ភ្នំពេញ: រដ្ឋាភិបាលកម្ពុជាបានសម្រេចលើកលែងការបង់ពន្ធអប្បបរមាក្នុងរយៈពេល ៣ ខែ ដល់វិស័យអាកាសចរណ៍ និងលើកលែងការបង់ពន្ធប្រចាំខែគ្រប់ប្រភេទសម្រាប់ប្រតិបត្តិករក្នុងវិស័យទេសចរណ៍ដែលនេះជាវិធានការបន្ថែមទៀតក្នុងគោលបំណងសម្រាលបន្ទុកវិស័យឯកជនដែលរងផលប៉ះពាល់ដោយសារតែការរីករាលដាលវីរុសកូរ៉ូណា។ នេះបើតាមសេចក្តីប្រកាសព័ត៌មានរបស់រដ្ឋាភិបាលដែលចេញផ្សាយកាលពីថ្ងៃអង្គារ។
សេចក្តីប្រកាសព័ត៌មានបានឲ្យដឹងថា ការលើកលែងការបង់ពន្ធអប្បបរមា ១០ ភាគរយ ត្រូវអនុវត្តចាប់ពីខែមីនារហូតទៅដល់ខែឧសភា ឆ្នាំ ២០២០ សម្រាប់ក្រុមហ៊ុនអាកាសចរណ៍នៅកម្ពុជា។ រដ្ឋាភិបាលក៏សម្រេចឲ្យក្រុមហ៊ុនអាកាសចរណ៍ត្រូវរៀបចំប្រាក់ជំពាក់ជាដំណាក់កាលក្រោយពីរយៈពេលពន្យារនេះ។
ចំពោះវិស័យទេសចរណ៍ដែលកំពុងរងផលប៉ះពាល់ធ្ងន់ធ្ងរពីការរាតត្បាតជំងឺកូវីដ-១៩ រដ្ឋាភិបាលបានសម្រេចលើកលែងការបង់ពន្ធគ្រប់ប្រភេទរួមមាន សណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារអាកាសចរណ៍ដែលចុះបញ្ជីនៅអគ្គនាយកដ្ឋានពន្ធដារ។
សេចក្តីប្រកាសព័ត៌មានបន្តថា វិធានការនេះសម្រាប់សកម្មភាពអាជីវកម្មនៅទីក្រុងភ្នំពេញ ខេត្តសៀមរាប កំពតព្រះសីហនុ កែប ក្រុងបាវិត និងក្រុងប៉ោយប៉ែតសម្រាប់រយៈពេល ៣ ខែចាប់ពីខែមីនា ដល់ខែឧសភា។
សេចក្តីប្រកាសព័ត៌មានឲ្យដឹងថា៖ «អាជីវកម្មទាំងនេះនៅតែមានកាតព្វកិច្ចដាក់លិខិតប្រកាសពន្ធអាករ និងប្រើប្រាស់ប្រព័ន្ធអនឡាញសម្រាប់គ្រប់គ្រងអាករលើតម្លៃបន្ថែម (E-VAT) ជារៀងរាល់ខែក្នុងអំឡុងពេលនៃការលើកលែងនេះ»។
ទន្ទឹមនេះរដ្ឋាភិបាលក៏បានពង្រីកវិសាលភាពនៃយន្តការនៃការចូលរួមចំណែកឧបត្ថម្ភ ២០ ភាគរយនៃប្រាក់ខែអប្បបរមាដល់កម្មករ និយោជិតដែលរងផលប៉ះពាល់ពីការព្យួរ ឬផ្អាកដំណើរការអាជីវកម្មដល់ប្រតិបត្តិករក្នុងវិស័យទេសចរណ៍ដែលរៀបរាប់ខាងលើ។
សេចក្តីប្រកាសព័ត៌មានបានបញ្ជាក់ថា៖ «ការផ្តល់ប្រាក់ឧបត្ថម្ភ ២០ ភាគរយ នៃប្រាក់ខែអប្បបរមានេះតម្រូវឲ្យភ្ជាប់ជាមួយនូវលក្ខខណ្ឌនៃការចូលរួមវគ្គបណ្តុះបណ្តាលរយៈពេលខ្លី ១-២ សប្តាហ៍ ដែលរៀបចំឡើងដោយក្រសួងទេសចរណ៍»។
លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានប្រាប់ភ្នំពេញប៉ុស្តិ៍កាលពីថ្ងៃអង្គារថា ការលើកលែងការបង់ពន្ធអប្បបរមាចំនួន ១០ ភាគរយនឹងជួយសម្រាលបន្ទុកបានមួយផ្នែកដល់ក្រុមហ៊ុនអាកាសចរណ៍ដែលកំពុងប្រតិបត្តិការនៅកម្ពុជាដែលរងផលប៉ះពាល់ដោយសារជំងឺកូវីដ១៩។
លោកបានថ្លែងថា៖ «ដោយរដ្ឋាភិបាលមានបន្ទុកធ្ងន់ដោយសារជំងឺកូវីដ ១៩ ទើបរដ្ឋាភិបាលសម្រេចធ្វើការលើកលែងការបង់ពន្ធអប្បបរមាសម្រាប់វិស័យអាកាសចរណ៍ តែខ្ញុំជឿថា រាជរដ្ឋាភិបាលនឹងបន្តជួយបន្ថែមទៀត ប្រសិនបើបញ្ហាវីរុសកូរ៉ូណានេះនៅបន្តអូសបន្លាយតទៅទៀត»។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានឲ្យដឹងថា វិធានការរបស់រដ្ឋាភិបាលនេះនឹងជួយសម្រាលបន្ទុកក្នុងការបន្តរក្សាអាជីវកម្ម និងការងាររបស់កម្មករ និយោជិតក្នុងវិស័យទេសចរណ៍។
អ្នកស្រីថ្លែងថា៖ «យើងសូមអរគុណរដ្ឋាភិបាលដែលបានគិតគូរដល់កម្មករ និយោជិត ដែលវិធានការនេះនឹងជួយលើកទឹកចិត្តវិស័យឯកជនក្នុងការបន្តអាជីវកម្មរបស់យើងក្នុងអំឡុងមានការរីករាលដាលនៃវីរុសកូរ៉ូណានេះ»។
បើយោងតាមលោក ចាន់សេរីវុត្ថា ដោយសារបញ្ហារីករាលដាលវីរុសកូរ៉ូណា បច្ចុប្បន្នអាកាសយានដ្ឋានអន្តរជាតិខេត្តសៀមរាបបានកាត់បន្ថយការហោះហើរប្រមាណ ៩០ ភាគរយ អាកាសយានដ្ឋានអន្តរជាតិភ្នំពេញប្រមាណ ៦០ ភាគរយ និងអាកាសយានដ្ឋានអន្តរជាតិព្រះសីហនុប្រមាណ ៧០ ភាគរយ។
ទន្ទឹមនឹងរដ្ឋាភិបាលក៏បានណែនាំឲ្យស្ថាប័នរដ្ឋ និងអំពាវនាវដល់ម្ចាស់អគារ និងរោងចក្រឲ្យជួយសម្រួលដល់ភាគីអ្នកជួលដោយចៀសវាងការបញ្ឈប់កិច្ចសន្យា ឬបណ្តេញចេញលើការពន្យារពេលសម្រាប់ការបង់ថ្លៃសេវា ជួល និងការដេញថ្លៃសេវាជួលជាយថាហេតុផ្សេងៗ៕ LA
វីដេអូ៖