ភ្នំពេញៈ គ្រឹះស្ថានអង្គរដែលគ្រប់គ្រងការលក់សំបុត្រចូលទស្សនាប្រាសាទក្នុងតំបន់អង្គរ បានដាក់ចេញនូវគោលនយោបាយលើកទឹកចិត្តដល់ភ្ញៀវទេសចរអាចទិញសំបុត្រចូលទស្សនារមណីយដ្ឋានអង្គរបានកាន់តែយូរជាងមុន។
សេចក្តីជូនដំណឹងរបស់គ្រឹះស្ថានអង្គរចេញផ្សាយកាលពីថ្ងៃទី ១០ ខែមីនា ថា ការអនុវត្តគោលនយោបាយលើកទឹកចិត្តនៃការលក់បណ្ណចូលទស្សនារមណីយដ្ឋានអង្គរមានចំនួន ២ ប្រភេទគឺបណ្ណធម្មតា និងបណ្ណរយៈពេលវែង (ភ្ញៀវបរទេសដែលមានទិដ្ឋាការរយៈពេល ៣ ខែឡើងទៅ)។
សេចក្តីជូនដំណឹងឱ្យដឹងថា ចំពោះបណ្ណធម្មតា អ្នកទិញបណ្ណចូលទស្សនារមណីយដ្ឋានអង្គរ ១ ថ្ងៃ អាចចូលទស្សនាបានរយៈពេល ២ ថ្ងៃ សម្រាប់ការទិញបណ្ណចូលទស្សនា ៣ ថ្ងៃ អាចចូលទស្សនាបាន ៥ ថ្ងៃ និងទិញបណ្ណ ៧ ថ្ងៃ អាចចូលទស្សនាបាន ១០ ថ្ងៃ។
ដោយឡែកប្រភេទបណ្ណរយៈពេលវែងសម្រាប់អ្នកទិញបណ្ណចូលទស្សនារមណីយដ្ឋានអង្គររយៈពេល ១ ខែអាចចូលទស្សនាបាន ២ ខែ ទិញបណ្ណរយៈពេល ៣ ខែអាចចូលទស្សនាបានរយៈពេល ៦ ខែ និងទិញបណ្ណរយៈពេល ៦ ខែអាចចូលបាន ១២ ខែ។
សេចក្តីជូនដំណឹងថា៖ «ការអនុវត្តគោលនយោបាយនេះ គឺដើម្បីសម្រួលដល់វិស័យទេសចរណ៍ និងធានាភាពទាក់ទាញភ្ញៀវទេសចរមកទស្សនារមណីយដ្ឋានអង្គរក្នុងអំឡុងពេលមានវិបត្តិជំងឺកូវីដ១៩»។
គោលនយោបាយលើកទឹកចិត្តនេះចាប់អនុវត្តពីថ្ងៃ ១១ ខែមីនា ដល់ថ្ងៃទី ៣១ ខែ ធ្នូ ឆ្នាំ ២០២១។
សំបុត្រចូលទស្សនាក្នុងរមណីយដ្ឋានអង្គរ ១ ថ្ងៃមានតម្លៃ ៣៧ ដុល្លារ សំបុត្រ ៣ ថ្ងៃ មានតម្លៃ ៦២ ដុល្លារ និងរយៈពេល ៧ ថ្ងៃ តម្លៃ ៧២ ដុល្លារ។ នេះបើយោងតាមតារាងតម្លៃនៅគេហទំព័ររបស់គ្រឹះស្ថានអង្គរ។
ទិន្នន័យពីគ្រឹះស្ថានអង្គរឱ្យដឹងថា ភ្ញៀវទេសចរទិញបណ្ណចូលទស្សនារមណីយដ្ឋានអង្គរក្នុងរយៈពេល ២ ខែដំបូងឆ្នាំនេះមានចំនួន ៤ ១៩៤ នាក់ធ្លាក់ចុះ ៩៨,៧៧ ភាគរយ ធៀបរយៈពេលដូចគ្នាឆ្នាំមុន។ ចំណែកប្រាក់ពីការលក់សំបុត្រចូលទស្សនាមានចំនួនសរុប ១៧២ ៨២៣ ដុល្លារ ធ្លាក់ ៩៨,៩៣ ភាគរយ។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) កត់សម្គាល់ថា ការអនុវត្តគោលនយោបាយនេះនឹងអាចទាក់ទាញបានតែភ្ញៀវទេសចរបរទេសរស់នៅកម្ពុជាប៉ុណ្ណោះ។
អ្នកស្រីនិយាយថា៖ «ក្នុងអំឡុងពេលនេះ យើងអាចទាក់ទាញបានភ្ញៀវទេសចរបរទេសនៅក្នុងស្រុក ប៉ុន្តែភ្ញៀវទេសចរពីក្រៅប្រទេសនឹងមិនទាន់អាចទាក់ទាញបានទេ ព្រោះយើងនៅតែបន្តបិទទិដ្ឋាការសម្រាប់ទេសចរណ៍»។
អ្នកស្រី ស៊ីវលីន បានសង្កេតឃើញថា ជនបរទេសដែលរស់នៅកម្ពុជាក៏មានចំនួនតិចតួចស្របពេលពួកគេមាននិន្នាការរឹតត្បិតការចំណាយ និងការធ្វើដំណើរក្នុងអំឡុងពេលការរីករាលដាលជំងឺកូវីដ ១៩។
អ្នកស្រី ស៊ីវលីន បានបញ្ជាក់ថា៖ «ខ្ញុំសង្ឃឹមថា គោលនយោបាយនេះនឹងទាក់ទាញភ្ញៀវទេសចរបានច្រើន បន្ទាប់ពីស្ថានភាពការឆ្លងកូវីដ១៩ មានភាពល្អប្រសើរឡើងវិញ»។
ក្នុងឆ្នាំ ២០២០ ភ្ញៀវទេសចរបរទេសទិញបណ្ណចូលទស្សនារមណីយដ្ឋានអង្គរមានសរុប ៤០០ ៨៨៩ នាក់ធ្លាក់ ៨១,៨២ ភាគរយធៀបឆ្នាំ ២០១៩។ ជាមួយនេះចំណូលបានពីការលក់សំបុត្រមានចំនួន ១៨ ៦៥៤ ៨២៨ ដុល្លារ ធ្លាក់ចុះ ៨១,១៧ ភាគរយធៀបនឹងឆ្នាំ ២០១៩។ នេះបើតាមរបាយការណ៍របស់គ្រឹះស្ថានអង្គរ។
កាលពីចុងខែមករា រដ្ឋមន្ត្រីក្រសួងទេសចរណ៍លោក ថោង ខុន បានឱ្យដឹងថា ក្នុងឆ្នាំ ២០២០ កម្ពុជាទទួលបានភ្ញៀវទេសចរអន្តរជាតិប្រហែល ១,៣១ លាននាក់ ធ្លាក់ពី ៦,៦១ លាននាក់កាលពីឆ្នាំ ២០១៩។ ការថយចុះចំនួនភ្ញៀវនេះគឺដោយសារពិភពលោកជួបនូវវិបត្តិជំងឺកូវីដ ១៩។ លោកថ្លែងថា៖ «ស្ថិតក្នុងបរិការណ៍ប្រឈមនេះធ្វើឱ្យកម្ពុជាទទួលបានភ្ញៀវទេសចរអន្តរជាតិត្រឹមប្រមាណ ១,៣១ លាននាក់ ក្នុងឆ្នាំ ២០២០ ថយចុះ ៨០ ភាគរយ ធៀបនឹងឆ្នាំ ២០១៩»៕ LA