រុមហ៊ុនហៅតាក់ស៊ីជិះខ្នាតពិភពលោកនេះ ដែលរងផលប៉ះពាល់ដោយរលករឿងអាស្រូវជាច្រើន។
ប្រាក់ចំណូលសម្រាប់រយៈពេលពេញ ១ ឆ្នាំ បានកើនឡើង ៤៣ ភាគរយដល់ ១១,៣ ពាន់លានដុល្លារ ដោយការខាតបង់ប្រចាំឆ្នាំរបស់ក្រុមហ៊ុនបានថយចុះ ១៥ ភាគរយមកនៅត្រឹម ១,៨ ពាន់លានដុល្លារ។ នេះបើយោងតាមក្រុមហ៊ុនបង្កើតថ្មីមួយនេះ។
ក្រុមហ៊ុន Uber ប្រតិបត្តិការអាជីវកម្មហៅតាក់ស៊ីជិះរបស់ខ្លួនក្នុងប្រទេសជាច្រើន និងបានពង្រីកចូលក្នុងវិស័យថ្មីៗ ដែលរួមមានការដឹកជញ្ជូនអាហារ ម៉ូតូស្គូធឺអគ្គិសនី និងកង់។ ក្រុមហ៊ុននេះត្រូវបានមើលឃើញថាជាក្រុមហ៊ុនឈានមុខគេក្នុងចំណោមក្រុមហ៊ុនបង្កើតថ្មីនានាដែលគាំទ្រដោយការវិនិយោគរួម ដោយមានការសន្និដ្ឋានថា តម្លៃរបស់ក្រុមហ៊ុននេះមានប្រហែល ៧០ ពាន់លានដុល្លារ។
លោក Nelson Chai ប្រធានផ្នែកហិរញ្ញវត្ថុរបស់ក្រុមហ៊ុន Uber បានឲ្យដឹងក្នុងសេចក្ដីប្រកាសព័ត៌មានមួយថា៖ «ឆ្នាំមុន គឺជាឆ្នាំដ៏រឹងមាំបំផុតរបស់យើង ហើយត្រីមាសទី៤ បានបង្កើតកំណត់ត្រាមួយផ្សេងទៀត»៕ AFP/LA