ភ្នំពេញៈ ចំនួនស៊ីមកាតទូរស័ព្ទចល័តដែលផ្តល់ដោយក្រុមហ៊ុនទូរគមនាគមន៍ចំនួន ៦ នៅក្នុងប្រទេសកម្ពុជាគិតត្រឹមខែសីហាឆ្នាំ ២០១៨ មានចំនួនជាង ១៩ លានស៊ីមកាតស្មើនឹងជាង ១១៨ ភាគរយនៃចំនួនប្រជាជន ខណៈដែលចំនួននៃការប្រើប្រាស់ទូរស័ព្ទលើតុបានកើនដល់ ១០២ ៧៧៥ នាក់។ នេះបើយោងតាមទិន្នន័យពីនិយតករទូរគមនាគមន៍កម្ពុជា (TRC) ដែលបានបង្ហាញនៅលើទំព័រហ្វេសប៊ុកកាលពីថ្ងៃម្សិលមិញ។
លោក អ៊ឹម វុត្ថា សមាជិកនិយ័តករទូរគមនាគមន៍កម្ពុជា (នទក) និង ជាអ្នកនាំពាក្យនៃនិយ័តករទូរគមនាគមន៍កម្ពុជា បានឲ្យដឹងកាលពីម្សិលមិញថា ការប្រើប្រាស់អ៊ីនធឺណិត និងនៅតែមានឱកាសច្រើនចំពោះកំណើនបន្ថែមទៀត។
លោកបានថ្លែងថា៖ «តម្រូវការរបស់អ្នកប្រើស៊ីមកាតចល័តគឺនៅតែមានច្រើន ប៉ុន្តែនឹងមិនកើនឡើងខ្លាំងទៀតទេ ដោយសារតែវាកំពុងស្ថិតលើកំណើនខ្លាំងរបស់ខ្លួន»។ លោកបានបន្តទៀតថា៖ «ដោយសារនិន្នាការតម្រូវការ ក្រុមហ៊ុនផ្គត់ផ្គង់អ៊ីនធឺណិតនៅតែមានសក្ដានុពលកំណើនបន្ថែមទៀត»។
បើតាមលោក អ៊ឹម វុត្ថា ចំនួនអ្នកជាវអ៊ីនធឺណិតតាមទូរស័ព្ទចល័តបានកើនឡើងដល់ ១២ លាននាក់ស្មើនឹង ៧៥,២៧ ភាគរយ បើធៀបនឹងប្រជាជនទាំងអស់ ខណៈអ្នកជាវអ៊ីនធឺណិតភ្ជាប់ខ្សែបានកើនឡើង ១៣២ ៨៨៩ នាក់ ស្មើនឹង ០,៨២ ភាគរយនៃចំនួនប្រជាជន។
យោងតាមទិន្នន័យបានពីនិយតករទូរគមនាគមន៍កម្ពុជាបច្ចុប្បន្នប្រទេសកម្ពុជាមានប្រតិបត្តិករទូរស័ព្ទចល័តចំនួន ៦ ខណៈដែលប្រតិបត្តិករអ៊ីនធឺណិតចល័តមានចំនួន ៧ និងប្រតិបត្តិករអ៊ីនធឺណិតភ្ជាប់ខ្សែមានចំនួន ៣៤។
យោងតាមទិន្នន័យដដែលបានឲ្យដឹងថា កំណត់ត្រានៃការប្រើប្រាស់ហ្វេសប៊ុកក្នុងប្រទេសនេះចាប់ពីខែមករាដល់សីហា មានគណនី ៦,៨ លាននៅក្នុងប្រទេសកម្ពុជា៕LA