.jpg)
លោក Bruno Le Maire រដ្ឋមន្ត្រីក្រសួងហិរញ្ញវត្ថុបារាំង។ AFP
ក្រុងប៉ារីសៈ ប្រទេស បារាំង នឹងដើរទៅមុខជាមួយនឹងច្បាប់ដកហូតពន្ធលើក្រុមហ៊ុនបច្ចេកវិទ្យាធំៗផ្ទាល់របស់ខ្លួននៅឆ្នាំ ២០១៩ បើសហភាពអឺរ៉ុបបរាជ័យក្នុងការព្រមព្រៀងគ្នាអំពីរបៀបដែលក្រុមហ៊ុននានា ដូចជា ក្រុមហ៊ុន Google និង Facebook បង់ពន្ធនៅអឺរ៉ុប។
លោក Bruno Le Maire រដ្ឋមន្ត្រីក្រសួងហិរញ្ញវត្ថុបារាំងបានប្រាប់ទូរទស្សន៍ France 2 ថា លោកនឹងទុកពេលវេលាឲ្យខ្លួនឯង «រហូតដល់ខែមីនា» ដើម្បីឈានដល់កិច្ចព្រមព្រៀងមួយជាមួយសមាជិកសហភាពអឺរ៉ុបផ្សេងទៀតស្តីពីពន្ធឌីជីថល ដែលសំដៅលើការដកហូតពន្ធលើក្រុមហ៊ុនធំៗដូចជា Google, Apple, Facebook និង Amazon។
លោកថ្លែងថា បើសិនជាការចរចាបរាជ័យ «យើងនឹងធ្វើវានៅថ្នាក់ជាតិក្នុងឆ្នាំ ២០១៩។ យើងនឹងដកហូតពន្ធលើក្រុមហ៊ុនធំៗ បើរដ្ឋនានានៅអឺរ៉ុប មិនទទួលយកការទទួលខុសត្រូវរបស់ពួកគេ»។
កាលពីថ្ងៃអង្គារ បារាំង និងអាល្លឺម៉ង់ បានឯកភាពគ្នាលើច្បាប់ពន្ធឌីជីថលនេះដែលមានវិសាលភាពតូចជាងមុន ក្នុងគោលបំណងជម្នះការប្រឆាំងខ្លាំងៗចំពោះផែនការនេះក្នុងចំណោមប្រទេសមួយចំនួន។
ស្ថិតក្រោមច្បាប់ឌីជីថលថ្មីនេះ ដែលជាច្បាប់អាសន្នមួយខណៈរង់ចាំកិច្ចព្រមព្រៀងសកលនោះ ក្រុមហ៊ុនឌីជីថលធំៗ នឹងត្រូវបង់ពន្ធ ៣ ភាគរយនៃចំណូលផ្សាយពាណិជ្ជកម្ម របស់ពួកគេ៕ AFP/KC
