.jpg)
គ្រឿងចក្រកំពុងចូកស្រូវក្នុងឃ្លាំងរបស់ក្រុមហ៊ុនបៃតងនៅបាត់ដំបង។ ហេង ជីវ័ន
ភ្នំពេញៈ ការនាំចេញអង្កររបស់កម្ពុជាបានកើនឡើងជាង ១៧ ភាគរយកាលពីឆ្នាំ ២០១៧ ធៀបនឹងឆ្នាំ ២០១៦ ដោយសារក្រុមហ៊ុននាំចេញព្យាយាមបំពេញតាមការបញ្ជាទិញស្ថិតក្រោមកូតានាំចូលអង្កររបស់ប្រទេសចិន ខណៈទីផ្សារអឺរ៉ុបនៅតែមានស្ថិរភាព។
លោក ច្រាយ សុន នាយករងក្រុមហ៊ុន Capital Food Cambodia ថ្លែងថា កំណើននេះត្រូវបាននាំមុខដោយប្រទេសចិន ដោយសារតែការទទួលបានកូតានាំចេញអង្ករកាន់តែខ្ពស់ ប៉ុន្តែទីផ្សារអឺរ៉ុបនៅតែជាសក្ដានុពលដ៏សំខាន់សម្រាប់ឧស្សាហកម្មអង្ករ។
លោកមានប្រសាសន៍ថា៖ «អង្ករកម្ពុជា កាន់តែទទួលបានភាពពេញនិយម ហើយគុណភាពត្រូវបានទទួលស្គាល់នៅលើទីផ្សារអន្តរជាតិ។ កំណើនការនាំចេញនៅឆ្នាំនេះគឺជាសញ្ញាដ៏ល្អដែលនាំពួកយើងទៅរកទីផ្សារសំខាន់ៗ ដូចជា ប្រទេសចិន និងអឺរ៉ុប»។
ប្រទេសចិនដែលបានយល់ព្រមទិញអង្ករ ២០០ ០០០ តោនកាលពីឆ្នាំ ២០១៧ និងកើនឡើងដល់ ៣០០ ០០០ តោននៅឆ្នាំនេះបានក្លាយជាទិសដៅដ៏សំខាន់សម្រាប់ការនាំចេញអង្ករ។
យោងតាមហ្វេសប៊ុករបស់លោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម កាលពីឆ្នាំមុន អង្ករសរុប៦៣៥ ៦០០តោនត្រូវបាននាំចេញទៅទីផ្សារអន្តរជាតិ ដែលកើនឡើង ១៧,៣ភាគរយធៀបនឹងឆ្នាំ២០១៦ ជាពេលដែលអង្ករ ៥៤២ ១៤៤តោនត្រូវបាននាំចេញ។
តួលេខនេះក៏បានបង្ហាញផងដែរពីគម្លាតខុសគ្នាក្នុងរយៈពេល ៥ឆ្នាំចុងក្រោយ ដែលបានមើលឃើញកំណើន ៦៧,៧៨ភាគរយធៀបនឹងការនាំចេញសរុប ៣៧៨ ៨០០ តោនពីប្រទេសកម្ពុជា កាលពីឆ្នាំ ២០១៣។
លោក សុន បានថ្លែងថា៖ «ទោះបីជាមានកំណើនតួលេខនាំចេញក៏ដោយ ក៏វាជាផ្នែកតូចមួយធៀបនឹងប្រទេសជិតខាង»។ លោកបានបន្ថែមថា ឧស្សាហកម្មអង្ករត្រូវតែផ្ដោតបន្ថែមទៀតលើគ្រាប់ពូជមានគុណភាព ការបង្កើនស្ដុកអង្ករ ម៉ាស៊ីនសម្ងួត និងប្រព័ន្ធធារាសាស្ដ្រ ដើម្បីសម្រេចបានតាមទិសដៅនៃការនាំចេញអង្ករ ១លានតោន។
លោកមានប្រសាសន៍ថា៖ «ប្រសិនបើរដ្ឋាភិបាលបញ្ចេញកម្ចីកាន់តែច្រើនដល់រោងម៉ាស៊ីនកិនស្រូវសម្រាប់ការសាងសង់ឃ្លាំងស្ដុកស្រូវ និងម៉ាស៊ីនសម្ងួតស្រូវ សមត្ថភាពនៃការប្រមូលស្រូវនឹងកើនឡើង ហើយបង្កើនការនាំចេញផងដែរ»។
ក្នុងរយៈពេលពីរឆ្នាំចុងក្រោយនេះ ធនាគារអភិវឌ្ឍន៍ជនបទ ( RDB) បានផ្ដល់កម្ចីអត្រាការប្រាក់ទាបរហូតដល់ ៣០លានដុល្លារដល់រោងម៉ាស៊ីនកិនស្រូវចំនួន ៣ ដើម្បីសាងសង់ និងប្រតិបត្តិការឃ្លាំងស្ដុកស្រូវ និងឡសម្ងួតស្រូវនៅក្នុងខេត្តចំនួន៤ ក្នុងគោលបំណងបង្កើនការស្ដុកស្រូវ និងសមត្ថភាពសម្ងួត។
បើទោះបីជាការនាំចេញអង្ករបានកើនឡើងក៏ដោយ ក៏បរិមាណផល និងតម្លៃស្រូវនៅតំបន់ខ្លះក្នុងប្រទេសកម្ពុជាមិនល្អឡើយ។
លោក ស៊ុម សង ប្រធានសហគមន៍អភិវឌ្ឍន៍កសិកម្មចំរើនផលរាំងកេសី ដែលជាសហករណ៍កសិកម្មមួយស្ថិតក្នុងឃុំរាំងកេសី ខេត្តបាត់ដំបង បានថ្លែងថា ពេញមួយរដូវដាំដុះ បរិមាណផល និងតម្លៃស្រូវមិនល្អនោះទេក្នុងតំបន់របស់លោក ដោយសារតែកង្វះឃ្លាំងស្ដុកស្រូវ និងម៉ាស៊ីនសម្ងួតស្រូវ។
លោកថ្លែងថា សហករណ៍របស់លោកអាចលក់បានតែប្រហែល ៩០០រៀលប៉ុណ្ណោះក្នុងមួយគីឡូក្រាម៕ LA
