ភ្នំពេញៈ អ្នកក្នុងវិស័យឧស្សាហកម្មហិរញ្ញវត្ថុប្រកាសស្វាគមន៍ការដាក់ឱ្យដំណើរការជាផ្លូវការនៃគម្រោងធានាឥណទាន ដើម្បីស្ដារអាជីវកម្ម (BRGS) របស់សាជីវកម្មធានាឥណទានកម្ពុជា (CGCC) មានដើមទុន ២០០ លានដុល្លារ ដើម្បីផ្ដល់លទ្ធភាពកាន់តែច្រើនសម្រាប់សហគ្រាសធុនតូច និងមធ្យមសម្រាប់កម្ចីកាន់តែច្រើន និងកាន់តែងាយស្រួលក្នុងការរក្សានិរន្តរភាពអាជីវកម្មរបស់ពួកគេ ដោយសារតែពេលវេលាដ៏ពិបាកនៃវិបត្តិសុខភាពនេះ។
សាជីវកម្មធានាឥណទានកម្ពុជា (CGCC) ត្រូវបានដាក់ឱ្យដំណើរការកាលពីថ្ងៃទី ២៩ ខែមីនា ដោយក្រសួងសេដ្ឋកិច្ច និងហិរញ្ញវត្ថុក្នុងគោលដៅគាំទ្រអាជីវកម្មទាំងអាជីវកម្មមីក្រូខា្នតតូច និងមធ្យម និងអាជីវកម្មខា្នតធំក្នុងការពង្រីកលទ្ធភាពទទួលបានហិរញ្ញប្បទានពីគ្រឹះស្ថានហិរញ្ញវត្ថុចូលរួម (PFIs) សម្រាប់ការកៀរគរទុនបង្វិល វិនិយោគ និងការពង្រីកអាជីវកម្ម។
យោងតាមសេចក្ដីប្រកាសព័ត៌មានដែល ភ្នំពេញ ប៉ុស្ដិ៍ ទទួលបាន «គំនិតផ្តួចផ្ដើមនេះស្របនឹងគោលនយោបាយរបស់រាជរដ្ឋាភិបាលក្នុងការគាំទ្រនិរន្តរភាព និងការងើបឡើងវិញនៃសេដ្ឋកិច្ចក្នុងអំឡុងពេលនៃវិបត្តិជំងឺកូវីដ១៩។
CGCC គឺជាក្រុមហ៊ុនធានាឥណទានដំបូងគេនៅកម្ពុជាដែលបង្កើតឡើងដោយ លោកនាយករដ្ឋមន្ដ្រី ហ៊ុន សែន ជាសហគ្រាសសាធារណៈក្រោមអាណាព្យាបាលបច្ចេកទេស និងហិរញ្ញវត្ថុរបស់ក្រសួងសេដ្ឋកិច្ច និងហិរញ្ញវត្ថុ។ បេសកកម្មចម្បងរបស់ CGCC គឺផ្ដល់ការធានាឥណទានដល់ PFIs ដើម្បីគាំទ្រដល់អាជីវកម្មដែលមានលទ្ធភាពសង ប៉ុន្តែខ្វះទ្រព្យបញ្ចាំ នៅពេលស្នើសុំឥណទាន។
លោក រស់ សីលវ៉ា រដ្ឋលេខាធិការ និងជាប្រធានក្រុមប្រឹក្សាភិបាលរបស់សាជីវកម្មធានាឥណទានកម្ពុជាបញ្ជាក់ថា ការដាក់ឱ្យដំណើរការ BRGS របស់សាជីវកម្មធានាឥណទានកម្ពុជាគឺចំពេលក្នុងការគាំទ្រដល់អាជីវកម្មដែលគ្រោងស្នើសុំឥណទានពី PFIs ក្នុងអំឡុងពេលនៃវិបត្តិជំងឺកូវីដ ១៩។
លោកថ្លែងថា៖ «គម្រោងនេះនឹងចូលរួមគាំទ្រគោលនយោបាយរក្សាកំណើនសេដ្ឋកិច្ចប្រកបដោយចីរភាព និងបរិយាប័ន្នរបស់រាជរដ្ឋាភិបាល និងស្របតាមគោលនយោបាយអភិវឌ្ឍន៍វិស័យឧស្សាហកម្មឆ្នាំ ២០១៥-២០២៥។ លោកស្នើឱ្យធនាគារ និងគ្រឹះស្ថានមីក្រូហិរញ្ញវត្ថុគាំទ្រ CGCC តាមរយៈការចូលរួមក្នុង PFIs និងពង្រឹងអភិបាលកិច្ចឥណទាន»។
លោក អ៊ិន ចាន់នី ប្រធាននាយកប្រតិបត្តិការធនាគារអេស៊ីលីដាដែលជាសមាជិករបស់ PFIs សាទរចំពោះវិធានការដែលដាក់ចេញដោយរដ្ឋាភិបាល ជាជំហានមួយឆ្ពោះទៅរកការបង្កើនកម្ចីកាន់តែច្រើនដល់វិស័យ SMEs។
លោកប្រាប់ថា៖ «ការធានាឥណទានមានសារៈសំខាន់ខ្លាំងណាស់សម្រាប់អតិថិជនដែលមានផែនការអាជីវកម្មល្អ ប៉ុន្តែមិនមានទ្រព្យបញ្ចាំសម្រាប់កម្ចីពេញលេញ ដែលពួកគេត្រូវការ។ ដូច្នេះពួកគេអាចស្វែងរកសេវាធានាឥណទានបាន»។ លោកបន្តថា៖ «ផែនការប្រភេទនេះគួរតែត្រូវបានដាក់ឱ្យដំណើរការយូរមកហើយ ព្រោះវានឹងជួយដល់អតិថិជន/អ្នកខ្ចីប្រាក់ សហគ្រិន ដើម្បីធ្វើឱ្យអាជីវកម្មពួកគេរីកចម្រើន ជាមួយសន្ដិសុខកម្ចីអ្នកផ្សេងទៀត»។
លោក តូច ចៅចេក អគ្គនាយកធនាគារប្រៃសណីយ៍កម្ពុជាដែលធនាគារនេះជា PFIs ក្នុងចំណោម PFIs ដែរនោះបានឱ្យដឹងថា ការដាក់ឱ្យដំណើរការនេះ នឹងផ្ដល់លទ្ធភាពកាន់តែច្រើនសម្រាប់ SMEs ក្នុងស្រុកដែលមិនមានទ្រព្យបញ្ចាំគ្រប់គ្រាន់ក្នុងការទទួលបានកម្ចីចំនួនច្រើន។
លោកថ្លែងថា៖ «វាជាជំហានដ៏ល្អបំផុតមួយដោយរដ្ឋាភិបាលអនុញ្ញាតឱ្យ SMEs មានលទ្ធភាពកាន់តែច្រើនក្នុងការទទួលបានកម្ចីចំនួនច្រើនជាមួយនឹងផែនការនេះ ទោះបីពួកគេមិនមានទ្រព្យបញ្ចាំគ្រប់គ្រាន់ ដែលជាការបារម្ភដ៏សំខាន់របស់ពួកគេ។ វាជាផែនការដ៏ល្អ ធ្វើឡើងត្រូវនឹងស្ថានការណ៍បច្ចុប្បន្ន»។
កម្ចីលើកដំបូងរបស់ BRGS នឹងរួមចំណែកដល់ការបង្កើន ២០០ លានដុល្លារនៃកម្ចីថ្មីនៅក្នុងវិស័យធនាគារដែលម្ចាស់អាជីវកម្មខ្ចីពី PFIs របស់ CGCC មានដូចជា ធនាគារអេស៊ីលីដា ធនាគារអភិវឌ្ឍន៍អាស៊ីប៉ាស៊ីហ្វិក AMK MFI ធនាគារប្រៃសណីយ៍កម្ពុជា ធនាគារ Phillip និងធនាគារ Prince ។
ផែនការនេះក៏នឹងអាចរកបានផងដែរនៅធនាគារ និង MFIs ផ្សេងទៀតដែលកំពុងស្ថិតក្នុងនីតិវិធីនៃការក្លាយជា PFIs របស់ CGCC។ ការធានារបស់ CGCC នឹងដើរតួនាទីជាទ្រព្យបញ្ចាំ/សន្ដិសុខ សម្រាប់ចំនួនកម្ចីពី ៧០-៨០ ភាគរយ ដែលខ្ចីពី PFIs ដូច្នេះការកាត់បន្ថយទ្រព្យបញ្ចាំរូបវន្តដែលត្រូវការពីអ្នកខ្ចី។
អាជីវកម្មដែលគ្រប់គ្រងដោយវិនិយោគិនកម្ពុជា (គ្រប់គ្រង ៥០ ភាគរយ) អាចទាក់ទង PFIs ខាងលើសម្រាប់ផែនការរបស់ CGCC ឬចូលទៅគេហទំព័រ www.cgcc.com.kh របស់ CGCC ដើម្បីទទួលបានព័ត៌មានបន្ថែម។ នេះបើតាមសេចក្ដីប្រកាសព័ត៌មានបានពីក្រសួងសេដ្ឋកិច្ច៕ LA