.jpg)
សកម្មភាពក្រុមកម្មកររបស់ក្រុមហ៊ុន Longmate Agriculture កំពុងលាងសម្អាតចេក។ រូបថត សហការី
ភ្នំពេញៈ កម្ពុជាបាននាំចេញផ្លែចេកអំបូងលឿងស្រស់ ៧ ២១៨២ តោន ទៅទីផ្សារអន្តរជាតិ (តំបន់អាស៊ីខាងកើត) នាត្រីមាសទី ១ ឆ្នាំ ២០២០។ នេះបើតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ។
របាយការណ៍បង្ហាញថា ភាគច្រើននៃផ្លែចេកអំបូងលឿងស្រស់របស់កម្ពុជា ត្រូវបាននាំចេញទៅកាន់ទីផ្សារប្រទេស ចិន និងមួយចំនួនទៀតទៅប្រទេស វៀតណាម និងជប៉ុន ដោយជាមធ្យមការនាំចេញចេកអំបូងលឿងពីប្រទេសកម្ពុជាមានបរិមាណជាង ៧៩៥ តោន ក្នុង ១ ថ្ងៃ។
ផ្លែចេកអំបូងលឿងកម្ពុជានាំចេញទៅទីផ្សារចិនបានបង្ហាញនូវកំណើនយ៉ាងរហ័សចាប់តាំងពីប្រទេសយក្សក្នុងតំបន់អាស៊ីខាងកើត ១ នេះយល់ព្រមឲ្យមានការនាំចេញដោយផ្ទាល់ទៅកាន់ទីផ្សារខ្លួនកាលពីឆ្នាំ ២០១៩ ក្រោយពីការចរចាអស់រយៈពេលយ៉ាងយូរ និងក្រុមហ៊ុនរបស់ចិនបានចាប់ដៃគូជាមួយក្រុមហ៊ុនក្នុងស្រុកវិនិយោគលើការដាំដុះចេកអំបូងលឿងលើទឹកដីកម្ពុជា។
ក្នុងឆ្នាំកន្លងទៅការនាំចេញផ្លែចេកអំបូងលឿងទៅកាន់ទីផ្សារចិនមានចំនួន ១៥៧ ៨១២ តោន។
លោក ហ៊ុន ឡាក់ នាយកក្រុមហ៊ុន Longmate Agriculture Co., Ltd ដែលវិនិយោគលើចម្ការចេកទំហំ ១ ០០០ ហិកតា នៅខេត្តកំពតបានប្រាប់ភ្នំពេញប៉ុស្ដិ៍កាលពីថ្ងៃចន្ទថា ប្រទេស ចិន គឺជាទីផ្សារធំជាងគេសម្រាប់ក្រុមហ៊ុនរបស់លោក។
លោកបន្តថា៖ «បើទោះបីជាការនាំចេញមានបរិមាណកើនឡើង ប៉ុន្តែការផ្គត់ផ្គត់របស់យើងមិនទាន់បំពេញតម្រូវការទីផ្សារគ្រប់គ្រាន់ទេ។ ដូចនេះ យើងមិនគិតអំពីការពង្រីកទីផ្សារថ្មីទៅបណ្ដាប្រទេសផ្សេងទៀតទេ»។
លោកបញ្ជាក់ថា៖ «យើងរំពឹងថា ក្រុមហ៊ុនរបស់យើងនឹងមានទិន្នផលស្រដៀងគ្នាកាលពីឆ្នាំមុន ដោយសារតែអាកាសធាតុក្ដៅ និងកង្វះទឹក»។
ជាមួយការផ្ទុះឡើងនៃវីរុសកូរ៉ូណាដែលរំខានដល់ការនាំចេញទំនិញគ្រប់ប្រភេទនៅក្នុងពិភពលោកក៏ដូចជាប្រទេសកម្ពុជា លោក ហ៊ុន ឡាក់ បានអះអាងថា ការនាំចេញចេកអំបូងលឿងរបស់លោកនឹងមិនរងផលប៉ះពាល់នោះទេ។
លោកនិយាយថា៖ «ខ្ញុំយល់ថា ការផ្ទុះឡើងនិងរីករាលដាលនៃវីរុសកូរ៉ូណាថ្មីមិនប៉ះពាល់ដល់ការនាំចេញផលិតផលកសិកម្ម រួមទាំងផ្លែចេកអំបូងលឿងនោះទេ»។
លោក ហ៊ុន ឡាក់ បានឲ្យដឹងថាផ្ទៃដីជាង ៤០០ ហិកតា បានប្រមូលផលកាលពីឆ្នាំ ២០១៩ ការនាំចេញផ្លែចេករបស់ក្រុមហ៊ុនទៅប្រទេស ចិន សម្រេចបានជាង ១០ ០០០ តោន។
លោក ងិន ឆាយ អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ប្រទេសកម្ពុជាក្រុមហ៊ុនវិនិយោគលើការដាំដុះ និងវេចខ្ចប់ចំនួន ៩ រួមមានក្រុមហ៊ុន Longmate ក្រុមហ៊ុន Long Sreng Hua Jian Agriculture Development Co Ltd ក្រុមហ៊ុន Reen Island Agricultural Development (Cambodia) Limited ក្រុមហ៊ុន Sovann Reachsey Co Ltd និងក្រុមហ៊ុន Agricultural Development (Cambodia) Co Ltd។
លោកបន្តថា ក្រុមហ៊ុននាំចេញថ្មីចំនួន ៤ ដែលទើបនឹងទទួលបានសិទ្ធិនាំចេញ ៤ ចុងក្រោយដែលរួមមានក្រុមហ៊ុន Hoang Anh Andong Meas ក្រុមហ៊ុន Hoang Anh Lumphat ក្រុមហ៊ុន Daun Penh Agrico និងក្រុមហ៊ុន Binhphuoc Kratie Rubber 2 ក្នុងចំណោមក្រុមហ៊ុនទាំងអស់នេះគឺក្រុមហ៊ុន HAGL Agrico។
លោក វេង សាខុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទបានឲ្យដឹងក្នុងពិធីសម្ពោធរោងចក្រវេចខ្ចប់ផ្លែចេកនៅខេត្តរតនគិរីកាលពីខែធ្នូ ឆ្នាំ២០១៩ ថា ក្រសួងកំពុងខិតខំក្នុងការបង្កើនកិច្ចសហប្រតិបត្តិការជាមួយអាជ្ញាធរចិន ដើម្បីធ្វើឲ្យក្រុមហ៊ុនកម្ពុជាកាន់តែច្រើនអាចទទួលបានសិទ្ធិសម្រាប់ការនាំចេញផ្លែចេកទៅប្រទេសចិន។
លោកថ្លែងថា៖ «ការទទួលបានការអនុញ្ញាតពីអាជ្ញាធរចិនក្នុងការអនុញ្ញាតឲ្យក្រុមហ៊ុនកម្ពុជាកាន់តែច្រើននាំចេញផ្លែចេកនឹងជួយបង្កើនការនាំចេញទៅទីផ្សារចិននៅក្នុងរយៈពេលជាច្រើនឆ្នាំខាងមុខ»៕ LA
