ភ្នំពេញៈ កំណើននៃការប្រើប្រាស់គ្រឿងយន្តកសិកម្មបានធ្វើឱ្យការប្រើប្រាស់គោ ក្របី ជាកម្លាំងអូសទាញក្នុងវិស័យកសិកម្មកម្ពុជាធ្លាក់មកនៅក្រោម ១ ភាគរយតែប៉ុណ្ណោះ ក្នុងឆ្នាំ ២០២០ ដែលនិន្នាការនេះនឹងបន្តកើតមានបន្ថែមទៀតនាពេលអនាគត។ នេះបើតាមមន្ត្រីជាន់ខ្ពស់នៃក្រសួងកសិកម្ម រុក្ខាប្រមាញ់ និងនេសាទ។
ទិន្នន័យពីក្រសួងកសិកម្មបង្ហាញថា ការប្រើប្រាស់គោ ក្របី ក្នុងផលិតកម្មកសិកម្មបានថយចុះជារៀងរាល់ឆ្នាំជាក់ស្តែងភាគរយនៃការប្រើប្រាស់គោ ក្របី សម្រាប់ភ្ជួររាស់ដីកសិកម្មបានធ្លាក់ចុះពីចំនួន ២,៤ ភាគរយក្នុងឆ្នាំ ២០១៨ មកនៅ ១,១៦ ភាគរយ ក្នុងឆ្នាំ ២០១៩ និងបន្តធ្លាក់មកនៅក្រោម ១ ភាគរយក្នុងឆ្នាំ ២០២០។
ទិន្នន័យឱ្យដឹងទៀតថា គិតត្រឹមឆ្នាំ ២០២០ កម្ពុជាមានកម្លាំងអូសទាញ (គោ ក្របី) សរុប ០,៦៥ លានក្បាល បើធៀបឆ្នាំ ២០១៩ ថយចុះ ៩,៦ ភាគរយ។ ចំណែកចំនួនគោ ក្របីសរុបនៅទូទាំងប្រទេសមានចំនួន ៣,២៧ លានក្បាល (គោ ២,៨៥ លានក្បាល និងក្របី ០,៤២ លានក្បាល) ភាគច្រើនត្រូវបានគេចិញ្ចឹមសម្រាប់ផ្គត់ផ្គង់សាច់លើទីផ្សារ។
លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ ក្រសួងកសិកម្ម រុក្ខាប្រមាញ់ និងនេសាទបានប្រាប់ ភ្នំពេញ ប៉ុស្តិ៍ នាថ្ងៃទី ២២ ខែមីនាថា កំណើនសេដ្ឋកិច្ច និងភាពសម្បូរនៃគ្រឿងយន្តកសិកម្មបានធ្វើឱ្យការប្រើប្រាស់គោ ក្របីជាកម្លាំងអូសទាញធ្លាក់ចុះជាបន្តបន្ទាប់ ជាក់ស្តែងការប្រើប្រាស់កម្លាំងគោ ក្របីក្នុងវិស័យកសិកម្មនៅពេលនេះមានតិចជាង ១ ភាគរយ។
លោកបន្តថា យន្តូបនីយកម្ម គឺជាមូលហេតុចម្បងធ្វើឱ្យការប្រើប្រាស់គ្រឿងយន្តក្នុងវិស័យកសិកម្មមានកាន់តែច្រើន ដែលការណ៍នេះគឺកើតនៅគ្រប់ប្រទេសលើពិភពលោក។
លោកថ្លែងថា៖ «បច្ចុប្បន្នការប្រើប្រាស់គោ ក្របី ក្នុងវិស័យកសិកម្មនៅកម្ពុជាមាននៅសល់មិនដល់ ១ ភាគរយទេ ដោយសារមានគ្រួសារកសិករតិចតួចបំផុតដែលនៅប្រើប្រាស់វាលើដីកសិកម្មខ្លួន (ស្រែ ចម្ការតូចៗ និងនៅឆ្ងាយៗ)»។
ទោះយ៉ាងណាលោកបានប្រាប់ថា ចំនួននៃការចិញ្ចឹមគោ ក្របីនៅទូទាំងប្រទេសគឺមានកើនឡើងជារៀងរាល់ឆ្នាំ គ្រាន់តែមិនកើនខ្ពស់ដូចការចិញ្ចឹមជ្រូក និងមាន់ ទានោះទេ ព្រោះការចិញ្ចឹមគោ ក្របី ត្រូវការពេលយូរ ហើយការចិញ្ចឹមទាំងអស់គឺដើម្បីយកសាច់លក់តែប៉ុណ្ណោះ។
លោកប្រាប់ទៀតថា និន្នាការនៃការធ្លាក់ចុះនឹងកើនឡើងបន្ថែមទៀតនៅពេលអនាគត។
លោក ងន សាំង អគ្គនាយកក្រុមហ៊ុន RMA Cambodia ដែលនាំចូលរថយន្ត និងគ្រឿងចក្រកសិកម្មធុនធ្ងន់ (ត្រាក់ទ័រ Jonh Deere) បានប្រាប់ថា ការរីករាលដាលជំងឺកូវីដ១៩ បានធ្វើឱ្យការនាំចូលត្រាក់ទ័រ Jonh Deere ក្នុងឆ្នាំ ២០២០ មានចំនួនប្រហាក់ប្រហែលឆ្នាំ ២០១៩ ប៉ុន្តែសម្រាប់ត្រីមាសទី ១ ឆ្នាំ ២០២១ ការនាំចូលបានកើនឡើងវិញជាបន្តបន្ទាប់។
លោកបន្ថែមទៀតថា ចំនួននៃការប្រើប្រាស់ត្រាក់ទ័រនៅក្នុងវិស័យកសិកម្មនឹងបន្តកើនថែមទៀត ដោយពេលនេះកសិកម្មស្ទើរទាំងអស់បាននាំគ្នាឈប់ប្រើគោ ក្របីហើយ។ សូម្បីគ្រឿងយន្តធុនតូច (គោយន្ត) ក៏មិនត្រូវបានកសិករយកទៅប្រើសម្រាប់ភ្ជួរស្រែទៀតដែរ ព្រោះវាត្រូវចំណាយពេលយូរ។
លោកអះអាងថា៖ «ទោះមិនទាន់ចប់ត្រីមាសទី ១ ប៉ុន្តែយើងដឹងថា ការនាំចូលត្រាក់ទ័រ Jonh Deere របស់ក្រុមហ៊ុន RMA Cambodia នឹងមានកំណើនក្នុងរង្វង់ប្រមាណ ៣០ ភាគរយបើធៀបទៅនឹងត្រីមាសទី ១ ឆ្នាំ ២០២០»។
ក្រសួងកសិកម្មបានប៉ាន់ប្រមាណថា ប្រទេសកម្ពុជា បាននាំចេញផលិតផលដំណាំកសិឧស្សាហកម្មចំនួន ៦ ទាំងផ្លូវការ និងក្រៅផ្លូវការជាង ៨,៥៥ លានតោន ស្មើនឹងជាង ២,៣២ ពាន់លានដុល្លារនៅឆ្នាំ ២០២០។ ផលិតផលទាំងនោះរួមមាន ដំឡូងមី ស្វាយស្រស់ គ្រាប់ស្វាយចន្ទី ផ្លែចេកស្រស់ មៀនប៉ៃលិន និងម្រេច៕ LA