.jpg)
ប្រជាពលរដ្ឋនៅក្នុងសហគមន៍ស្វាយចន្ទីខេត្តកំពង់ធំលើកគ្រាប់ស្វាយចន្ទីចាក់ស្រុសកាលពីពេលកន្លងមក។ ហុង មិនា
ភ្នំពេញៈ របាយការណ៍របស់ក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ប្រទេស កម្ពុជា បាននាំចេញគ្រាប់ស្វាយចន្ទីប្រហែល ២០២ ៣១៨ តោនកាលពីឆ្នាំមុនទៅទីផ្សារបរទេសកើនឡើងជិត ១០០ ភាគរយ ធៀបនឹងឆ្នាំ ២០១៨ ដែលមានចំនួនប្រហែល ១០១ ៩៧៣ តោន។
លោក ខាន់ សំបាន ប្រធាននាយកដ្ឋានកសិឧស្សាហកម្មក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្ដិ៍ថា ការនាំចេញសរុបបង្ហាញពីកំណើនដ៏រឹងមាំ ដោយសារតែក្រសួងបានកាត់បន្ថយភាពស្មុគស្មាញមួយចំនួននៃបែបបទនាំចេញ ហើយគ្រាប់ស្វាយចន្ទីបានកែលម្អស្ដង់ដា។ លោកបានបន្តថា៖ «យើងមើលឃើញថា គ្រាប់ស្វាយចន្ទីរបស់យើងមានរសជាតិ និងគុណភាពល្អ ដូច្នេះយើងមានតម្រូវការកាន់តែច្រើនពីប្រទេសក្រៅ»។
លោករំពឹងថា តម្លៃគ្រាប់ស្វាយចន្ទីត្រូវបានលក់ប្រហែល ៥ ០០០ ឬ ៦ ០០០ រៀល ក្នុង ១ គីឡូក្រាម នៅដើមរដូវប្រមូលផលនៅឆ្នាំនេះ។ លោកបន្តថា៖ «យើងបានមើលឃើញទិន្នផលគ្រាប់ស្វាយចន្ទីកើនឡើងដោយសារតែការដាំដុះកើនឡើង»។ របាយការណ៍បានពីក្រសួងបង្ហាញថា ទិសដៅនាំចេញគ្រាប់ស្វាយចន្ទីសំខាន់ៗរបស់កម្ពុជាគឺប្រទេសវៀតណាម រុស្ស៊ី កូរ៉េខាងត្បូង ចិន ប៉េរូ មីយ៉ាន់ម៉ា ឥណ្ឌា អូស្ដ្រាលី កោះតៃវ៉ាន់ សិង្ហបុរី និងម៉ាឡេស៊ី។
កសិករក្នុងសហគមន៍ស្វាយចន្ទីនៅខេត្តកំពង់ធំបង្ហាញគ្រាប់ចន្ទីនៅសិប្បកម្មកែច្នៃកន្លងមក ។ ហុង មិនា
ផ្ទៃដីសរុបនៃការដាំដុះស្វាយចន្ទី គឺ ១៤៩ ៦៦០ ហិកតា ទូទាំងប្រទេស។ ជិត ៦០ ភាគរយ ត្រូវបានប្រមូលផលដែលអាចផ្ដល់ទិន្នផល ១១៦ ៣៤៣ តោន កាលពីឆ្នាំមុន។ នេះបើយោងតាមតួលេខរបស់ក្រសួងកសិកម្ម រុក្ខាប្រមាញ់ និងនេសាទ។
ក្រសួងកសិកម្មកម្ពុជា និងសមាគមស្វាយចន្ទីវៀតណាម (Vinacas) បានចុះហត្ថលេខាលើអនុស្សរណៈនៃការយោគយល់គ្នា (MoU) កាលពីឆ្នាំ ២០១៨ ដើម្បីបង្កើនការនាំចេញគ្រាប់ស្វាយចន្ទីរបស់កម្ពុជាដល់ ១ លានតោនត្រឹមឆ្នាំ ២០២៨។ Vinacas ក៏បានផ្ដល់ដល់ក្រសួងនូវជំនួយឥតសំណង ៦៦ ០០០ ដុល្លារ ដើម្បីគាំទ្រដល់គម្រោងដូចគ្នានេះ។
ប្រទេសកម្ពុជាអាចផលិតគ្រាប់ស្វាយចន្ទីបានប្រមាណ ១ តោន ក្នុងផ្ទៃដីដាំដុះ ១ ហិកតា ខណៈវៀតណាមអាចផលិតបានជាង ២ តោន។
HEKS/EPER ជាអង្គការមិនមែនរដ្ឋាភិបាលដែលគាំទ្រដោយប្រទេស ស្វ៊ីស បានប្រកាសកាលពីឆ្នាំ ២០១៨ ថា ខ្លួនបានដំណើរការគម្រោងរយៈពេល ៥ ឆ្នាំ ជាមួយនឹងមូលនិធិ ៧,៨ លានដុល្លារ សម្រាប់គ្រាប់ស្វាយចន្ទីនៅក្នុងប្រទេសកម្ពុជា ដោយមានគោលដៅកែលម្អជីវភាពរស់នៅរបស់គ្រួសារជនបទ។
គម្រោងដែលនឹងត្រូវបានអនុវត្តនៅចន្លោះឆ្នាំ ២០១៨ ដល់ឆ្នាំ ២០២២ ត្រូវបានរំពឹងថានឹងបង្កើនសន្ដិសុខស្បៀងអាហារ ប្រាក់ចំណូល និងការគ្រប់គ្រងដីសម្រាប់សហគមន៍ក្រីក្រ។ គម្រោងនេះនឹងត្រូវបានអនុវត្តក្នុងខេត្ត ៧ គឺពោធិ៍សាត់ កំពង់ឆ្នាំង ព្រៃវែង ត្បូងឃ្មុំ ក្រចេះ មណ្ឌលគិរី និងស្ទឹងត្រែង៕ LA
