ក្រុងហ្ស៊ូរិចៈ ធនាគារ UBS ដែលជាធនាគារដ៏ធំមួយរបស់ប្រទេសស្វ៊ីសបានឲ្យដឹងកាលពីថ្ងៃអង្គារថា ប្រាក់ចំណេញរយៈពេលពេញ ១ ឆ្នាំ របស់ខ្លួនបានធ្លាក់ចុះកាលពីឆ្នាំមុន ប៉ុន្តែថាវិធានការជំរុញសេដ្ឋកិច្ច និងលក្ខខណ្ឌរូបិយវត្ថុកាន់តែងាយស្រួលនានា «បានចូលរួមចំណែកដល់ការកើតមានលទ្ធផលខ្លាំងមួយក្នុងទីផ្សារហិរញ្ញវត្ថុនៅត្រីមាសទី ៤»។
ធនាគារនេះបានឲ្យដឹងក្នុងសេចក្តីថ្លែងការណ៍មួយថា «ធនាគារ UBS បានផ្តល់លទ្ធផលពេញ ១ ឆ្នាំ ២០១៩ ដ៏រឹងមាំនៅក្នុងស្ថានភាពទីផ្សារចម្រុះ» ដោយប្រាក់ចំណេញសុទ្ធធ្លាក់ចុះ ៥ ភាគរយ មកនៅត្រឹម ៤,៣ ពាន់លានដុល្លារ (៣,៨ ពាន់លានអឺរ៉ូ)។
ប្រាក់ចំណេញមុនបង់ពន្ធដែលត្រូវបានកែតម្រូវសម្រាប់ការចំណាយលើការរៀបចំរចនាសម្ព័ន្ធឡើងវិញធ្លាក់ ០,៥ ភាគរយ មកនៅត្រឹម ៦,០៤ ពាន់លានដុល្លារ តែប្រាក់ចំណេញមុនបង់ពន្ធក្នុងអាជីវកម្មគ្រប់គ្រងទ្រព្យសកម្មពិភពលោកបានកើនឡើង ៤ ភាគរយ ដល់ ៣,៤ ពាន់លានដុល្លារ។
គ្រាន់តែនៅត្រីមាសទី ៤ ប្រាក់ចំណេញមុនបង់ពន្ធដែលត្រូវបានកែតម្រូវបានកើនឡើង ១៥៣ ភាគរយ ដល់ ១,២ ពាន់លានដុល្លារ ដែលត្រូវបានជំរុញជាចម្បងដោយសកម្មភាពគ្រប់គ្រងទ្រព្យសកម្ម និងធនាគារវិនិយោគ។
លោក Sergio Ermotti នាយកប្រតិបត្តិធនាគារ UBS បានថ្លែងថា៖ «យើងបានបញ្ចប់ឆ្នាំដ៏រឹងមាំមួយ ដោយប្រាក់ចំណេញមុនបង់ពន្ធដែលត្រូវបានកែតម្រូវមានភាពល្អប្រសើរបំផុតនៅត្រីមាសទី ៤ គិតចាប់ពីឆ្នាំ ២០១០ មក»។
ធនាគារនេះនឹងបង់ភាគលាភជូនម្ចាស់ភាគហ៊ុន ០,៧៣ ដុល្លារ ក្នុង ១ ហ៊ុន នៅឆ្នាំ ២០១៩ និង ០,៧ ដុល្លារ នៅឆ្នាំ ២០១៨៕ KC