.jpg)
ការប្រមូលផលត្រី ក្នុងរដូវនេសាទកាលពីពេលកន្លងមក។ ហុង មិនា
ភ្នំពេញៈ កម្ពុជាបាននាំចេញផលនេសាទសរុប ១០ ៩៨០ តោន នៅក្នុងរយៈពេល ៩ ខែ នៃឆ្នាំ ២០១៩ ធ្លាក់ចុះ ០,៥ ភាគរយ បើធៀបទៅនឹងរយៈពេលដូចគ្នាឆ្នាំ ២០១៨។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។
របាយការណ៍ស្តីពីសភាពការណ៍កសិកម្ម រុក្ខាប្រមាញ់ និងនេសាទរយៈពេល ៩ ខែបានឲ្យដឹងថា ក្នុងរយៈពេលនេះកម្ពុជានាំចេញផលនេសាទស្រស់បាន ៧ ០០០ តោនធ្លាក់ចុះ ៦០ តោនបើធៀបនឹងរយៈពេលដូចគ្នាកាលពីឆ្នាំ ២០១៨ ខណៈការនាំចេញផលនេសាទកែច្នៃ មានបរិមាណ ៣ ៩៨០ តោន កើនឡើង ១០ តោន។
របាយការណ៍បង្ហាញថា ការប្រមូលផលនេសាទទឹកសាបសរុបក្នុងរយៈពេល ៩ ខែនេះ មានចំនួន ២៦២ ៣០០ តោន ធ្លាក់ចុះ ១៤ ០៧០ តោន បើធៀបទៅនឹងរយៈពេលដូចគ្នាឆ្នាំ ២០១៨ ខណៈផលនេសាទសមុទ្រប្រមូលបាន ៨៨ ១០០ តោន កើនឡើង ២៥០ តោន។
លោក អេង ជាសាន ប្រធានរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្តិ៍កាលពីថ្ងៃអង្គារថា ការនាំចេញផលនេសាទបានធ្លាក់ចុះបន្តិចបន្តួចក្នុងរយៈពេល ៩ ខែកន្លងមក គឺដោយសារតម្រូវការបរិភោគក្នុងស្រុកកើនឡើងស្របពេលទិន្នផលនេសាទថយចុះ។ លោកថ្លែងថា៖ «កំណើននៃតម្រូវការក្នុងស្រុកបានធ្វើឲ្យការនាំចេញធ្លាក់ចុះតិចតួច»។
បើតាមលោក ជាសាន ផលនេសាទកម្ពុជាភាគច្រើនត្រូវបាននាំចេញទៅកាន់ប្រទេសវៀតណាម និងថៃ។
លោកបានប្រាប់ទៀតថាបច្ចុប្បន្នក្រសួងកសិកម្ម កំពុងខិតខំជំរុញ និងទាក់ទាញឲ្យមានការវិនិយោគលើវារីវប្បកម្ម ដើម្បីអាចឆ្លើយតបនឹងកំណើនតម្រូវការក្នុងស្រុក និងសម្រាប់ការនាំចេញ។ លោកថ្លែងថា៖ «បច្ចុប្បន្នយើងមិនទាន់មានការវិនិយោគលើវារីវប្បកម្មខ្នាតធំៗច្រើនទេ»។
កាលពីពេលថ្មីៗនេះកម្ពុជាទើបតែទទួលបានជំនួយពីសហគមន៍អឺរ៉ុបក្នុងទឹកប្រាក់ប្រមាណ ២៥ លានដុល្លារ និងក្រសួងកសិកម្មអាមេរិក ១៧ លានដុល្លារដើម្បីអភិវឌ្ឍលើវិស័យវារីវប្បកម្ម។ នេះបើតាមលោក ជាសាន។
លោកបន្តថាកម្ពុជារំពឹងថា ផលនេសាទនឹងមានកំណើនច្រើននៅពេលខាងមុខ។ ការធ្វើវារីវប្បកម្មកំពុងកើនឡើងនៅស្ទើរគ្រប់តំបន់ ពិសេសតំបន់មាត់សមុទ្រ និងទន្លេសាប។ លោកបញ្ជាក់ថា៖ «ពេលនេះគ្រាន់តែជាដំណាក់កាលដំបូងប៉ុណ្ណោះ ទិន្នផលនឹងបាននៅ ២-៣ ឆ្នាំទៀត»។
របាយការណ៍ឲ្យដឹងទៀតថា គិតត្រឹមខែកញ្ញា ឆ្នាំ ២០១៩ ការចិញ្ចឹមត្រី និងបង្គាអនុវត្តបានជាង ២៤,៥ ម៉ឺនតោន កើនជាង ៤,២ ម៉ឺនតោន ធៀបនឹងរយៈពេលដូចគ្នាឆ្នាំ ២០១៨។ ចំណែកការភ្ញាស់កូនត្រីពូជអនុវត្តបានជាង ១៥៨ លានកូនកើនឡើងប្រហែល ១ លានកូន៕ LA
