.jpg)
កសិករនៅកំពុងបេះផ្លែម្រេចខ្ចីនៅខេត្តរតនគិរីនាពេលកន្លងមក។ ផា លីណា
ភ្នំពេញៈ ខណៈម្រេចកំពតដែលជាផលិតផល GI នៅតែបន្តទទួលបានតម្លៃល្អ កសិករដាំដុះម្រេចផ្សេងទៀតទូទាំងប្រទេសកំពុងប្រឈមនឹងការធ្លាក់ចុះដោយសារកង្វះទីផ្សារ។ នេះបើតាមសមាគមម្រេចមេមត់។
ទោះបីយ៉ាងនេះក្តីមន្ដ្រីមកពីក្រសួងពាណិជ្ជកម្មថ្លែងថាការផ្លាស់ប្តូរតម្លៃផ្អែកទៅតាមនិន្នាការទីផ្សារអន្តរជាតិ។ លោក យិន សុភា នាយកប្រតិបត្តិសហករណ៍អភិវឌ្ឍន៍កសិកម្មម្រេចដារ-មេមត់នៅក្នុងខេត្តត្បូងឃ្មុំ បានប្រាប់ ភ្នំពេញ-ប៉ុស្ដិ៍ កាលពីម្សិលមិញថា តម្លៃបានធ្លាក់ចុះចាប់តាំងពីរដូវប្រមូលផល កាលពីដើមខែនេះដែលមានតម្លៃ ១១ ០០០ រៀលក្នុងមួយគីឡូក្រាមគិតត្រឹមម្សិលមិញ។ លោកថ្លែងថានេះគឺជាតម្លៃដ៏អាក្រក់បំផុតមិនដែលធ្លាប់ជួបសម្រាប់អ្នកផលិតម្រេចក្នុងស្រុក។
លោកថ្លែងថា កាលពីឆ្នាំមុន តម្លៃម្រេចអាចលក់បានក្នុងតម្លៃចន្លោះពី ១៥ ០០០ រៀលទៅ ២០ ០០០ រៀលក្នុងមួយគីឡូក្រាម។
ខេត្តត្បូងឃ្មុំជាតំបន់ដាំដុះម្រេចឈានមុខគេរបស់កម្ពុជា។ គិតត្រឹមឆ្នាំ ២០១៦ ប្រទេសកម្ពុជាមានផ្ទៃដីដាំដុះម្រេចសរុប ៥ ០០០ ហិកតា។ នេះបើយោងតាមរបាយការណ៍បានពីក្រសួងកសិកម្ម ខណៈតួលេខ ឆ្នាំ២០១៧ និងឆ្នាំ ២០១៨ មិនអាចរកបាន។
ប្រទេសកម្ពុជានាំចេញម្រេច ២ ៦៩៨,៦៤ តោនកាលពីឆ្នាំ ២០១៧ ធៀបនឹង ១ ០៥០,៨៧ តោនកាលពីឆ្នាំ ២០១៦។ នេះបើយោងតាមរបាយការណ៍បានពីក្រសួងកសិកម្ម។
អាជីវកម្មនេះនឹងត្រូវស្លាប់ប្រសិនបើតម្លៃបន្តធ្លាក់ចុះ ខណៈទីផ្សារត្រូវពឹងផ្អែកលើប្រទេសជិតខាង។ នេះបើយោងតាមលោក យិន សុភា។
លោកថ្លែងថា៖ «តម្លៃម្រេចត្រូវពឹងផ្អែកលើឈ្នួញមកពីប្រទេសវៀតណាមទាំងស្រុង យើងមិនមានទីផ្សារនៅក្នុងដៃទេ ហើយយើងគ្មានជម្រើសអ្វីក្រៅពីតែលក់ចេញដោយមិនទទួលបានប្រាក់ចំណេញនោះទេ»។ លោកថ្លែងថា៖ «យើងមិនមានទីផ្សារផ្សេងទៀតក្រៅពីប្រទេសវៀតណាមនោះទេ ហើយមិនមានវិនិយោគិនក្នុងស្រុក ទិញពីពួកយើងដែរ បើតម្លៃបន្តដូចនេះ កសិកររបស់យើងនឹងដួល ហើយបោះបង់ចោលការផលិត»។
លោក វ៉ុន សាវឿន កសិករដាំដុះម្រេចលើផ្ទៃដី ៥ ហិកតានៅស្រុកមេមត់ ស្ដីបន្ទោសរដ្ឋាភិបាលថាមិនយកចិត្តទុកដាក់លើបញ្ហានេះ។
លោកថ្លែងថា៖ «តម្លៃបន្តធ្លាក់ចុះជារៀងរាល់ឆ្នាំ យើងមិនអាចរស់បានជាមួយតម្លៃម្រេចបច្ចុប្បន្នទេ រដ្ឋាភិបាលមិនធ្វើអ្វីសោះឲ្យពួកយើង ហើយមិនខ្វល់អំពីពួកយើងនោះទេ»។ លោកបន្តថា៖ «យើងនឹងបោះបង់ចោលម្រេច ប្រសិនបើមិនមានអន្តរាគមន៍ពីរដ្ឋាភិបាល»។
លោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មនៅក្រសួងកសិកម្មបានថ្លែងថា ក្រសួងដើរតួនាទីក្នុងការលើកកម្ពស់ការផលិត និងការធ្វើកសិកម្មតាមកិច្ចសន្យា ហើយរឿងទីផ្សារជាកាតព្វកិច្ចរបស់ក្រសួងពាណិជ្ជកម្ម។
លោក ឡុង កែមវិចិត្រ អ្នកនាំពាក្យក្រសួងពាណិជ្ជកម្មបានថ្លែងថា ការធ្លាក់ចុះតម្លៃបច្ចុប្បន្ន គឺដោយសារតែនិន្នាការទីផ្សារអន្តរជាតិ ហើយមិនមែនតែប្រទេសកម្ពុជានោះទេ។
លោកបញ្ជាក់ថា៖ «វាធម្មតាសម្រាប់តម្លៃកើនឡើង និងធ្លាក់ចុះដោយពឹងផ្អែកលើតម្រូវការ និងការផ្គត់ផ្គង់»។ ក្រសួងពាណិជ្ជកម្មត្រូវបន្តលើកកម្ពស់ផលិតផលម្រេច ដោយសារតែវាជាផលិតផលមួយក្នុងចំណោមផលិតផលនាំចេញដ៏មានសក្ដានុពេលជាច្រើន»។ លោកបន្ថែមថាកម្ពុជាមានទីផ្សារជាច្រើនសម្រាប់ម្រេចធម្មតា ដូចជា វៀតណាម ចិន និងសហភាពអឺរ៉ុប (EU)។
លោក ងួន ឡាយ ប្រធានសមាគមលើកកម្ពស់ម្រេចកំពតបានថ្លែងថា តម្លៃម្រេចកំពតមិនរងផលប៉ះពាល់ពីការធ្លាក់ចុះតម្លៃនោះទេ។
លោកបន្តថាម្រេចកំពតមានតម្លៃ ១៥ ដុល្លារ ក្នុង ១ គីឡូក្រាមសម្រាប់ម្រេចខ្មៅ ២៥ ដុល្លារ សម្រាប់ម្រេចក្រហម និង ២៨ ដុល្លារសម្រាប់ម្រេចស។
លោកថ្លែងថា៖ «ជាធម្មតាម្រេចតែងតែប្រឈមនឹងការធ្លាក់ចុះតម្លៃ ដោយសារការផ្គត់ផ្គង់ខ្ពស់ជាងតម្រូវការ»។ លោកបន្តថា៖ «ដើម្បីទៅដល់ទីផ្សារ យើងត្រូវការកែលម្អស្ដង់ដារ ដើម្បីបង្កើនទំនុកចិត្តដល់ទីផ្សារ»៕LA
