អ្នកដំណើរឆ្លងកាត់មុខអគារស្នាក់ការកណ្តាលនៃធនាគារអេស៊ីលីដាលើមហាវិថីព្រះមុនីវង្ស។ ហុង មិនា
ភ្នំពេញៈ ធនាគារអេស៊ីលីដាដែលជាធនាគារពាណិជ្ជធំបំផុត និងបោះផ្សាយមូលបត្រកម្មសិទ្ធិនៅផ្សារហ៊ុនកម្ពុជាបានទទួលចំណាត់ថ្នាក់ខ្ពស់ពីការវាយតម្លៃចំណាត់ថ្នាក់ឥណទាន (SACP) ដោយទទួលបានកម្រិត «bb» ពី«bb-» ពីទីភ្នាក់ងារវាយតម្លៃឥណទានពិភពលោក Standard & Poors (S&P) ទោះបីជាកំណើនកម្ចីជាមធ្យមរបស់ធនាគារនេះកើនតិចគួបផ្សំនឹងការបង្កើតមូលធនខាងក្រៅ និងផ្ទៃក្នុងរួមចំណែកបង្កើនមូលធននីយកម្មរបស់ខ្លួន។
ការផ្ដល់ចំណាត់ថ្នាក់ដែលត្រូវបានវាយតម្លៃដោយ S&P ចេញផ្សាយកាលពីថ្ងៃទី ១៦ ខែធ្នូ ដោយបានបញ្ជាក់ពីការចេញការផ្ដល់ចំណាត់ថ្នាក់ឥណទាន ''B+'' រយៈពេលវែងនិង ''B'' រយៈពេលខ្លី លើធនាគារអេស៊ីលីដា ខណៈចក្ខុវិស័យលើការផ្ដល់ចំណាត់ថ្នាក់រយៈពេលវែងគឺមានស្ថិរភាព។
ទីភ្នាក់ងារ S&P បានឱ្យដឹងថា៖ «យើងបានបញ្ជាក់ ការវាយតម្លៃនេះដោយសារតែយើងរំពឹងថា ធនាគារអេស៊ីលីដានឹងរក្សាមូលធននីយកម្មល្អប្រសើររបស់ខ្លួន តួនាទីទីផ្សារល្អ ប្រាក់ចំណេញល្អប្រសើរ និងទម្រង់ការផ្ដល់មូលនិធិលើពីមធ្យមនៅកម្ពុជាក្នុងរយៈពេល ១២ ខែក្រោយ»។
S&P បន្តថា៖ «យើងវាយតម្លៃហានិភ័យនៃអតុល្យភាពសេដ្ឋកិច្ចនៅក្នុងប្រព័ន្ធធនាគាររបស់កម្ពុជាមានកម្រិតខ្ពស់ ដែលបណ្ដាលមកពីការពង្រីកឥណទានយ៉ាងរហ័ស និងតម្លៃអចលនទ្រព្យខ្ពស់។ ប៉ុន្តែផលប៉ះពាល់អវិជ្ជមានផ្ទាល់លើទម្រង់ហិរញ្ញវត្ថុរបស់ធនាគារអេស៊ីលីដា ទំនងជានឹងមានកម្រិត ដោយសារតែការទាក់ទងនឹងសកម្មភាពសំណង់ និងអចលនទ្រព្យមានកម្រិតទាប»។
លោក អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដាភីអិលស៊ី បាននិយាយថា ការដំឡើងចំណាត់ថ្នាក់ (SACP) ពីកម្រិត «bb-» ទៅកម្រិត «bb» ដល់ធនាគារអេស៊ីលីដាដោយមូលហេតុចម្បងៗ ដូចជា ធនាគាររក្សាបាននូវទ្រព្យសកម្មចម្រុះ ការគ្រប់គ្រងប្រកបដោយការប្រុងប្រយ័ត្នខ្ពស់ គិតគូរនូវរាល់ហានិភ័យពាក់ព័ន្ធជាមូលដ្ឋានសម្រាប់ការលូតលាស់ និងមានមូលធនភាវូបនីយកម្មរឹងមាំ។
លោកបានថ្លែងថា៖ «កត្តាទាំងអស់នេះឆ្លុះបញ្ចាំងអំពីភាពរឹងមាំនៃបណ្តាញធុរកិច្ចរបស់ធនាគារអេស៊ីលីដាដោយរក្សាបាននូវចំណូលប្រកបដោយចីរភាព ដោយមិនមានផលប៉ះពាល់។ ទស្សនវិស័យស្ថិរភាពដែលបង្ហាញនៅក្នុងចំណាត់ថ្នាក់នេះឆ្លុះបញ្ចាំងពីភាពរឹងមាំនៃហិរញ្ញវត្ថុជាមួយនឹងទ្រនាប់ដើមទុនគ្រប់គ្រាន់ដើម្បីស្ថិរភាពនៃដំណើរការអាជីវកម្ម»។
ទីភ្នាក់ងារ S&P ក៏បានចង្អុលបង្ហាញដែរថា អេស៊ីលីដានឹងទទួលបានអត្ថប្រយោជន៍ពីការបង្កើនមូលធនរបស់ខ្លួនក្នុងរយៈពេល ២-៣ ឆ្នាំចុងក្រោយនេះ ដោយសារតែការបង្កើតមូលធនល្អប្រសើររបស់ខ្លួនទាំងផ្ទៃក្នុង និងខាងក្រៅ និងកំណើនកម្ចីមានកម្រិតទាបជាងកំណើនកម្ចីរបស់ប្រព័ន្ធ។
S&P បានបន្តថា៖ «ការណ៍នេះបានបណ្ដាលឱ្យមានភាពប្រសើរឡើងក្នុងការគណនាអនុបាតមូលធនដែលកែតម្រូវតាមហានិភ័យ (RAC) របស់យើងសម្រាប់ធនាគារនេះដល់ប្រហែល ៨,៦ ភាគរយគិតត្រឹមថ្ងៃទី ៣០ ខែកញ្ញា ឆ្នាំ ២០២០ ពី ៨,២ ភាគរយ គិតត្រឹមថ្ងៃទី ៣១ ធ្នូ ឆ្នាំ ២០១៩។ យើងព្យាករកំណើនកម្ចីរបស់ធនាគារអេស៊ីលីដានឹងរក្សានៅក្រោមកំណើនប្រាក់កម្ចីរបស់ដៃគូដែលមានទំហំប្រហាក់ប្រហែលគ្នា ប៉ុន្តែប្រាក់ចំណូលគួរតែរក្សាភាពល្អប្រសើរ ដែលបណ្ដាលឱ្យធនាគារនេះរក្សាអនុបាត RAC ចំនួនពី ៨ ភាគរយទៅ ៨,៥ ភាគរយរយៈពេល ១៨ ខែក្រោយ។ យើងបានកែតម្រូវការវាយតម្លៃរបស់យើងនៃទម្រង់ឥណទាន (SACP) របស់អេស៊ីលីដា ដល់ ''bb'' ពី ''bb-'' ដើម្បីឆ្លុះបញ្ចាំងពីមូលធននីយកម្មល្អប្រសើររបស់ធនាគារនេះ»។
ទីភ្នាក់ងារ S&P បានបញ្ជាក់ថា៖ «យើងជឿជាក់ថា កំណើនកម្ចីជាមធ្យមរបស់ធនាគារអេស៊ីលីដា បានធានាថា មានហានិភ័យដែលមិនទាន់ឃើញច្បាស់នៅក្នុងផលបត្រវិនិយោគ ហើយរហូតមកដល់ពេលនេះទិន្នន័យបានចង្អុលបង្ហាញថា ចំនួននៅមានកម្រិតនៃការរៀបចំឥណទានឡើងវិញជាប់ទាក់ទងនឹងជំងឺកូវីដ១៩»។
ទីភ្នាក់ងារវាយតម្លៃមួយនេះក៏បានឱ្យដឹងថា កម្រិតទាបនៃការរៀបចំឥណទានឡើងវិញទាក់ទងនឹងប្រព័ន្ធកាត់បន្ថយហានិភ័យនៃការខូចគុណភាពទ្រព្យសកម្មបន្ថែមទៀតក្នុងរយៈពេល ១២ ខែក្រោយ ហើយគុណភាពទ្រព្យសកម្មនៅក្នុងប្រព័ន្ធធនាគារដែលមានហានិភ័យខ្ពស់របស់ប្រទេសកម្ពុជានៅតែពឹងផ្អែកលើការស្ទុះងើបឡើងវិញនៃសេដ្ឋកិច្ចក្នុងរយៈពេល ១២ ខែក្រោយ ជាពិសេសពីវិស័យទេសចរណ៍ និងការវិនិយោគបរទេស៕LA
