.jpg)
ទីស្តីការក្រសួងពាណិជ្ជកម្ម។ រូបថត ភ្នំពេញ ប៉ុស្តិ៍
ភ្នំពេញ: មន្ត្រីជាន់ខ្ពស់ក្រសួងពាណិជ្ជកម្មរំពឹងថា រដ្ឋាភិបាលកម្ពុជានឹងបញ្ចប់ការពិភាក្សាលើសេចក្តីព្រាងច្បាប់ស្តីពី «ការប្រកួតប្រជែង» ព្រមទាំងបញ្ជូនទៅរដ្ឋសភាបោះឆ្នោតគាំទ្រនៅពេលឆាប់ៗនេះ។
ការរំពឹងនេះបានកើតមានឡើងក្រោយពីក្រសួងពាណិជ្ជកម្មបានបញ្ជូនសេចក្តីព្រាងខ្លឹមសារក្នុងជំពូកចុងក្រោយពាក់ព័ន្ធនឹងនីតិវិធីស៊ើបអង្កេត និងបទប្បញ្ញត្តិទៅក្រសួងយុត្តិធម៌ ដើម្បីពិនិត្យ និងសម្រេចកាលពីថ្ងៃពុធ។
លោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំនៃក្រសួងពាណិជ្ជកម្មបានប្រាប់ភ្នំពេញប៉ុស្តិ៍កាលពីថ្ងៃម្សិលមិញថា ក្រុមការងាររបស់អគ្គនាយកដ្ឋានបានធ្វើការពិភាក្សាលើនីតិវិធីស៊ើបអង្កេតក្នុងជំពូក ៤ និងទោសប្បញ្ញត្តិក្នុងជំពូក ៦ នៃសេចក្តីព្រាងច្បាប់នេះរួចហើយកាលពីថ្ងៃចន្ទ។
លោកបន្តថា ក្រោយពីបញ្ចប់ការពិភាក្សាលើជំពូកទាំង ២ នេះអគ្គនាយកដ្ឋានបានបញ្ជូនសេចក្តីព្រាងនៃខ្លឹមសារនៅក្នុងជំពូក ៤ និងជំពូក ៦ ទៅក្រសួងយុត្តិធម៌ ដើម្បីពិនិត្យ និងសម្រេចមុននឹងលើកយកច្បាប់នេះទៅពិភាក្សាពេញអង្គនៅទីស្តីការគណៈរដ្ឋមន្ត្រី។
លោកបានថ្លែងថា៖ «សេចក្តីព្រាងច្បាប់ស្តីពីការប្រកួតប្រជែងនេះ វាមានអត្ថប្រយោជន៍យ៉ាងខ្លាំងក្នុងកិច្ចការពាណិជ្ជកម្មទី ១ លើកទឹកចិត្តឲ្យមានទំនាក់ទំនងធុរកិច្ចស្មើភាពគ្នា និងស្មោះត្រង់ទី ២ បង្កើនប្រសិទ្ធភាពសេដ្ឋកិច្ចក្នុងការធ្វើធុរកិច្ចនៅកម្ពុជាជាដើម»។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ថា សេចក្តីព្រាងច្បាប់ស្តីពីការប្រកួតប្រជែងបានធ្វើការប្រជុំពិភាក្សាជាអន្តរក្រសួងរួចរាល់ហើយនៅទីស្តីគណៈរដ្ឋមន្ត្រីដោយបច្ចុប្បន្នក្រសួងយុត្តិធម៌ កំពុងធ្វើការពិនិត្យ និងសម្រេចលើជំពូកចុងក្រោយពាក់ព័ន្ធនឹងទោសប្បញ្ញត្តិ។
លោកបន្ថែមថា៖ «ក្រោយពីក្រសួងយុត្តិធម៌ពិនិត្យរួចរាល់លើជំពូកចុងក្រោយនេះ យើងនឹងយកសេចក្តីព្រាងច្បាប់នេះមកពិភាក្សាក្នុងកិច្ចប្រជុំពេញអង្គនៅទីស្តីការគណៈរដ្ឋមន្ត្រី បន្ទាប់មកនឹងបញ្ជូនទៅរដ្ឋសភា ដោយយើងសង្ឃឹមថា នឹងអាចបញ្ចប់សេចក្តីព្រាងច្បាប់នេះក្នុងពេលឆាប់ៗ»។
យោងតាមលោក ស៊ាង ថៃ សេចក្តីព្រាងច្បាប់ស្តីពីការប្រកួតប្រជែងមាន ៤៧ មាត្រា និង ៧ ជំពូក។
លោក ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបាននិយាយថា បើច្បាប់ស្តីពីការប្រកួតប្រជែងត្រូវបានបង្កើតឡើង ប្រទេសកម្ពុជានឹងក្លាយជាគោលដៅក្នុងការទាក់ទាញវិនិយោគិនបរទេសមកវិនិយោគកាន់តែច្រើន។
លោកបន្ថែមថា ច្បាប់នឹងផ្តល់ភាពកក់ក្តៅបន្ថែមទៀតដល់អ្នកវិនិយោគ ក្នុងការដោះស្រាយក្នុងវិវាទពាណិជ្ជកម្ម។
លោកថ្លែងថា៖ «ការបង្កើតច្បាប់នេះជាការបោះជំហានវិជ្ជមានមួយក្នុងការឆ្លើយទៅនឹងអ្នកវិនិយោគិនធំៗពីបរទេសដែលចង់បានច្បាប់នេះ។ ច្បាប់នេះនឹងផ្តល់ប្រយោជន៍ដល់វិនិយោគិនបរទេស និងក្នុងស្រុកក្នុងការដោះស្រាយវិវាទពាណិជ្ជកម្ម ហើយវានឹងផ្តល់ភាពកក់ក្តៅដល់វិនិយោគិនផងដែរ»៕
