.jpg)
ភ្នំពេញៈ មន្ត្រីជាន់ខ្ពស់រដ្ឋាភិបាលបានឲ្យដឹងថា ពិធីបុណ្យទន្លេនឹងរៀបចំនៅក្នុងខេត្តបាត់ដំបងនៅឆ្នាំនេះ ដើម្បីលើកកម្ពស់ផលិតផលក្នុងស្រុកក្នុងខេត្តបាត់ដំបង។
ពិធីបុណ្យទន្លេនឹងត្រូវបានប្រារព្ធឡើងចាប់ពីថ្ងៃទី ១៣ ដល់ ១៥ ខែមីនា ក្រោមប្រធានបទ «ទន្លេនៃសន្តិភាព ទន្លេនៃវិបុលភាព»។
លោក សឿន ប៊ុនរិទ្ធិ អភិបាលរងខេត្តបាត់ដំបងបានប្រាប់ភ្នំពេញប៉ុស្តិ៍ថា អាជ្ញាធរកំពុងរៀបចំដំឡើងស្តង់ពិព័រណ៍នៅតាមស្ទឹងសង្កែ ដែលកម្មវិធីនេះនឹងប្រព្រឹត្តទៅនៅសប្តាហ៍ក្រោយ។ លោកបន្តថា បច្ចុប្បន្នមានស្តង់ពិព័រណ៍សរុប ៣៣០ ដែលធ្វើឡើងដើម្បីលើកកម្ពស់ផលិតផលក្នុងស្រុករបស់ខេត្តនេះ។
លោកថ្លែងថា៖ «ផលិតផលក្នុងស្រុក និងផលិតផលកែច្នៃពីសហគ្រាសធុនតូច និងមធ្យមនឹងតាំងបង្ហាញនៅក្នុងកម្មវិធីនេះ។ កម្មវិធីនេះធ្វើឡើងក្នុងគោលដៅទាក់ទាញទេសចរក្នុងស្រុក និងបង្ហាញពីសក្តានុពលផលិតផលរបស់ខេត្ត»។
លោក ប៊ុនរិទ្ធិ បានប៉ាន់ប្រមាណថា ពិធីបុណ្យទន្លេនេះនឹងទាក់ទាញភ្ញៀវទេសចរជាង ១ លាននាក់ក្នុងរយៈពេល ៣ ថ្ងៃនេះ។ លោកបន្តថា ស្តង់ពិព័រណ៍របស់ប្រទេសថៃ ៣០០ ក៏នឹងចូលតាំងបង្ហាញផលិតផលពួកគេក្នុងកម្មវិធីនេះផងដែរ។
លោក តុប សុភ័ក្ត អ្នកនាំពាក្យក្រសួងទេសចរណ៍បានឲ្យដឹងថា ក្នុងចំណោមស្តង់សរុបក្រសួងទេសចរណ៍បានរៀបចំស្តង់របស់ខ្លួនចំនួន ២៩៩ ក្នុងនោះ ៥០ ស្តង់នឹងតាំងបង្ហាញអាហារតាមដងផ្លូវ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាមានប្រសាសន៍ថា កម្មវិធីនេះនឹងជួយជំរុញផ្សព្វផ្សាយពីសក្តានុពលពីវិស័យទេសចរណ៍របស់ខេត្តនេះ។
លោកនាយករដ្ឋមន្ត្រី ហ៊ុន សែន ថ្លែងក្នុងកម្មវិធីបិទសន្និបាទក្រសួងសុខាភិបាលកាលពីថ្ងៃម្សិលមិញដោយបានអំពាវនាវឲ្យប្រជាពលរដ្ឋទៅចូលរួមទស្សនាកម្មវិធីបុណ្យទន្លេលើកទី ៦ នៅខេត្តបាត់ដំបងឲ្យបានច្រើន៕LA
