.jpg)
អ្នកស្រី Hua Chunying អ្នកនាំពាក្យក្រសួងការបរទេសចិន។ រូបថត AFP
ក្រុងប៉េកាំងៈ ប្រទេស ចិន កាលពីថ្ងៃពុធបានបន្ទរតាមការអត្ថាធិប្បាយរបស់លោកប្រធានាធិបតី ដូណាល់ ត្រាំ ដោយនិយាយថា មិនមានកាលបរិច្ឆេទកំណត់សម្រាប់ការចុះហត្ថលេខាលើកិច្ចព្រមព្រៀងពាណិជ្ជកម្មរវាងអាមេរិក និងចិនឡើយ ខណៈភាពតានតឹងកើនឡើងរវាងប្រទេសទាំងពីរ។
កាលពីថ្ងៃអង្គារលោក ត្រាំ បានព្រមាណថា កិច្ចប្រឹងប្រែងដោះស្រាយជម្លោះរវាងប្រទេសមហាអំណាចសេដ្ឋកិច្ចទាំងពីរអាចបន្តទៅបានបន្ទាប់ពីការបោះឆ្នោតប្រធានាធិបតីអាមេរិកនៅខែវិច្ឆិកាឆ្នាំក្រោយដែលជំរុញឲ្យមានការលក់ចេញភាគហ៊ុននៅទីផ្សារពិភពលោក។
នៅពេលសួរអំពីការអត្ថាធិប្បាយរបស់លោក ត្រាំ ក្រសួងការបរទេសចិនបានឲ្យដឹងថា ទីក្រុងប៉េកាំងក៏ដូច្នេះមិនមានកាលបរិច្ឆេទបញ្ចប់សង្គ្រាមពាណិជ្ជកម្មដែលអូសបន្លាយពេលនេះទេ ដែលការចរចាម្តងធ្វើម្តងអត់នេះបានបង្កផលប៉ះពាល់ដល់ទីផ្សារ និងជំរុញឲ្យមានភាពតានតឹងផ្នែកភូមិសាស្ត្រនយោបាយ។
អ្នកស្រី Hua Chunying អ្នកនាំពាក្យក្រសួងការបរទេសចិនថ្លែងថា៖ «យើងនឹងមិនកំណត់ពេលណាមួយថាតើនៅពេលណាកិច្ចព្រមព្រៀងនឹង ឬនឹងមិនសម្រេចបានឡើយ»។
អ្នកស្រីថ្លែងប្រាប់ក្រុមអ្នកយកព័ត៌មាននៅសន្និសីទខ្លីមួយក្នុងទីក្រុងប៉េកាំងថា៖ «កិច្ចព្រមព្រៀងនេះ និងការចរចាទាំងនេះត្រូវតែមានមូលដ្ឋានលើគុណភាព និងការគោរពគ្នាទៅវិញទៅមក»។
អ្នកស្រីបន្ថែមថា៖ «បើយើងប្រឈមនឹងសម្ពាធនៃឯកតោភាគីនិយម កិច្ចគាំពារនិយម និងការយាយីផ្នែកពាណិជ្ជកម្ម យើងនឹងមិនមានជម្លោះទេ ហើយត្រូវតែចាត់វិធានការតឹងរ៉ឹង និងចុងក្រោយ ដើម្បីការពារអត្ថប្រយោជន៍ស្របច្បាប់របស់យើង»៕ KC
