ភ្នំពេញៈ រដ្ឋមន្ដ្រីមហាអនុតំបន់ទន្លេមេគង្គ (GMS) បង្ហាញការប្ដេជ្ញាចិត្តក្នុងការបង្កើនកិច្ចសហប្រតិបត្តិការក្នុងតំបន់ ក្នុងការតភ្ជាប់ឌីជីថល និងកិច្ចព្រមព្រៀងដឹកជញ្ជូនឆ្លងកាត់ព្រំដែន (CBTA) ដើម្បីលើកកម្ពស់ការផ្លាស់ប្តូរពាណិជ្ជកម្ម និងទេសចរណ៍នៅក្នុងតំបន់។ នេះបើតាមសេចក្ដីប្រកាសព័ត៌មានបានពីក្រុមប្រឹក្សាអភិវឌ្ឍន៍កម្ពុជា (CDC) ដែលបានចេញផ្សាយកាលពីម្សិលមិញ។
សេចក្ដីប្រកាសព័ត៌មាននេះបានឲ្យដឹងថា លោក សុក ចិន្តាសោភា អគ្គលេខាធិការ CDC ដែល មានតួនាទីជារដ្ឋមន្ដ្រី GMS របស់ កម្ពុជា ក៏បានឡើងថ្លែងក្នុងវេទិកាច្រករបៀងសេដ្ឋកិច្ច GMS លើកទី ១០ នៅទីក្រុងណៃពិដោ ប្រទេស មីយ៉ាន់ម៉ា ផងដែរ។
សេចក្ដីប្រកាសព័ត៌មានរបស់ CDC បង្ហាញថា លោក ចិន្តាសោភា បានបញ្ជាក់ពីសមិទ្ធផល ចាប់តាំងពីការចាប់ផ្ដើមកិច្ចសហប្រតិបត្តិការសេដ្ឋកិច្ច GMS និងផែនការឆ្ពោះទៅមុខ ដើម្បីពង្រឹងកិច្ចសហប្រតិបត្តិការក្នុងចំណោមបណ្ដាប្រទេស GMS ដើម្បីដោះស្រាយការបារម្ភផ្នែកសេដ្ឋកិច្ចពិភពលោកនៅពេលបច្ចុប្បន្ន។
CDC បានឲ្យដឹងថា៖ «រដ្ឋមន្ដ្រី GMS ក៏បានបញ្ជាក់ពីសារៈសំខាន់នៃការតភ្ជាប់វិស័យឧស្សាហកម្ម តាមរយៈច្រករបៀងសេដ្ឋកិច្ច GMS ដើម្បីធានាសមត្ថភាពប្រកួតប្រជែងដ៏រឹងមាំក្នុងចង្វាក់ផលិតក្នុងតំបន់ និងពិភពលោក»។
CDC ក៏បានបង្ហាញដែរថា វេទិកានេះបានជំរុញការពង្រឹងការសហការបន្ថែមពីដៃគូការអភិវឌ្ឍ និងក្រុមវិនិយោគិនឯកជន ដើម្បីមើលឃើញការផ្ដល់ហិរញ្ញប្បទាន ដែលអាចរកបានកាន់តែច្រើន ដើម្បីឆ្លើយតបនឹងតម្រូវការខ្ពស់នៃការផ្ដល់ហិរញ្ញប្បទានសម្រាប់ហេដ្ឋារចនាសម្ព័ន្ធនៅក្នុងតំបន់ GMS ៕ LA