.jpg)
ភ្នំពេញៈ ពាណិជ្ជកម្មទ្វេភាគីរវាងប្រទេសកម្ពុជា និងអូស្ត្រាលីមានចំនួន ៥៣៥ លានដុល្លារកាលពីឆ្នាំ ២០១៦ ដែលក្នុងនោះការដោះដូរពាណិជ្ជកម្មជាទំនិញមាន ២៥៨ លានដុល្លារ ខណៈទឹកប្រាក់ ២៧៧ លានដុល្លារផ្សេងទៀតជាការដោះដូរពាណិជ្ជកម្មជាសេវាកម្ម។ នេះបើយោងតាមរបាយការណ៍មួយស្តីពីឱកាសពាណិជ្ជកម្មអូស្ត្រាលីនៅតាមបណ្តាប្រទេសនៅអាស៊ាន។
របាយការណ៍មិនបានបញ្ជាក់ពីទឹកប្រាក់នាំចេញ និងនាំចូលរបស់ប្រទេសនីមួយៗទេ ហើយក៏មិនបានបង្ហាញពីទំហំពាណិជ្ជកម្មកាលពីឆ្នាំ ២០១៥ ឬ និន្នាការនៃការធ្វើពាណិជ្ជកម្មនៅឆ្នាំចុងក្រោយនោះទេ។
ខណៈរបាយការណ៍បញ្ជាក់ថាប្រជាជនកម្ពុជាបានធ្វើការវិនិយោគនៅអូស្ត្រាលីដោយមានតម្លៃជាទឹកប្រាក់ ៨៨៦ លានដុល្លារកាលពីឆ្នាំ ២០១៦ របាយការណ៍ដដែលមិនបានបញ្ជាក់ពីទំហំវិនិយោគអូស្ត្រាលីនៅកម្ពុជានោះទេ។
របាយការណ៍ដដែលបានបញ្ជាក់ថាកម្ពុជាជាប្រទេសដែលមានស្ថិរភាពកំណើនសេដ្ឋកិច្ច និងឆ្លងកាត់កំណើនសេដ្ឋកិច្ចយ៉ាងលឿនរហ័សដែលគាំទ្រដោយកំណើនប្រជាសាស្ត្រដែលមានប្រជាជនវ័យក្មេង ការកែលម្អគុណភាពវិស័យអប់រំ និងកំណើនប្រជាជនថ្នាក់កណ្តាល។
ប្រទេសអូស្ត្រាលីវិញគឺជាទីតាំងល្អសម្រាប់ទទួលបានគុណភាពអប់រំល្អ សេវាកម្មហិរញ្ញវត្ថុដែលមានវិជ្ជាជីវៈ និង ផលិតកម្មក្នុងវិស័យកសិកម្ម។
នេះជាលើកដំបូងដែលទិន្នន័យពាណិជ្ជកម្មរវាងកម្ពុជា និងអូស្ត្រាលីត្រូវបានបង្ហាញ៕
