ធនាគារ ភីភីស៊ីប៊ែង ដែលជាធនាគារកូរ៉េខាងត្បូង បានប្រកាសពីការចាត់តាំងប្រធាននាយកប្រតិបត្តិថ្មីរបស់ខ្លួន គឺលោក Baek Jongil ដែលនឹងចាប់ផ្ដើមចូលកាន់ការិយាល័យនៅខែមេសាឆ្នាំ ២០២១ នេះ។
លោក Baek Jongil ក៏ធ្លាប់ជាប្រធាននាយកប្រតិបត្តិរបស់ក្រុមហ៊ុន JB Asset Management ដែលជាក្រុមហ៊ុនបុត្រសម្ព័ន្ធ របស់សម្ព័ន្ធ Jeonbuk Financial ដែលជាម្ចាស់ភាគហ៊ុនធំរបស់ធនាគារ ភីភីស៊ីប៊ែង ផងដែរ។
លោក Baek Jongil ដែលនឹងបន្តដំណែងពីលោក Shin Chang Moo ធ្លាប់មានបទពិសោធន៍រយៈពេល ៣០ ឆ្នាំ ក្នុងវិស័យហិរញ្ញវត្ថុ។ លោកក៏ធ្លាប់ជាសមាជិកម្នាក់ក្នុងក្រុមប្រឹក្សាភិបាលរបស់ធនាគារ ភីភីស៊ីប៊ែង កាលពីខែកញ្ញា ឆ្នាំ ២០១៦ រហូតដល់ខែ សីហា ឆ្នាំ ២០១៩ ហើយក៏បានមកទស្សនៈកិច្ចប្រទេសកម្ពុជាក្នុងឳកាសផ្សេងៗជាច្រើនលើកផងដែរ។
លោក Baek Jongil បានមានប្រសាសន៏ថា ខ្ញុំពិតជារំភើបចំពោះឳកាសនេះដែលអាចឲ្យ ខ្ញុំយល់ច្បាស់ និងអាចជួយជំរុញលើការអភិវឌ្ឍនៃវិស័យធនាគារនៅប្រទេសកម្ពុជា។ ហើយខ្ញុំចាប់ផ្តើមការងារក្នុងពេលដ៏លំបាកមួយដែលទីក្រុងភ្នំពេញ និង តាខ្មៅ កំពុងស្ថិតនៅក្នុងការបិទខ្ទប់ដោយសារព្រឹត្តិការណ៍ ២០ កុម្ភៈនៃការផ្ទុះវីរុសកូវីដ១៩។ ជំងឺរាតត្បាតសាកលនេះបាននឹងកំពុងបង្កផលប៉ះពាល់ដល់មនុស្សលោក និងបណ្ដាលប្រទេសទូទាំងសកលលោក។ ម្ចាស់ភាគហ៊ុនរបស់ធនាគារចង់ផ្ញើសារតាមរយៈខ្ញុំ ថាពួកយើងប្ដេជ្ញាចិត្តនៅតែបម្រើសេវាហិរញ្ញវត្ថុដល់ប្រជាជនកម្ពុជាជានិច្ចទោះស្ថិតក្នុងស្ថានការណ៍បែបណាក៏ដោយ។
នៅឆ្នាំ ២០២០ ទ្រព្យសកម្មសរុបរបស់ធនាគារ ភីភីស៊ីប៊ែង បានកើនរហូតដល់ជាង ១ ពាន់លានដុល្លារអាមេរិក ហើយធនាគារក៏បានប្រកាសពីប្រាក់ចំណេញសុទ្ធជាង ១៦ លានដុល្លារអាមេរិកដែលមានភាគហ៊ុនសរុប ១៥៥.០៥៥ លានដុល្លារអាមេរិក។
លោកបានបន្ថែមទៀតថា បើទោះបីជាមានវិបត្តិសេដ្ឋកិច្ចសកលដែលបណ្ដាលមកពីវីរុសកូវីដ១៩ ក៏ដោយ តែយើងនៅតែអាចដំណើរការទៅយ៉ាងប្រក្រតី ដោយមានការជឿទុកចិត្ត និងគាំទ្រពីសំណាក់អតិថិជនរបស់យើង។ យើងសូមថ្លែងអំណរគុណយ៉ាងជ្រាលជ្រៅនូវរាល់ជំនឿទុកចិត្តរបស់លោកអ្នកមកលើធនាគារ ភីភីស៊ីប៊ែង។ យើងនឹងបន្តអភិវឌ្ឍបន្ថែមនូវរាល់ផលិតផល និងសេវាកម្មរបស់យើងតាមរយៈការវិភាគទិន្នន័យឲ្យបានម៉ត់ចត់ ដើម្បីបង្កើនប្រសិទ្ធភាពនិងផលិតភាពនៃសេវាកម្មរបស់យើង ដោយធានាបាននូវសុវត្ថិភាពនិងភាពងាយស្រួលដល់អតិថិជន។
ចូលទៅកាន់តំណនេះ សម្រាប់សារពីលោកប្រធាននាយកប្រតិបត្តិ៖ https://www.ppcbank.com.kh/km/president-message/
អំពីធនាគារភីភីស៊ីប៊ែង (PPCBank)
ធនាគារ ភីភីស៊ីប៊ែង គឺជាធនាគាររបស់ប្រទេសកូរ៉េខាងត្បូងមួយដែលត្រូវបានបង្កើតឡើងនៅខែកញ្ញា ឆ្នាំ២០០៨ ដែលជាក្រុមហ៊ុនបុត្រសម្ព័ន្ធមួយនៃក្រុមហ៊ុន JB Financial Group និងក្រុមហ៊ុន Apro Financial Co។ ធនាគារ ភីភីស៊ីប៊ែង កំពុង ធ្វើប្រតិបត្ដិការនៅទូទាំងប្រទេសកម្ពុជាតាមរយៈសាខាចំនួន ១៦ សាខានៅរាជធានីភ្នំពេញ និងសាខាចំនួនប្រាំពីរ នៅតាមបណ្ដាលខេត្តសំខាន់ៗមួយចំនួន និងមានទូ ATM សរុបចំនួន ៦៥។
ធនាគារ ភីភីស៊ីប៊ែង បានផ្តល់ជូនសេវាធនាគារដែលរួមមានទាំងសេវាធនាគារលក្ខណៈប្រពៃណី និងបែបឌីជីថលរាប់បញ្ចូលទាំងសេវាប្រាក់បញ្ញើ ឥណទាន សេវាកម្មឌីជីថល smartBiz និងសេវាប្រឹក្សាយោបល់អតិថិជនទាំងនៅក្នុង និងក្រៅសាខាផងដែរ។ ក្នុងឆ្នាំ ២០២០ ធនាគារ ភីភីស៊ីប៊ែង បានចុះបញ្ជីមូលបត្រក្រុមហ៊ុនក្នុងផ្សារមូលបត្រកម្ពុជា។
ធនាគារ ភីភីស៊ីប៊ែង ចូលរួមគាំទ្រយ៉ាងសកម្មក្នុងកម្មវិធីទំនួលខុសត្រូវសង្គម (CSR Initiative) ដោយក្លាយជាធនាគារដំបូងបង្អស់ដែលបានផ្តួចផ្តើមគំនិតក្នុងការលើកកម្ពស់បុគ្គលិកដែលមានពិការភាព តាមរយៈកិច្ចសហការ និងអនុញ្ញាតិឲ្យមានហាងកាហ្វេ Socials Coffee នៅក្នុងអគារការិយាល័យរបស់ខ្លួន។ បន្ថែមពីនេះទៅទៀត កម្មវិធីទំនួលខុសត្រូវសង្គមរបស់ធនាគារក៏បានគាំទ្រដល់អង្គការសម្អាតមីននៅកម្ពុជា ដូចជា អង្គការ APOPO និង កណ្តុរហិតមីន «HeroRATs» ដែលកំពុងធ្វើការបោសសម្អាតមីន ដើម្បីលុបបំបាត់គ្រាប់មីននៅប្រទេសកម្ពុជា៕