ភ្នំពេញៈ កម្ពុជានឹងធ្វើវិសោធនកម្ម «ច្បាប់ស្តីពីសហគ្រាសពាណិជ្ជកម្ម និងច្បាប់ស្តីពីវិធានពាណិជ្ជកម្ម និងបញ្ជីពាណិជ្ជកម្ម» ក្នុងពេលឆាប់ៗក្រោយពីទទួលបានការឯកភាពជាគោលការណ៍ពីគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ (គ.ស.ហ) ក្នុងគោលបំណងដើម្បីលើកកម្ពស់ភាពទាក់ទាញសម្រាប់ការវិនិយោគនៅកម្ពុជាបន្ថែមទៀត។
ក្នុងកិច្ចប្រជុំដែលបានរៀបចំឡើងកាលពីថ្ងៃទី ១៨ ខែមករា នៅទីស្តីការក្រសួងសេដ្ឋកិច្ច និងហិរញ្ញវត្ថុមានការចូលរួមពីលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ (គ.ស.ហ) និងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ព្រមទាំងថ្នាក់ដឹកនាំជាន់ខ្ពស់ក្រសួងពាក់ព័ន្ធមួយចំនួនទៀត។
សេចក្តីប្រកាសព័ត៌មានកិច្ចប្រជុំ គ.ស.ហ បានឱ្យដឹងថា ការធ្វើវិសោធនកម្មច្បាប់ទាំង ២ គឺក្នុងគោលបំណងដើម្បីលើកកម្ពស់កំណើនសេដ្ឋកិច្ចកម្ពុជា តាមរយៈការបង្កភាពងាយស្រួលនៃការធ្វើធុរកិច្ចដោយមានរៀបចំប្រព័ន្ធបច្ចេកវិទ្យាព័ត៌មានរួមសម្រាប់ការចុះបញ្ជីអាជីវកម្ម (ហៅកាត់ប្រព័ន្ធ CamDX) ដោយរលូន និងប្រសិទ្ធភាព ការបំពេញបន្ថែមបទប្បញ្ញត្តិ និងនីតិវិធីឱ្យមានភាពច្បាស់លាស់សម្រាប់ទ្រទ្រង់យន្តការដែលកំពុងអនុវត្ត និងធានាសង្គតិភាពរវាងច្បាប់ទាំង ២។
ទោះយ៉ាងណា គ.ស.ហ ក៏បានជំរុញឱ្យក្រុមការងារត្រូវបន្តរៀបចំអនុសាសន៍បន្ថែម ដើម្បីបន្តនីតិវិធីស្នើសុំការអនុម័តពីប្រមុខរាជរដ្ឋាភិបាល។
អ្នកនាំពាក្យក្រសួងពាណិជ្ជកម្មលោក ឡុង កែមវិចិត្រ បានប្រាប់ ភ្នំពេញ ប៉ុស្តិ៍ កាលពីថ្ងៃទី ១៩ ខែមករា ថា ការធ្វើវិសោធនកម្មច្បាប់ទាំង ២ នឹងជួយលើកកម្ពស់បរិយាកាសធុរកិច្ចនៅកម្ពុជា ជាពិសេសបំពេញបន្ថែមបទប្បញ្ញត្តិថ្មីៗ និងនីតិវិធីមួយចំនួន ដើម្បីទ្រទ្រង់ដល់យន្តការដែលបាននិងកំពុងអនុវត្ត និងសម្រួលដល់ការធ្វើធុរកិច្ចនៅកម្ពុជាក៏ដូចជាផ្ដល់ភាពច្បាស់លាស់នៃច្បាប់ និងធ្វើឱ្យរឹតតែមានភាពងាយស្រួលក្នុងការបើកសហគ្រាសពាណិជ្ជកម្ម ឬក្រុមហ៊ុន។
លោកបានថ្លែងថា៖ «យើងសង្ឃឹមថា ការកែសម្រួលបទប្បញ្ញត្តិ និងនីតិវិធីទាំងនោះនឹងចូលរួមចំណែកដល់ការទាក់ទាញ វិនិយោគិនរឹតតែច្រើនឡើងឱ្យចូលមកវិនិយោគនៅកម្ពុជា»។
អនុប្រធានសភាពាណិជ្ជកម្មកម្ពុជាលោក លឹម ហេង បានប្រាប់ថា ការកែសម្រួលនីតិវិធី និងបែបបទនៃការរៀបចំ និងដំណើរការអាជីវកម្ម គឺជាក្តីប្រាថ្នាដែលវិស័យឯកជនចង់បានជាយូរមកហើយ ព្រោះអ្វីដែលនៅជាធរមានពេលនេះគឺភាគច្រើនមានភាពស្មុគស្មាញ ច្រើនដំណាក់កាល និងមិនទាន់ឆ្លើយតបទៅនឹងការវិវត្តរបស់សង្គម និងបច្ចេកវិទ្យានាពេលបច្ចុប្បន្នឡើយ។
លោកបន្តថា ការធ្វើវិសោធនកម្មច្បាប់ស្តីពីសហគ្រាសពាណិជ្ជកម្ម និងច្បាប់ស្តីពីវិធានពាណិជ្ជកម្ម និងបញ្ជីពាណិជ្ជកម្ម មិនត្រឹមតែចំណេញពេលវេលា និងថវិកាប៉ុណ្ណោះទេ ប៉ុន្តែវាក៏កាត់បន្ថយការិយាធិបតេយ្យផងដែរ»។
លោកនិយាយថា៖ «ការកែសម្រួលនីតិវិធីបែបបទពាណិជ្ជកម្ម ជាវិធីសាស្ត្រដ៏ល្អរបស់រដ្ឋាភិបាលក្នុងការលើកទឹកចិត្ត និងបង្កើនភាពទាក់ទាញទាំងវិនិយោគិនក្នុងស្រុក និងក្រៅស្រុកឱ្យចូលមកបណ្តាក់ទុនកាន់តែច្រើននៅកម្ពុជា។ វាក៏នឹងជំរុញឱ្យសេដ្ឋកិច្ចកម្ពុជាមានសម្ទុះផងដែរ»។
ច្បាប់ស្តីពីវិធានពាណិជ្ជកម្ម និងបញ្ជីពាណិជ្ជកម្មដែលកំពុងប្រើបច្ចុប្បន្នត្រូវបានដាក់ឱ្យអនុវត្តកាលពីថ្ងៃទី ២៦ ខែ មិថុនា ឆ្នាំ ១៩៩៥ ខណៈច្បាប់ស្តីពីសហគ្រាសពាណិជ្ជកម្ម ត្រូវបានដាក់ឱ្យប្រើកាលពីថ្ងៃទី ១៩ ខែ មិថុនា ឆ្នាំ ២០០៥៕ LA