.jpg)
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) កាលពីឆ្នាំ ២០១៧ កន្លងទៅ បានផ្តល់សិទិ្ធដល់គម្រោងស្នើសុំវិនិយោគសរុបទាំងក្នុងស្រុក និងបរទេស មានតម្លៃជាទឹកប្រាក់ ៦,៣ ពាន់លានដុល្លារកើនឡើងយ៉ាងខ្លាំងពី ៣,៦ ពាន់លានដុល្លារកាលពីឆ្នាំ ២០១៦។ នេះបើតាមរបាយការណ៍របស់សារព័ត៌មានសេដ្ឋកិច្ចជប៉ុន Nikkei Asian Review។
Nikkei Asian Review បានចេញផ្សាយរបាយការណ៍នេះបន្ទាប់ពីបានធ្វើបទសម្ភាសផ្ទាល់ជាមួយលោក សុខ ចិន្តាសោភា អគ្គលេខាធិការ CDC នៅទីក្រុងតូក្យូប្រទេសជប៉ុនកាលពីដើមសប្តាហ៍មុន។
របាយការណ៍ Nikkei Asian Review បានបង្ហាញពីនិន្នាការនៃការអនុម័តលើគម្រោងស្នើសុំវិនិយោគនៅកម្ពុជាតាំងពីឆ្នាំ ២០១៣ មកតាមរយៈក្រាហ្វិកហើយបានបង្ហាញថា ក្នុងចំណោមទឹកប្រាក់សរុបនៅឆ្នាំ ២០១៧ វិនិយោគដែលស្នើឡើងដោយពាណិជ្ជករក្នុងស្រុកមានពាក់កណ្តាល ខណៈពាក់កណ្តាលផ្សេងទៀតជាគម្រោងស្នើសុំវិនិយោគដោយផ្ទាល់ពីបរទេស (FDI) ដែលភាគច្រើនជាគម្រោងស្នើសុំវិនិយោគពីវិនិយោគិនជនជាតិចិន។ យ៉ាងណាក៏ដោយក្រាហ្វិកនោះមិនបានបែកចែងគម្រោងវិនិយោគតាមវិស័យនោះទេ។
យោងតាមការឲ្យដឹងពីលោក សុខ ចិន្តាសោភា ក្នុងសេចក្តីរាយការណ៍របស់ Nikkei Asian Review កម្ពុជាចាប់ផ្តើមមានឯករាជភាពផ្នែកថាមពលអគ្គិសនីចាប់ពីឆ្នាំ ២០១៨ នេះតទៅ ហើយតម្លៃអគ្គិសនីនឹងបន្តធ្លាក់ចុះសម្រាប់ការធ្វើពាណិជ្ជកម្ម ដើម្បីប៉ះប៉ូវទៅដល់កំណើនថ្លៃឈ្នួលអប្បបរមាដែលបន្តកើនឡើងពីមួយឆ្នាំទៅមួយឆ្នាំ៕
