ភ្នំពេញៈ ក្រសួងឧស្សាហកម្ម និងសិប្បកម្ម បានច្រានចោលសំណើសុំរំលាយសហគមន៍អំបិល ដោយអះអាងថា អាជ្ញាធរនឹងស្វែងរកការដោះស្រាយបញ្ហានៅក្នុងឧស្សាហកម្មនេះ។ នេះបើយោងតាមអ្នកនាំពាក្យក្រសួងឧស្សាហកម្ម។
ការសម្រេចចិត្តនេះធ្វើឡើងនៅក្នុងកិច្ចប្រជុំកាលពីថ្ងៃចន្ទ រវាងរដ្ឋមន្ត្រីក្រសួងឧស្សាហកម្ម និងសិប្បកម្ម លោក ចម ប្រសិទ្ធ ជាមួយនឹងភាគីពាក់ព័ន្ធក្នុងឧស្សាហកម្មផលិតអំបិល។ សហគមន៍អំបិលកំពត កែប កាលពីសប្តាហ៍មុនបានដាក់លិខិតសុំរំលាយសហគមន៍នេះចោលទៅអាជ្ញាធរពាក់ព័ន្ធដោយលើកឡើងពីបញ្ហានៃការមិនរួបរួមគ្នាក្នុងចំណោមអ្នកផលិតក្នុងស្រុក។
លោក អ៊ុំ សុថា អ្នកនាំពាក្យក្រសួងឧស្សាហកម្ម និងសិប្បកម្ម បានប្រាប់ភ្នំពេញ ប៉ុស្តិ៍កាលពីថ្ងៃម្សិលមិញថា ជាលទ្ធផលនៃកិច្ចប្រជុំ ក្រសួងសម្រេចរក្សាទុកសហគមន៍នេះនៅដដែល។
លោកថ្លែងថា៖ «នៅក្នុងកិច្ចប្រជុំនេះ យើងបានបើកឲ្យមានការពិភាក្សាដើម្បីស្តាប់ពីបញ្ហាប្រឈមពីភាគីពាក់ព័ន្ធ ពេលនេះយើងបានប្រមូលបញ្ហាទាំងអស់នេះ ហើយនឹងបង្កើតក្រុមការងារដើម្បីស៊ើបអង្កេតបន្តដល់កម្រិតមូលដ្ឋានដើម្បីស្វែងរកបញ្ហាពិតប្រាកដពីកសិករ»។
លោកបន្តទៀតថា៖ «ដំបូងយើងមិនឯកភាពឲ្យរំលាយសហគមន៍អំបិលនេះទេ យើងឲ្យពួកគេត្រូវរង់ចាំមើលដំណោះស្រាយពីយើងសិន»។
លោក អ៊ុំ សុថា បាននិយាយថា សហគមន៍ផលិតអំបិល គឺស្ថិតនៅក្រោមក្រសួងឧស្សាហកម្ម និងសិប្បកម្ម ពួកគេមិនអាចធ្វើការសម្រេចចិត្តដោយខ្លួនឯងនោះទេ។
លោក ប៊ុន បារំាង សហប្រធានសហគមន៍អ្នកផលិតអំបិលកំពត កែប បាននិយាយថា សហគមន៍គោរពតាមការសម្រេចចិត្តរបស់ក្រសួង។
លោកថ្លែងថា៖ «យើងក៏មិនចង់រំលាយវាចោលដែរ ព្រោះយើងសម្រេចបានសមិទ្ធផលដ៏ធំក្នុងរយៈពេល ១៥ ឆ្នាំមកនេះ ដូច្នេះយើងរង់ចាំមើលលទ្ធផលពីក្រសួង»។
តាមលោក ប៊ុន បារាំង សហគមន៍ផលិតអំបិលត្រូវបានបង្កើតឡើងក្នុងឆ្នាំ ២០០៩ ដែលមានអាណត្តិ ៥ ឆ្នាំ និងគ្រប់គ្រងផ្ទៃដីផលិតអំបិល ៤ ៦០០ ហិកតាក្នុងខេត្តកំពត និងកែប។
សុំសិទ្ធិផ្តាច់មុខនាំចូលអំបិល
ទោះបីយ៉ាងនេះក្តី លោក បារាំង បានឲ្យដឹងថា សហគមន៍បានស្នើសុំសិទ្ធិផ្តាច់មុខក្នុងការនាំចូលអំបិលដើម្បីបំពេញទីផ្សារក្នុងស្រុក ក្នុងករណីដែលមានការខ្វះខាត។
លោកថ្លែងថា៖ «ដូច្នេះយើងអាចគ្រប់គ្រងពីចំនួនអំបិលដែលនាំចូលមកបំពេញតម្រូវការក្នុងស្រុក យើងមិនចង់ឃើញការនាំចូលលើសតម្រូវការ [ពីឈ្មួញ] ដែលនឹងធ្វើឲ្យប៉ះពាល់ដល់អ្នកផលិតក្នុងស្រុក និងធ្វើឲ្យតម្លៃក្នុងស្រុកធ្លាក់ចុះនោះទេ»។
សំណើនេះក៏ត្រូវបានក្រសួងឧស្សាហកម្ម និងសិប្បកម្មច្រានចោលដែរ ដោយសំអាងថា កម្ពុជាកំពុងអនុវត្តគោលនយោបាយទីផ្សារសេរី។
លោក អ៊ុំ សុថា លើកឡើងថា៖ «យើងជាទីផ្សារសេរី អ្នកគ្រប់គ្នាមានសិទ្ធិនាំចេញ នាំចូល យើងមិនអាចខ្ទុបទីផ្សារ ឬផ្តល់សិទ្ធិសម្រាប់ទីផ្សារផ្តាច់មុខបានទេ យើងត្រូវត្រៀមខ្លួនសម្រាប់ការប្រកួតប្រជែងក្នុងទីផ្សារ»។
លោក ឃឿន ស៊ុនធាន អ្នកផលិតអំបិលមួយរូប ដែលមានស្រែអំបិល ១៦ ហិកតា ក្នុងខេត្តកំពត និងដែលមិនចង់ឲ្យការរំលាយសហគមន៍អំបិលបាននិយាយថា ការមានសហគមន៍នឹងជួយឲ្យតម្លៃមានស្ថិរភាព ហើយកសិករក៏អាចទទួលបានជំនួយជាហិរញ្ញវត្ថុផងដែរ។
លោកបានដាក់ការសង្ស័យថា បំណងនៃការចង់រំលាយសហគមន៍នេះទំនងជាមានការខ្វែងគំនិតគ្នាក្នុងសហគមន៍។ លោកថ្លែងថា៖ «បញ្ហាអាចនៅក្នុងចំណោមក្រុមគ្រប់គ្រងសហគមន៍ ខណៈកន្លងមកមានសមាជិកខ្លះមិនអាចស្នើជំនួយជាហិរញ្ញវត្ថុតាមដែលពួកគេចង់បាន ហើយ ទីផ្សារចេះតែដាំក្បាលចុះ»។
លោកបានបន្តថា៖ «ទោះបីយើងមានបញ្ហា តែខ្ញុំសង្ឃឹមថា ក្រសួងនឹងស្វែងរកដំណោះស្រាយបាន»៕