.jpg)
ស្ត្រី អារ៉ាប៊ីសាអ៊ូឌីត កំពុងមើលសៀវភៅក្នុងពិព័រណ៍សៀវភៅអន្តរជាតិមួយកាលពីខែធ្នូ ឆ្នាំ ២០១៧ នៅក្រុង Jeddah។ AFP
ក្រុងរីយ៉ាតៈ ពេលនេះស្ដ្រីនៅក្នុងប្រទេស អារ៉ាប៊ីសាអ៊ូឌីត អាចបើកអាជីវកម្មផ្ទាល់ខ្លួនដោយមិនចាំបាច់មានការយល់ព្រមពីប្ដី ឬសាច់ញាតិបុរសនោះទេ ខណៈដែលប្រទេសនេះជំរុញឲ្យមានការពង្រីកវិស័យឯកជនឲ្យកាន់តែរីកចម្រើនឆាប់រហ័ស។
ការផ្លាស់ប្តូរគោលនយោបាយដែលបានប្រកាសដោយរដ្ឋាភិបាល អារ៉ាប៊ីសាអ៊ូឌីត កាលពីថ្ងៃព្រហស្បតិ៍ បង្ហាញជំហានដ៏សំខាន់មួយចេញពីប្រព័ន្ធគ្រប់គ្រងដ៏តឹងរ៉ឹងដែលបានគ្រប់គ្រងប្រទេសនេះអស់រយៈពេលជាច្រើនទសវត្សរ៍មកហើយ។
ក្រសួងពាណិជ្ជកម្ម និងការវិនិយោគបានឲ្យដឹងនៅលើគេហទំព័ររបស់ខ្លួនថា៖ «នៅពេលនេះស្ដ្រីអាចចាប់ផ្ដើមដំណើរការអាជីវកម្មខ្លួនបាន និងទទួលបានអត្ថប្រយោជន៍ពីសេវាអេឡិចត្រូនិក (របស់រដ្ឋាភិបាល) ដោយមិនចាំបាច់មានការបង្ហាញការយល់ព្រមពីបុរសនោះទេ»។
ស្ថិតក្រោមប្រព័ន្ធគ្រប់គ្រងរបស់ អារ៉ាប៊ីសាអ៊ូឌីត ស្ដ្រីត្រូវតម្រូវឲ្យបង្ហាញភស្ដុតាងនៃការអនុញ្ញាតពី «បុរសដែលជាអាណាព្យាបាល» ដូចជាប្ដី ឪពុក ឬបងប្រុសក្នុងការធ្វើក្រដាសស្នាមរដ្ឋាភិបាលណាមួយការធ្វើដំណើរ ឬការចុះឈ្មោះរៀន។
អស់រយៈពេលយូរមកហើយដែលប្រទេសពឹងផ្អែកលើការផលិតប្រេងឆៅសម្រាប់ប្រាក់ចំណូលសេដ្ឋកិច្ច អារ៉ាប៊ីសាអ៊ូឌីត កំពុងជំរុញឲ្យមានការពង្រីកវិស័យឯកជនរបស់ប្រទេសនេះ ដែលរួមមានការបង្កើនការផ្ដល់ការងារស្ដ្រីស្ថិតក្រោមផែនការកែទម្រង់សម្រាប់សម័យក្រោយប្រេង។
ខណៈស្ដ្រីនៅតែប្រឈមនឹងការរឹតបន្តឹងជាច្រើនក្នុងប្រទេសមូស្លីមអភិរក្សយ៉ាងខ្លាំងមួយនេះ ការិយាល័យព្រះរាជអាជ្ញាសាធារណៈរបស់ អារ៉ាប៊ីសាអ៊ូឌីត នៅខែនេះឲ្យដឹងថា ខ្លួននឹងចាប់ផ្ដើមជ្រើសរើសបុគ្គលិកស៊ើបអង្កេតជាស្ដ្រីជាលើកដំបូង។
ប្រទេសនេះបានបើកចំហមុខងារ ១៤០ កន្លែងសម្រាប់ស្ដ្រីនៅក្នុងព្រលានយន្តហោះ និងច្រកឆ្លងកាត់ព្រំដែនជាប្រវត្តិសាស្ដ្រដំបូងដែលរដ្ឋាភិបាលបានឲ្យដឹងថាបានទាក់ទាញស្ត្រីដាក់ពាក្យ ១០៧ ០០០ នាក់។
ព្រះអង្គម្ចាស់ Mohammed bin Salman ជារាជទាយាទដ៏មានឥទ្ធិពលចំពោះរាជបល្ល័ង្កប្រទេស អារ៉ាប៊ីសាអ៊ូឌីត កំពុងដឹកនាំយុទ្ធនាការក្នុងការពង្រីកតួនាទីស្ដ្រីនៅក្នុងកម្លាំងពលកម្មក្នុងរយៈពេលជាច្រើនខែថ្មីៗនេះ។
ព្រះបិតា King Salman របស់លោកកាលពីខែកញ្ញាបានយល់ព្រមបញ្ចប់ការហាមឃាត់រយៈពេលជាច្រើនទសវត្សរ៍លើការបើកបរដែលចាប់ផ្ដើមអនុវត្តកាលពីខែមិថុនា។
ព្រះអង្គម្ចាស់ព្រះជន ៣២ វស្សាអង្គនេះបានសន្យាថានឹង «បើកចំហជាមធ្យម» នៅប្រទេស អារ៉ាប៊ីសាអ៊ូឌីត កាលពីខែតុលាដែលរំលោភលើក្រុមបព្វជិតអភិរក្សជ្រុលនិយម ជាការគាំទ្រដល់មុខមាត់ដែលជាតម្រូវការចំពោះក្រុមវិនិយោគិនបរទេស និងយុវវ័យប្រទេស អារ៉ាប៊ីសាអ៊ូឌីត។
ព្រះអង្គម្ចាស់ Mohammed ត្រូវបានមើលឃើញយ៉ាងទូលំទូលាយថាជាប្រធានស្ថាបត្យករនៅពីក្រោយកម្មវិធីកែទម្រង់ «ចក្ខុវិស័យ ២០៣០» របស់ប្រទេស អារ៉ាប៊ីសាអ៊ូឌីត ដែលព្យាយាមក្នុងការបង្កើនភាគរយស្ដ្រីនៅក្នុងកម្លាំងពលកម្មពី ២២ ភាគរយដល់ជិត ១ ភាគ ៣៕ LA
