ក្រុងតេអេរ៉ង់ៈ ប្រាក់រីអាល់របស់ប្រទេស អីុរ៉ង់ បានធ្លាក់ថ្លៃដល់កម្រិតទាបបំផុតមិនធ្លាប់មានធៀបនឹងប្រាក់ដុល្លារ អាមេរិក កាលពីថ្ងៃចន្ទ បើទោះជាធនាគារកណ្តាលប្រឹងប្រែងខំទប់ស្កាត់ចំពោះការធ្លាក់ចុះនេះក៏ដោយ។
ប្រាក់រីអាល់ បានធ្លាក់ថ្លៃប្រហែល ១៥ ភាគរយនៃតម្លៃរបស់ខ្លួននៅលើទីផ្សារក្នុង រយៈពេល ៣ ថ្ងៃកន្លងមកនេះ ដោយធ្លាក់ចុះដល់ ១២៨ ០០០ រីអាល់ក្នុង១ដុល្លារនៅល្ងាចថ្ងៃចន្ទ។ នេះបើយោងតាមគេហទំព័រ Bonbast.com ដែលតាមដានអត្រាប្តូរប្រាក់របស់ អីុរ៉ង់។
លោក Maziar Motamedi ដែលជាអ្នកសារព័ត៌មានផ្នែកហិរញ្ញវត្ថុបានថ្លែងថា ការធ្លាក់ថ្លៃនេះ បានកើតមានឡើងបន្ទាប់ពីសុន្ទករថាមួយដែលធ្វើឡើងដោយទេសាភិបាលធនាគារកណ្តាលអីុរ៉ង់លោក Abdolnaser Hemmati កាលពីថ្ងៃសៅរ៍ ដែលលោកបានប្រកាសវិធានការរឹតបន្តឹងកាន់តែខ្លាំងលើការបែងចែកទុនបម្រុងរូបិយប័ណ្ណបរទេស។
លោកបានថ្លែងថា៖ «លោក Hemmati បានថ្លែងថា លោកមានបំណងចាត់វិធានការកាន់តែប្រយ័ត្នក្នុងការបែងចែករូបិយប័ណ្ណបរទេសនៅក្នុងកម្រិតរដ្ឋាភិបាល ដែលបង្ហាញពីការអាចខ្វះខាតរូបិយប័ណ្ណរឹងនៅពេលឆាប់ៗខាងមុខ»។
ប្រាក់រីអាល់ បានបាត់បង់តម្លៃ ៧០ ភាគរយនៃតម្លៃរបស់ខ្លួនក្នុងរយៈពេល ១២ ខែចុងក្រោយនេះ ជាចម្បងដោយសារការកើនឡើងអរិភាពពី សហរដ្ឋអាមេរិក និងការដកខ្លួនរបស់ អាមេរិក ចេញពីកិច្ចព្រមព្រៀងនុយក្លេអ៊ែរឆ្នាំ ២០១៥ កាលពីខែឧសភា។
សេចក្តីថ្លែងការណ៍ផ្លូវការមានឥទ្ធិពលតិចតួចដើម្បីរម្ងាប់ទីផ្សារ៕ AFP/KC
