ភ្នំពេញៈ ការស្នើសុំឥណទានពីកម្មវិធីពិសេសរបស់រដ្ឋាភិបាលដែលមានទឹកប្រាក់ ៥០ លានដុល្លារ តាមរយៈធនាគារអភិវឌ្ឍន៍ជនបទ និងកសិកម្ម (ARDB) បានកើនដល់ទំហំទឹកប្រាក់ ៣១ លានដុល្លារ គិតត្រឹមថ្ងៃទី ១២ ខែមិថុនា។
លោក កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្មបានឲ្យដឹងថា ការដាក់ស្នើសុំកម្ចីពីហិរញ្ញប្បទានពិសេសរបស់រដ្ឋាភិបាលបាននិងកំពុងកើនឡើងយ៉ាងលឿនចាប់តាំងពីរដ្ឋាភិបាលបានបញ្ចេញមូលនិធិ ៥០ លានដុល្លារ ជាផ្លូវការកាលពីខែមីនា។
លោកបានបន្តថា គិតត្រឹមសប្តាហ៍ទី ២ ក្នុងខែមិថុនា នេះ ARDB ទទួលបានពាក្យស្នើសុំកម្ចីពីសហគ្រាសខ្នាតតូច និងមធ្យមសរុប ២៨៨ ដែលមានទឹកប្រាក់ប្រមាណ ៣១ លានដុល្លារ ហើយទឹកប្រាក់កម្ចីជាង ៤ លានដុល្លារត្រូវបានអនុម័តរួចរាល់។
លោកកត់សម្គាល់ថា ពាក្យស្នើសុំកម្ចីទាំងនេះភាគច្រើនបានពីអ្នកប្រកបរបរអាជីវកម្មខ្នាតតូចមានដូចជា ការចិញ្ចឹមសត្វ ត្រី ដាំដុះបន្លែ ផ្លែឈើ ដែលស្របទៅនឹងគោលនយោបាយរបស់រដ្ឋាភិបាលក្នុងការជំរុញការផលិតក្នុងស្រុក។
លោកថ្លែងថា៖ «យើងលើកទឹកចិត្ត និងអំពាវនាវឲ្យបងប្អូនប្រជាកសិកររួសរាន់រៀបចំឯកសារស្នើសុំខ្ចីឥណទានក្នុងកម្មវិធីនេះពីធនាគារអភិវឌ្ឍន៍ជនបទ និងកសិកម្មក្នុងករណីបងប្អូនត្រូវការពង្រីកអាជីវកម្មរបស់ខ្លួន»។
តាមលោក កៅ ថាច ឥណទានក្រោមគម្រោងហិរញ្ញប្បទានពិសេសរបស់រាជរដ្ឋាភិបាលនេះនឹងផ្តល់លទ្ធភាពឲ្យសហគ្រាសធុនតូច និងមធ្យមនៅក្នុងវិស័យកសិឧស្សាហកម្មពង្រីកអាជីវកម្ម និងខ្សែចង្វាក់ផលិតកម្មរបស់ពួកគេបន្ថែមទៀតក្នុងគោលដៅពង្រឹងភាពប្រកួតប្រជែង និងកាត់បន្ថយការនាំចូលពីក្រៅប្រទេស។
លោកនិយាយថា៖ «ខ្ញុំសូមសំណូមពរដល់បងប្អូនកសិករចិញ្ចឹមត្រី ចិញ្ចឹមសត្វ ដាំដុះបន្លែ ត្រូវរៀបចំផែនការដាំដុះ និងចិញ្ចឹមឲ្យបានច្បាស់លាស់សម្រាប់ផ្គត់ផ្គង់ទៅតាមតម្រូវការទីផ្សារប្រកបដោយនិរន្តរភាព ដើម្បីចូលរួមកាត់បន្ថយការនាំចូលពីប្រទេសជិតខាង»។
សហគ្រិនអាចធ្វើការខ្ចីប្រាក់ចាប់ពី ១ ម៉ឺនដុល្លារដល់ ៣០ ម៉ឺនដុល្លារ ដើម្បីយកទៅពង្រីកអាជីវកម្មរបស់ពួកគេ។
យោងតាមសេចក្តីប្រកាសព័ត៌មានរបស់រដ្ឋាភិបាលដែលចេញផ្សាយកាលពីខែមុនបានឲ្យដឹងថា រដ្ឋាភិបាលបានសម្រេចធ្វើការបញ្ចុះអត្រាការប្រាក់ពី ៦ ភាគរយ មកនៅត្រឹម ៥ ភាគរយ ក្នុង ១ ឆ្នាំសម្រាប់ទុនបង្វិល និងពី ៦,៥ ភាគរយ មក ៥,៥ ភាគរយ សម្រាប់ទុនវិនិយោគ ដោយមិនគិតកម្រៃសេវាផ្សេងៗ។
សេចក្តីប្រកាសព័ត៌មានបន្តថា រដ្ឋាភិបាលក៏សម្រេចកែសម្រួលរយៈពេលឥណទានអតិបរមាពី ៥ ទៅ ៧ ឆ្នាំ សម្រាប់ទុនវិនិយោគ ខណៈរក្សាទុករយៈពេលខ្លីអតិបរមា ២ ឆ្នាំសម្រាប់ទុនបង្វិល។
ទន្ទឹមនឹងនេះសហគ្រាសខ្នាតតូច និងមធ្យមដែលមិនទាន់ចុះបញ្ជីផ្លូវការក៏អាចដាក់ពាក្យស្នើសុំឥណទានបានដែរ ដោយតម្រូវឲ្យបំពេញលក្ខខណ្ឌចុះបញ្ជីតាមក្រោយក្នុងរយៈពេល ១ ខែ បន្ទាប់ពីទទួលបានឥណទាន។
លោក កៅ ថាច បានថ្លែងក្នុងពិធីចុះហត្ថលេខាជាមួយធនាគារឯកទេសវីងកាលពីចុងខែឧសភាថា ARDB អាចនឹងទទួលបានចំណែកខ្លះពីហិរញ្ញប្បទានចំនួន ៣០០ លានដុល្លារ របស់ក្រសួងសេដ្ឋកិច្ច និងហិរញ្ញវត្ថុដែលទុកត្រៀមថវិកាសម្រាប់ហិរញ្ញប្បទានបន្ថែម ដើម្បីគាំទ្រ និងដើរតួនាទីជាកាតាលីករជំរុញកំណើនតាមវិស័យសំខាន់ៗក្នុងអំឡុងពេល និងក្រោយពេលវិបត្តិជំងឺកូវីដ ១៩។
លោកបានថ្លែងថា៖ «ប្រហែលជាកញ្ចប់ថវិកាថ្មីដែលដាក់ចេញមក ៣០០ លានដុល្លារ នឹងអាចមានចំណែកណាមួយដែលធនាគារអភិវឌ្ឍន៍ជនបទ និងកសិកម្មនឹងទទួលយកមកប្រើប្រាស់ក្នុងវិស័យនេះ ហើយប្រសិនបើមានការស្នើសុំចាំបាច់ពីសហគ្រិនសុំបង្កើតរោងចក្រផលិតជីកសិកម្ម ខ្ញុំអាចស្នើសុំទៅរាជរដ្ឋាភិបាលភ្លាមៗ»៕LA