ភ្នំពេញ: ធនាគារជាតិនៃកម្ពុជា (NBC) ជាថ្មីម្តងទៀតបានបន្តលើកទឹកចិត្តដល់គ្រឹះស្ថានហិរញ្ញវត្ថុទាំងអស់នៅកម្ពុជាឲ្យដាក់ចេញនូវគោលនយោបាយលើកកម្ពស់ហិរញ្ញប្បទានបៃតងដោយផ្តោតលើការវិនិយោគការពារបរិស្ថាន។ នេះបើតាមសេចក្តីប្រកាសព័ត៌មានរបស់ NBC បានចេញផ្សាយកាលពីថ្ងៃទី ២៦ កញ្ញា។
ការអំពាវនាវរបស់ NBC បានធ្វើឡើងបន្ទាប់ពីធនាគារសម្រាប់ការទូទាត់អន្តរជាតិ (BIS) បានដាក់ឲ្យដំណើរការប្រើប្រាស់នូវមូលនិធិបើកចំហសម្រាប់ការវិនិយោគរបស់ធនាគារកណ្តាលទៅលើសញ្ញាបណ្ណបៃតង ដើម្បីឆ្លើយតបនឹងតម្រូវការកើនឡើងសម្រាប់ការវិនិយោគដែលមិនប៉ះពាល់ដល់បរិស្ថាន។
យោងតាមសេចក្តីប្រកាសព័ត៌មាននេះ កម្មវិធីមូលនិធិសញ្ញាបណ្ណបៃតងនឹងជួយដល់ធនាគារកណ្តាលក្នុងការដាក់បញ្ចូលគោលការណ៍បរិស្ថានប្រកបដោយចីរភាពទៅក្នុងការគ្រប់គ្រងទុនបម្រុងរបស់ខ្លួន។
សេចក្តីប្រកាសព័ត៌មាននេះបានឲ្យដឹងថា ខណៈការប្រែប្រួលអាកាសធាតុត្រូវបានមើលឃើញថាជាប្រភពចម្បងនៃភាពមិនច្បាស់លាស់សម្រាប់កំណើនសេដ្ឋកិច្ច និងអាចផ្តល់ផលប៉ះពាល់ជាអវិជ្ជមានទៅលើកត្តាសង្គម និងបរិស្ថាន ហើយការផ្តល់ហិរញ្ញប្បទានបៃតងអាចផ្តល់នូវជម្រើសដែលមានគុណប្រយោជន៍ជាច្រើនសម្រាប់វិនិយោគិន។
NBC ដែលជាសមាជិករបស់ BIS បានឲ្យដឹងថា៖ «កាលានុវត្តភាពដែលអាចទទួលបានជោគជ័យជាងគេ គឺសញ្ញាបណ្ណបៃតងដែលដើរតួនាទីសំខាន់ក្នុងការបង្កើនការយល់ដឹង និងកសាងសមត្ថភាពជំនាញសម្រាប់វិនិយោគិនលើបញ្ហាបរិស្ថាន និងអាកាសធាតុ»។
លោក ជា ចាន់តូ ទេសាភិបាលធនាគារជាតិនៃកម្ពុជាបានឲ្យដឹងនៅក្នុងសេចក្តីប្រកាសព័ត៌មាននេះថា ធនាគារជាតិគឺមានតួនាទីចូលរួមកាត់បន្ថយហានិភ័យហិរញ្ញវត្ថុដែលបណ្តាលមកពីផលប៉ះពាល់នៃការប្រែប្រួលអាកាសធាតុមកលើសេដ្ឋកិច្ច សង្គម និងបរិស្ថាន។
លោកថ្លែងថា៖ «យើងជឿជាក់ថា ស្ថាប័នក៏ដូចជាបុគ្គលនីមួយៗនៃប្រទេសអភិវឌ្ឍន៍ ឬកំពុងអភិវឌ្ឍន៍ក្តីអាចដើរតួនាទីយ៉ាងសំខាន់ក្នុងការរួមចំណែកដល់កំណើនប្រកបដោយសមធម៌ និងចីរភាពតាមរយៈការកាត់បន្ថយល្បឿននៃការប្រែប្រួលអាកាសធាតុយ៉ាងឆាប់រហ័ស និងហានិភ័យនៃបម្រែបម្រួលនេះ»។
លោកបានអំពាវនាវដល់គ្រឹះស្ថានហិរញ្ញវត្ថុទាំងអស់ឲ្យដាក់ចេញគោលនយោបាយដែលលើកកម្ពស់ហិរញ្ញប្បទានបៃតង។ លោកបន្តថា៖ «យើងលើកទឹកចិត្តយ៉ាងខ្លាំងដល់គ្រឹះស្ថានហិរញ្ញវត្ថុទាំងអស់ឲ្យដាក់ចេញនូវគោលនយោបាយដែលលើកកម្ពស់ហិរញ្ញប្បទានបៃតង និងគាំទ្រដល់ការវិនិយោគដែលផ្តល់ផលវិជ្ជមានដល់បរិស្ថាន»។
លោក អ៊ូ សុផាណារិទ្ធ ប្រធានហិរញ្ញវត្ថុធនាគារកាណាឌីយ៉ាបានប្រាប់ភ្នំពេញប៉ុស្ដិ៍កាលពីថ្ងៃចន្ទថា ធនាគារកាណាឌីយ៉ាគាំទ្រចំពោះការអំពាវនាវរបស់ធនាគារជាតិនេះ។ លោកថ្លែងថា៖ «វាល្អសម្រាប់ប្រទេសជាតិយើង ក៏ដូចជាការជួយឲ្យរីកចម្រើនក្នុងវិស័យធនាគារប្រកបដោយចីរភាព និងការធានាក្នុងការការពារបរិស្ថានផងដែរ»។
លោកបន្តថា៖ «គោលនយោបាយឥណទានរបស់យើង មុនយើងផ្តល់ឥណទានយើងបានពិនិត្យមើលអតិថិជនថាតើក្រៅពីផលប្រយោជន៍អាជីវកម្មគាត់ តើការវិនិយោគយើងប៉ះពាល់ដល់បរិស្ថានឬអត់?»។
កាលពីដើមខែសីហាសមាគមធនាគារនៅកម្ពុជា (ABC) ចុះហត្ថលេខាលើអនុស្សរណៈយោគយល់មួយស្តីពី «កិច្ចសហប្រតិបត្តិការលើហិរញ្ញវត្ថុប្រកបដោយចីរភាព» ជាមួយក្រសួងបរិស្ថាន និងធនាគារជាតិនៃកម្ពុជា និង USAID ដើម្បីពង្រឹង និងអភិវឌ្ឍកិច្ចសហប្រតិបត្តិការហិរញ្ញវត្ថុប្រកបដោយចីរភាពក្នុងវិស័យធនាគារសំដៅជួយគាំទ្រដល់កិច្ចគាំពារផ្នែកបរិស្ថាន ការគ្រប់គ្រងធនធានធម្មជាតិ និងការប្រែប្រួលអាកាសធាតុនៅកម្ពុជា៕ LA