.jpg)
Richard Yu ប្រធានផ្នែកគ្រឿងអេឡិចត្រូនិកប្រើប្រាស់របស់ក្រុមហ៊ុន Huawei។ AFP
ក្រុងប៉េកាំងៈ របាយការណ៍មួយបានឲ្យដឹងកាលពីថ្ងៃព្រហស្បតិ៍ថា ក្រុមហ៊ុន Huawei អាចបង្ហាញប្រព័ន្ធប្រតិបត្តិការផ្ទាល់របស់ខ្លួនសម្រាប់ទូរស័ព្ទស្មាតហ្វូន និងកុំព្យូទ័រយួរដៃក្នុងប្រទេស ចិន នៅរដូវស្លឹកឈើជ្រុះខាងមុខ បន្ទាប់ពីអាមេរិកបានដាក់ក្រុមហ៊ុននេះក្នុងបញ្ជីខ្មៅ។
លោក Richard Yu ប្រធានផ្នែកគ្រឿងអេឡិចត្រូនិកប្រើប្រាស់របស់ក្រុមហ៊ុន Huawei បានប្រាប់បណ្ដាញទីភ្នាក់ងារព័ត៌មាន CNBC របស់អាមេរិកថា ជំនាន់ប្រព័ន្ធប្រតិបត្តិការសម្រាប់ទីផ្សារអន្តរជាតិ អាចរួចរាល់នៅត្រីមាសទី១ ឬត្រីមាសទី២ ឆ្នាំ ២០២០។
ក្រុមហ៊ុនទូរគមនាគមន៍ដ៏ធំរបស់ចិននេះបានទទួលរងផលប៉ះពាល់យ៉ាងខ្លាំងនៅសប្ដាហ៍នេះដោយសារការសម្រេចចិត្តរបស់ក្រុមហ៊ុន Google បញ្ឈប់ការសហការមួយផ្នែកជាមួយឧបករណ៍អេឡិចត្រូនិករបស់ក្រុមហ៊ុន Huawei ពីប្រព័ន្ធប្រតិបត្តិការ Android OS របស់ខ្លួន បន្ទាប់ពីអាមេរិកចេញបញ្ជាហាមឃាត់ការលក់ ឬផ្ទេរបច្ចេកវិទ្យាអាមេរិកដល់ក្រុមហ៊ុនមួយនេះ។
លោក Richard Yu បានថ្លែងថា៖ «ថ្ងៃនេះ ក្រុមហ៊ុន Huawei យើងនៅតែប្ដេជ្ញាចិត្តចំពោះប្រព័ន្ធប្រតិបត្តិការ Windows របស់ក្រុមហ៊ុន Microsoft និងប្រព័ន្ធប្រតិបត្តិការ Android របស់ក្រុមហ៊ុន Google»។ លោកបន្តថា៖ «ប៉ុន្តែបើយើងមិនអាចប្រើប្រព័ន្ធប្រតិបត្តិការនោះបាន ក្រុមហ៊ុន Huawei នឹងរៀបចំផែនការ B ដើម្បីប្រើប្រាស់ប្រព័ន្ធ OS ផ្ទាល់របស់យើង»។
កាសែត Global Times របស់រដ្ឋចិន បានរាយការណ៍កាលពីថ្ងៃចន្ទថា ប្រព័ន្ធប្រតិបត្តិការ HongMeng កំពុងដំណើរការសាកល្បង ហើយនឹងជំនួសប្រព័ន្ធប្រតិបត្តិការ Android ជាបណ្ដើរៗ។
លោក Yu ថ្លែងថា៖ «យើងមិនចង់ធ្វើដូចនេះទេ តែយើងនឹងបង្ខំចិត្តធ្វើដូចនោះ ដោយសារតែអាមេរិក»៕AFP/LA
