ភ្នំពេញ: ការខូចខាតផ្លូវនៅខេត្តព្រះសីហនុបង្កឡើងដោយសារជំនន់ទឹកភ្លៀងនាពេលថ្មីៗនេះ និងការកកស្ទះចរាចរណ៍នាពេលបច្ចុប្បន្ន បានធ្វើឲ្យប៉ះពាល់ដល់ការដឹកជញ្ជូនទំនិញទៅកាន់កំពង់ផែ។ នេះបើតាមរដ្ឋមន្ត្រីក្រសួងសាធារណការ និងដឹកជញ្ជូន។
ក្នុងពិធីបើកការដ្ឋានជួសជុលផ្លូវខេត្តព្រះសីហនុកាលពីម្សិលមិញលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនថ្លែងថាដើម្បីសម្រួលដល់ការដឹកជញ្ជូនទំនិញទៅខេត្តព្រះសីហនុ រដ្ឋាភិបាលមានគ្រោងធ្វើការពង្រីកផ្លូវជាតិលេខ ៤ បន្ថែមទៀតដែលគម្រោងចំណាយ ១១០ លានដុល្លារ ជាកម្ចីពីធនាគារពិភពលោក។
លោកថ្លែងថា៖ «កាលពីមុនយើងបើកឡានកុងតឺន័រពីភ្នំពេញមកព្រះសីហនុប្រើពេល ៥ ម៉ោង ឥឡូវការធ្វើដំណើរឡើងដល់ ៨ ម៉ោងទៅ ១០ ម៉ោងនេះ ជាចំណាយពេលវេលា និងថវិកាច្រើនណាស់»។
លោកបន្តថា៖ «ខ្ញុំឃើញថា មានឡានខ្លះ ទំនិញខ្លះមិនបានឡើងកប៉ាល់ទេ កប៉ាល់ចេញចោលដោយសារការកកស្ទះមិនអាចទៅទាន់ពេលវេលា ករណីនេះជាការខាតបង់ដល់ថវិកាជាតិ»។
តាមលោក ស៊ុន ចាន់ថុល ក្រសួងនឹងរៀបចំដាក់ឲ្យដេញថ្លៃគម្រោងនេះនៅខែវិច្ឆិកា និងបើកការដ្ឋានស្តារផ្លូវលេខ ៤ នៅឆ្នាំ ២០២០ ដើម្បីសម្រួលដល់ការកកស្ទះចរាចរណ៍។
លោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជាបានប្រាប់ភ្នំពេញប៉ុស្តិ៍ថា ការខូចខាតផ្លូវនៅក្នុងក្រុងព្រះសីហនុបានជះឥទ្ធិពលអវិជ្ជមានដល់វិស័យដឹកជញ្ជូនទំនិញពីភ្នំពេញទៅកំពង់ផែស្វយ័តក្រុងព្រះសីហនុដោយមានការយឺតយ៉ាវ និងចំណាយមានការកើនឡើង។
លោកបន្តថាបញ្ហាផ្លូវខូចនឹងធ្វើឲ្យប៉ះពាល់ដល់ការចំណាយថ្លៃដើមខ្ពស់ជាងមុនដែលត្រូវចំណាយពេលយូរពី ៨ ម៉ោងទៅ ១០ ម៉ោងដឹកទំនិញពីភ្នំពេញទៅកំពង់ផែស្វយ័តក្រុងព្រះសីហនុ។
លោកបានថ្លែងថា៖ «កាលពីមុនក្នុងមួយកុងតឺន័រមានកម្ពស់ ៤០ ហ្វីត មានថ្លៃដឹកពីភ្នំពេញទៅក្រុងព្រះសីហនុ ២៦០ ដុល្លារ ឥឡូវយើងចំណាយប្រមាណ ៣៤០ ដុល្លារធ្វើឲ្យយើងចំណាយច្រើន»។
យោងតាមលោក ចន្ធី ជាមធ្យមឡានកុងតឺន័រប្រមាណ ២ ០០០ គ្រឿង ក្នុងមួយថ្ងៃចរាចរចេញពីភ្នំពេញទៅកំពង់ផែស្វយ័តក្រុងព្រះសីហនុ។
ទោះបីជាយ៉ាងណាលោកអំពាវនាវដល់ស្ថាប័នពាក់ព័ន្ធទាំងអស់ជួយដោះស្រាយបញ្ហាផ្លូវខូចឲ្យឆាប់ ដើម្បីកុំឲ្យប៉ះពាល់ដល់ការបញ្ជាទិញទំនិញពីកម្ពុជា។
លោកបញ្ជាក់ថា៖ «ផ្នែកបញ្ជូនទំនិញនេះពិតជាប៉ះពាល់ហើយ ដូច្នេះយើងស្នើឲ្យស្ថាប័នមានសមត្ថកិច្ចក៏ដូចជាផ្នែកពាក់ព័ន្ធសូមយកចិត្តទុកដាក់ធ្វើយ៉ាងណាកែប្រែស្ថានភាពដែលកើតមានឲ្យឆាប់ក្នុងការសម្រួលដល់ការនាំទំនិញចេញឲ្យបានលឿន»។
លោក កាន់ គន្ធី អនុប្រធានក្រុមហ៊ុននាំចេញអង្ករ Amru Rice បានឲ្យដឹងថា បើទោះជាមានការប៉ះពាល់ដល់វិស័យដឹកជញ្ជូនតាមផ្លូវថ្នល់ ក្រុមហ៊ុនលោកបានសម្រេចដឹកជញ្ជូនតាមរថភ្លើងវិញ។ លោកបន្ថែមថាថ្លៃដឹកជញ្ជូនមានការកើនឡើងប្រមាណ ១០ ទៅ ២០ ភាគរយ។
លោកថ្លែងថា៖ «ការដឹកអង្ករតាមកុងតឺន័រជួបការលំបាកក្នុងមួយរយៈនេះបញ្ហាទឹកជំនន់ បញ្ហាក្រសួងរឹតបន្តឹង តែយើងមានជម្រើសដឹកតាមរថភ្លើងដោយដឹកចេញនៅដើមសប្តាហ៍ ដើម្បីឲ្យទាន់កប៉ាល់នៅកំពង់ផែ»។
បើតាមលោក គន្ធី ការដឹកជញ្ជូនអង្កររបស់ Amru Rice មានប្រមាណ ២០០ កុងតឺន័រក្នុងមួយខែ។
លោក គឹមឈន់ អគ្គនាយកកំពង់ផែស្វយ័តក្រុងព្រះសីហនុប្រាប់ភ្នំពេញប៉ុស្តិ៍កាលពីសប្តាហ៍មុនថា បច្ចុប្បន្នកំពង់ផែកំពុងមានបញ្ហាប្រឈមនឹងទីតាំងសម្រាប់ដាក់កុងតឺន័រ។
លោកបន្តថាគម្រោងពង្រីកទីលានទុកកុងតឺន័រ និងបំពាក់គ្រឿងចក្របន្ថែម នឹងធ្វើឲ្យសមត្ថភាពផ្ទុកកុងតឺន័រអាចឆ្លើយតបនឹងសភាពការណ៍បាន៕LA