ភ្នំពេញៈ ចំនួនជើងហោះហើរដែលអាកាសយានដ្ឋានអន្តរជាតិទាំង ៣ របស់កម្ពុជាទទួលបានក្នុងខែមីនានេះត្រូវបានព្យាករថា ធ្លាក់ចុះប្រមាណ ៤០ ភាគរយ បើធៀបទៅនឹងខែចុងក្រោយនៃឆ្នាំ ២០១៩ ដែលជាពេលនៅមិនទាន់មានការរីករាលដាលនៃជំងឺកូវីដ១៩។ នេះបើយោងតាមទិន្នន័យនគរបាលអន្តោប្រវេសន៍ច្រកទ្វារអាកាសយានដ្ឋានអន្តរជាតិទាំង ៣។
ទិន្នន័យនេះត្រូវបានលើកឡើងក្នុងឱកាសនៃការជួបសំណេះសំណាលរវាងលោក ស ខេង រដ្ឋមន្ត្រីក្រសួងមហាផ្ទៃជាមួយនឹងមន្ត្រីនគរបាលអន្តោប្រវេសន៍នៅអាកាសយានដ្ឋានអន្តរជាតិភ្នំពេញកាលពីថ្ងៃអង្គារ។
សេចក្តីរាយការណ៍របស់តំណាងប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិទាំង ៣ បានឲ្យដឹងថាកាលពីខែធ្នូ ឆ្នាំ ២០១៩ មានជើងហោះហើរអន្តរជាតិចូលមកកម្ពុជាសរុប ៤ ២៤១ ប៉ុន្តែនៅខែមីនានេះមានតែ ២ ៥៧៥ ជើងប៉ុណ្ណោះ ថយចុះប្រមាណ ៤០ ភាគរយ។
ចំណែកអ្នកដំណើរអន្តរជាតិមានចំនួន ៣៦២ ៤១៤ នាក់ ខណៈក្នុងខែមីនា បានតែ ១៧០ ៣៨៧ នាក់ថយចុះ ៥៥ ភាគរយ។
លោក ស ខេងបាននិយាយថា រហូតមកដល់ពេលនេះមានប្រទេសជាច្រើនបានជ្រើសរើសយកវិធានការដើម្បីការពារប្រទេសពួកគេពីការរីករាលដាលនៃជំងឺកូវីដ ១៩ បើទោះបីដឹងថាវិធានការនោះបានធ្វើឲ្យប៉ះពាល់ខ្លាំងទៅដល់កំណើនសេដ្ឋកិច្ច និងជីវភាពប្រជាជនក្នុងសង្គមក៏ដោយ។
លោកថែ្លងបន្តថា វិធានការនោះក៏មានការបិទជើងហោះហើរផងដែរដោយប្រទេសខ្លះសម្រេចបិទជើងយន្តហោះទាំងស្រុង និងប្រទេសខ្លះបិទជាង ៩០ ភាគរយ។
លោកបន្តថា នេះជាមូលហេតុដែលធ្វើឲ្យចំនួនជើងហោះហើរនៅកម្ពុជាធ្លាក់ចុះ។ លោកថ្លែងថា៖ «សម្រាប់កម្ពុជាផ្លូវអាកាសយើងមិនបានបិទទេ ប៉ុន្តែដោយសារប្រទេសនានាគេបិទមានន័យដូចជាយើងបិទដែរ»។
បើតាមលោក ស ខេង រហូតមកដល់ពេលនេះកម្ពុជាមិនមានផែនការបិទព្រលានយន្តហោះ ឬព្រំដែនទេ បើទោះបីជាប្រទេសជិតខាងកម្ពុជាបានប្រកាសបិទជាមួយកម្ពុជាក៏ដោយ។
លោក ខៀវ ធី ប្រធានសមាគមមគ្គុទ្ទេសក៍ទេសចរណ៍អង្គរបានប្រាប់ភ្នំពេញប៉ុស្តិ៍កាលពីថ្ងៃអង្គារថា អ្នកនៅក្នុងវិស័យទេសចរណ៍ក្នុងខេត្តសៀមរាបកំពុងទទួលរងគ្រោះយ៉ាងខ្លាំងពីការរីករាលដាលនៃជំងឺកូវីដ១៩ នេះដោយបច្ចុប្បន្នមិនមានភ្ញៀវទេសចរតែម្តង។
លោក ធី បានអះអាងថា៖ «ចាប់ពីថ្ងៃទី ១៥ ខែមីនា មកខ្ញុំអាចនិយាយថា គឺមិនមានមគ្គុទ្ទេសក៍ទេសចរណ៍រូបណាមានភ្ញៀវទៀតទេ គឺសូន្យតែម្តង»។
លោកបន្តថា ប្រសិនបើអ្នកវិទ្យាសាស្ត្រមិនទាន់អាចរកឃើញវ៉ាក់សាំង ឬថ្នាំព្យាបាលយូរតទៅទៀតគឺការខូចខាតក្នុងវិស័យទេសចរណ៍នឹងមានទំហំកាន់តែធំ ខណៈបច្ចុប្បន្នមានសមាជិកក្នុងសមាគមរបស់លោកជាច្រើននាក់ត្រូវសម្រាកនៅផ្ទះ ឬទៅប្រកបមុខរបរផ្សេងវិញ។
កាលពីឆ្នាំ ២០១៩ តាមការប៉ាន់ប្រមាណមគ្គុទ្ទេសក៍ទេសចរណ៍ក្នុងខេត្តសៀមរាបជាមធ្យមអាចរកចំណូលបានក្នុងរង្វង់ ៥០០ ដុល្លារក្នុង ១ ខែ។ នេះបើតាមលោក ខៀវ ធី។
របាយការណ៍ក្រសួងទេសចរណ៍បានបង្ហាញថា ក្នុងខែមករា ឆ្នាំ ២០២០ កម្ពុជាទទួលបានភ្ញៀវអន្តរជាតិសរុប ៥៤៧ ៩៦៣ នាក់ធ្លាក់ចុះ ១៥,៣ ភាគរយបើធៀបនឹងរយៈពេលដូចគ្នាកាលពីឆ្នាំ ២០១៩ ដែលមានចំនួន ៦៤៧ ២០៦ នាក់។ ក្នុងនោះការធ្វើដំណើរតាមផ្លូវអាកាសមានចំនួន ៣៣២ ១៣៤ នាក់ធ្លាក់ចុះ ១៧,៧ ភាគរយធៀបនឹងរយៈពេលដូចគ្នាកាលពីឆ្នាំ ២០១៩ ដែលមានចំនួន ៤០៣ ៤០៦ នាក់ចំណែកការធ្វើដំណើរតាមផ្លូវគោកមានចំនួន ១៨៩ ៤១២ នាក់ធ្លាក់ចុះ ១៣,៦ ភាគរយ និងការធ្វើដំណើរតាមផ្លូវទឹកមានចំនួន ២៦ ៤១៧ នាក់កើនឡើង ៨ ភាគរយ។
ទិន្នន័យបានឲ្យដឹងទៀតថា ភ្ញៀវទេសចរចិនមានចំនួនច្រើនជាងគេគឺ ១២៣ ៥៥០ នាក់ ធ្លាក់ចុះ ៣២,៣ ភាគរយពីចំនួន ១៨២ ៤៤៩ នាក់ ភ្ញៀវជនជាតិវៀតណាមមានចំនួន ៧៥ ៩២៦ នាក់ កើនឡើង ១៩,៦ ភាគរយ ភ្ញៀវថៃមានចំនួន ៥៣ ៨៧៤ នាក់ កើនឡើង ២២,២ ភាគរយ ភ្ញៀវជនជាតិកូរ៉េមានចំនួន ៣៧ ២០៦ នាក់ ធ្លាក់ចុះ ១០,១ ភាគរយ និងភ្ញៀវជនជាតិអាមេរិកមានចំនួន ៣០ ៣១៥ នាក់ កើនឡើង ០,២ ភាគរយ៕LA